VOV4.Bahnar - Pơ gê ‘năr 25/5, Kơ dră Anih vei lăng găh tơ drong jang pơ gang Lâm Đồng Nguyễn Đức Thuận tơ băt đĭ đăng 120 tơ mam hơ len lăng đơ̆ng dôm bơ ngai ƀơm truh bơ ngai jĭ 3141 ư̆h kơ đei ƀôh pơ rang jĭ ‘măng mă 3 hăm SARS-CoV-2. Jô̆ truh pơ gê ‘năr 25/5, dêh char Lâm Đồng hlôi ăn oei hơ drô̆ y tế 355 ‘nu; lơ̆m noh, tơ̆ anih jang pơ gang 21 ‘nu; tơ̆ rim anih ăn oei hơ drô̆ akŏm 259 ‘nu păng ăn oei hơ drô̆ tơ̆ hnam 75 ‘nu. Ƀơm truh bơ ngai jĭ Covid-19 kơ sô̆ 3141 đơ̆ng Bắc Ninh hlôi đei năm tơ̆ Đà Lạt tơ mang lăng đơ̆ng ‘năr 2-5/5, Lâm Đồng hlôi tơ chă đei 776 ‘nu. Dang ei tŏk bŏk ăn oei hơ drô̆ y tế 152 ‘nu. Mă loi ‘noh jĭ, đơ̆ng ‘năr 23 -25/5 hlôi đei 249 tơ mam hơ len lăng SARS-CoV-2 ‘măng mă 3 ư̆h kơ đei ƀôh pơ rang jĭ. Dôm bơ ngai ăn oei hơ drô̆ akŏm đei ƀôh hơ len lăng 3 ‘măng ư̆h kơ đei jĭ SARS-CoV-2 hlôi đei iŏk tơ chơ̆t jang đang tơ drong ăn oei hơ drô̆ akŏm.

Thuem: Tơ blơ̆