VOV4.Bahnar - Sơ năm ‘nâu jĭ sơ năm mă 2 Lêh soi kơ Ƀok pơ tao Hùng ưh đei pơ gơ̆r tơ drong ngôi pơ chơt yoa hơ mơt jĭ COVID-19 tơ pŏh. Găh tơ drong lêh sơ năm ‘nâu, Khul vei lăng Anih gru groa so Đền Hùng chih tơ lĕch trong pơ gơ̆r ‘lơ̆ng sơ đơ̆ng, lăp hăm tơ drong tang găn jĭ. Nhôn đei jơ pơ ma nuh hăm ƀok Lê Trường Giang – Kơ dră chĕp kơ̆l Anih gru groa Đền Hùng.

- Ƀok ăi, Anih pơ gơ̆r hlôi tơ lĕch trong pơ gơ̆r lêh soi kơ ƀok Pơ tao Hùng sơ năm ‘nâu thoi yơ hă ƀok?

- Ƀok Lê Trường Giang: Et soi kơ Ƀok Pơ tao Hùng sơ năm ‘nâu lăp pơ gơ̆r tơ drong soi đĕch, ưh đei pơ gơ̆r ngôi pơ chơt. Yoa jĭ COVID-19 dar dĕh đei găn ƀiơ̆ kơ na ‘năr 6/3 (âm lịch) sơ năm Tân Sửu pơ gơ̆r sŏh plang nhang ƀât năr et soi kơ ƀok Lạc Long Quân.

Tơ drong lêh soi tơ̆ Anih soi Đền Hùng

‘Năr 10/3 (âm lịch) kiơ̆ trong vă jang adrol ki lăp hơ drô̆ khul chĕp kơ̆l Đảng, tĕh đak, kơ dră chĕp kơ̆l dêh char, dôm anih jang kơ pal kơ dêh char đĕch truh akŏm. Mă lei, năng kiơ̆ tơ drong kơ plăh dang ei, nhôn oei apinh Dơ nŏ anih vei lăng kon pơ lei dêh char asong pơ gơ̆r tung kiê̆u păng ăn khul 100 ‘nu kon sâu ƀok tơm dơ nơm kơ tĕh đak sơng hla kơ.

Khul plang pơ yơ̆r pơih xă truh tơ̆ dôm apŭng, pơ lei tơm vă tơ ƀôh jơ hngâm ‘mêm băt đơ̆ng kon sâu hrei ‘nâu.

- Kiơ̆ trong vă jang, 1,2 tơ drong hơ ri hơ xoang lơ̆m tơ pôl kŭm đei pơ gơ̆r kơ plăh âu. Anih pơ gơ̆r vă tơ lĕch trong tang găn jĭ thoi yơ vă tơ moi truh akŏm gơ̆h sơ đơ̆ng ‘lơ̆ng? 

- Ƀok Lê Trường Giang: Anih vei lăng jŏh ayŏ kơ dŏ xoang, tơ plŏng kơ dâu păng chă tơ mang lăng pơ tho ăn anih pơ gơ̆r hơ ri hơ xoang Việt Trì pơ gơ̆r hơ ri Xoan. Tơ̆ hnam soi Lãi Lèn kŭm pơ gơ̆r hơ ri xoan mưh đei tơ moi truh.

Tơ̆ Đền Hùng, pơ gơ̆r dơ̆ng tơ drong tĕh hơ gơ̆r kong, hơ xoang pĭm pŭm lơ̆m đak păng thi ‘nŭng, rơ̆ ƀĕng chưng ƀĕng giầy vă pôk pơ ư kơ jă kăp gĭt đơ̆ng tơ drong juăt chăl sơ̆.

Sơ năm sơ̆ trŏ ƀât năr tang găn, ưh ăn yak vih vât lơ̆m tơ pôl kơ na kon pơ lei ưh gơ̆h truh. Đơ̆ng blŭng sơ năm truh dang ei, nhôn hơ nơ̆ng chă sơng iŏk kon pơ lei, tơ moi chă tơ mang lăng truh. ‘Năr 6/3 păng 7/3 jĭ năr 6 păng năr 7, nhôn tơ dra vă sơng lơ tơ moi ƀiơ̆ kơ na hơ met tôm tơ drong, chĕng song trong yak vih vât, pơm thoi yơ vă gơ̆h tang găn ‘lơ̆ng tơ drong jĭ. Hơ tŏk tơ drong roi tơ băt kiơ̆ đơ̆ng radio tơ̆ anih gru groa so.

- Lei a, bơ nê kơ ih hơ!

Dơ̆ng: Tơ blơ̆