VOV4.Bahnar - To\k 76 xơnăm, [ok K’Năm, linh xo hơdrung Mạ, tơ\ thôn 1, xăh Lộc Phú, apu\ng Bảo Lâm, dêh char Lâm Đồng, mă ưh gan grăng, mă lei duh hăt hot hăm tơdrong hri kră xơ\ kơ kon pơlei po. Bơ\ng pang dôm tơdrong tơplih lơ\m tơdrong erih ‘nao ph^ tơto\ dơno\ ‘lơ\ng kơ pơlei pơla, [ok io\k nơ\r hri vă bơnê kơ Đảng, teh đak, hơlêm kon pơlei adrin pơm jang, vei răk tơ[ăk mong um ai joh ayo\ kon kông po.   

            “Adrol ki, kon pơlei rơvơ\ng rơvo tơ\ bri kơdrơ\ng, tơdrong erih [ơ\t âu kơdâu [ơ\t to, pơngot rơve\t, j^ pơlo\, tơdrong erih ưh băt vă năm tơ\ yơ... Gơnơmd dei Đảng, {ok Hồ tơ[ôh ăn trong, pơlei pơla pơtơm đei tơdrong erih nhen hrei âu. Teh đak rơngei hiôk hian, kon pơlei Mạ pơtơm đei tơdrong erih xơđơ\ng minh anih"

Noh jing nơ\r hri mă [ok K’Năm kơdih chă chih ako\m kiơ\ tơdra hri Loong kơ kon pơlei Mạ, vă tơbang đon bơnôh po găh tơdrong erih ‘nao. Tơroi găh tơdrong erih xơđơ\ng păng hơto\k tơ iung nhen hrei âu, [ok pơtoi hri kiơ\ tơdra tam-pớt, nơ\r hri thoi âu: “Adrol âu ki, kon pơlei hrat tôch dêh, athei găn ga kông krang hang nak, hli hlơt. Mă lei dang ei, gơnơm đei Đảng, teh đak tơre\k tơgu\m, axong lơ tơdrong pơkăp jang nhen 135, 132, 134… dang ei kon pơlei lăp kơ đon păng bơnê kơ Đảng, teh đak. Dang ei pă đei tơdrong tơblăh, tơdrong erih pă đei pơngot rơve\t, pă đei kơdâu kơ ayăt mơ\t tơ\ bri kơdrơ\ng nhen yă [ok bơ\n xơ\... Rim tơdrong hlôi đei Đảng, teh đak ‘nhăk truh tơring. Tôm kon pơlei lơ\m teh đak âu adoi hơto\ hơnơ\ng, pơ ‘nam pơm jang.”

            {ok K’Năm tơroi, gơnơm đei Đảng, teh đak mă rim pơlei pơla hlôi pă đei pơngot nhen adrol ki bơih. Dang ei trong nơnăm hiôk, tơmam drăm hlôi đei, unh hơyuh tơ\k ang hơdăh, tơdrong erih xơđơ\ng, phe [a, cà phê… kon pơlei kon kông adoi pơm jang đei. Tơdrong mă [ok ‘meh vă dang ei noh pơm thoi yơ vă tơdrong erih joh ayo\ kră xơ\ kơ kon pơlei kon kông đei răk vei păng hơto\k tơ iung: “Đơ\ng xơ\ hri bua hlôi tơguăt hăm tơdrong erih kon pơlei Mạ. Yuơ noh ‘meh vă Đảng, teh đak tơre\k tơgu\m pơtho găh joh ayo\ juăt jue kơ kon pơlei, vă kon xâu ưh kơ hiơt joh ayo\ hơdrung hơdre\ch po. Nhen hri tam pớt, hri loong, tôn chêng hơgơ\r, hri hơ ‘mon... adoi hơ iă hiôk. Pơm thoi yơ vă kon pơlei kon kông nhôn pơtoi vei răk tơơâưk mong joh ayo\ ‘lơ\ng ro\ mă tă [ok pơxư\ ăn, vă tơdrong erih roi anưr roi ‘lơ\ng ro\ hloh”.

            {ok duh ‘meh vă kon xâu bơngai Mạ, bơngai K’ho duh nhen dôm hơdrung hơdre\ch nai tơ\ Lâm Đồng, tơ\ Tây Nguyên, hơnơ\ng tơguăt băl, băt ‘mêm kơ eng dih băl, băt che\p vei tơdrong joh ayo\ yă [ok pơxư\ ăn, pơ ‘nam ho\k pơhrăm pơm jang vă tơdrong erih roi năr roi ph^ tơto\ hloh....

Lan chih păng rapor