VOV4.Bahnar - Năr brei, năr 15/12, dêh char Lâm Đồng đei 284 ‘nu bơngai tơpoh jĭ Covid-19, jing măt bơngai tơpŏh lơ̆m 24 jơ (jing mĭnh năr mĭnh măng) lơ hlŏh đơ̆ng sơ̆ truh dang ei. Lơ̆m 284 ‘nu bơngai ‘nao tơpŏh jĭ tơ̆ dêh char, 4 apung păng pơlei tơm đei măt bơngai tơpŏh jĭ Covid-19 lơ ‘nŏh Đà Lạt, Di Linh, Đức Trọng păng Đạ Huoai hlôi đei 217 ‘nu.

Tơdrong ji Covid-19 tơ̆ Lâm Đồng pơram kơtang iok đơ̆ng năr blŭng khei 12 hăm vă jê̆ 2.500 ‘nu bơngai jĭ lơ̆m 1 poăt khei, tŏk kơtang hlŏh lơ̆m tơring Tây Nguyên. Trŭh năr 15/12, lơ̆m dêh char đei 5.983 ‘nu bơngai jĭ Covid-19, lơ̆m au 2.864 ‘nu bơngai tŏk bŏk ming hơmet. Tơ jră tang găn hăm jĭ hơbŭh Covid-19 tơpŏh kơtang, Dơnŏ anĭh vei lăng jang pơgang dêh char Lâm Đồng hlôi ƀơk mă kơsô̆ ăn 3 hơnih ming hơmet jĭ Covid-19, hăm 570 tong giơng tep ăn bơngai jĭ, ‘măn ăn rim F0 jĭ păh ai păng ư̆h kơ đei ƀô̆h chĕp pơgrŭn. Lơ̆m au, đei 2 hơnĭh ming hơmet tơ̆ pơlei tơm Đà Lạt păng 1 hơnĭh tơ̆ apŭng Di Linh.

Tơblơ̆ nơ̆r: Amazưt