VOV4.Bahnar  – Truh kơsơ̆ năr 17/9, Lâm Đồng đei 272 'nu ƀơm jĭ Covid-19, lơ̆m noh đei  228 'nu hlôi đei hơmet klaih păng lĕch đơ̆ng hnam pơgang. Lơ̆m 272 'nu ƀơm jĭ Covid-19 đei akŏm tơ̆ dêh char Lâm Đồng, đei lơ bơngai ƀơm jĭ kơyuơ đơ̆ng anih hơbuh jĭ tơ̆ Hnam kơmăi dui brai Đà Lạt păng dôm bơngai vơ̆r gre, bơngai jang lơ̆m gre chơ tơmam lĕch tơ̆ 'nguaih dêh char. Lơ̆m noh, plei tơm Đà Lạt đei lơ bơngai jĭ hloh hăm 162 'nu, pơtoi kơ noh apŭng Đơn Dương 45 'nu păng apŭng Đức Trọng 27 'nu. Dôm apŭng Bảo Lâm, Cát Tiên, Lâm Hà đei 1 'nu ƀơm jĭ đĕch. Găh Lạc Dương jing apŭng adrô̆ kơ dêh char tam mă đei bơngai yơ ƀơm jĭ Covid-19. Mă kăl, lơ̆m dôm bơngai ƀơm jĭ Covid-19 tơ̆ Lâm Đồng đei lơ bơngai jĭ hlôi đei hơmet klaih păng lĕch đơ̆ng hnam pơgang. Dang ei oei pă 44 'nu jĭ tŏk bŏk oei đei hơmet tơ̆ Hnam pơgang Nhi Lâm Đồng păng 2 apŭng Đơn Dương, Đức Trọng.

Lan chih păng pơre nơ̆r