VOV4.Bahnar - Jô̆ truh 7/9, dêh char Lâm Đồng đei 259 ‘nu bơ ngai jĭ Covid-19. Lơ̆m nŏh đei 187 ‘nu bơ ngai jĭ đei hơ met klăih păng brŏk đơ̆ng hnam pơ gang. Lạc Dương jĭ 1 apŭng tơ̆ dêh char Lâm Đồng tam mă đei bơ ngai jĭ Covid-19. Kăl pơ ma ‘nŏh, lơ̆m kơ sô̆ dôm bơ ngai jĭ Covid-19 tơ̆ dêh char, đei hlŏh 70% kơ sô̆ bơ ngai đei hơ met klăih păng brŏk đơ̆ng hnam pơ gang. 72 ‘nu bơ ngai oei đei dơ̆ng oei khăm, hơ met tơ̆ dôm hnam pơ gang lơ̆m dêh char.

Tơ drong hơ len năng jĭ, chih tơ roi găh jơ hngâm jăn lơ̆m tơ pôl đei dôm tơ ring tơ̆ dêh char Lâm Đồng bơ̆ jang ‘lơ̆ng

Mă đơ̆ng tơ drong jĭ tơ̆ dêh char Lâm Đồng hlôi đei găn bơih ră mă lei oei tôch krê hơ mơt, Khul kơ dră chĕp kơ̆l đảng dêh char Lâm Đồng athei Dơ nŏ anih vei lăng kon pơ lei dêh char, Anih pơ gơ̆r jang tang găn jĭ Covid-19 kơ dêh char hơ nơ̆ng pơ tho ăn dôm tơ ring, anih jang ưh gơ̆h lăng pơ hơi, kăl hlŏh ‘nŏh athei hơ tŏk tơ drong vei lăng khul bơ ngai huơ̆r gre chơ chuĕn tơ mam kiơ̆ tơ drong hơ găt.

Dơ̆ng: Tơ blơ̆