VOV4.Bahnar - Tơ drong jang ƀet vaccine bơ̆ng jĭ COVID-19 ăn hơ ioh đơ̆ng 12-17 sơ năm tơ̆ Việt Nam hlôi pơ tơm tơ lĕch jang đơ̆ng blŭng khei 11/2021 lơ̆m teh đak. Dang ei hlôi đei 6 tơ ring pơ gơ̆r ƀet ‘noh pơ lei tơm Hồ Chí Minh, Đà Nẵng, Bình Dương, Kiên Giang, Ninh Bình păng Quảng Ninh. Mĭnh ƀar tơ ring nai hlôi tơ lĕch jang ƀet vaccine bơ̆ng jĭ COVID-19 ăn hơ ioh ƀơ̆t vaccine đei klăih song. Anih tơm vei lăng găh tơ drong jang pơ gang tŏk bŏk lăng truh tơ drong vaccine ƀet tôm ăn kon pơ lei đơ̆ng 18 sơ năm tơ̆ kơ pal đei 100% lơ̆m noh jăl khei mă 4/2021 păng blŭng sơ năm 2022. Hơ drô̆ găh ƀet vaccine bơ̆ng jĭ COVID-19 ăn hơ ioh hơ la kơ 18 sơ năm, lăng kiơ̆ lơ̆m tơ drong pơ truh vaccine đơ̆ng anih pơm tơ lĕch, Anih tơm vei lăng găh tơ drong jang pơ gang tŏk bŏk pơ jing trong tơ lĕch jang iŏk yua vaccine sơ năm 2022 păng apĭnh tơ gop nơ̆r đơ̆ng Anih pơ gơ̆r jang kơ teh đak tang găn jĭ hơ buh găh tơ drong pơ̆ih să sơ năm ƀet bơ̆ng ăn hơ ioh hơ la kơ 12 sơ năm kiơ̆ nơ̆r tơ tă đơ̆ng Anih vei lăng găh jang pơ gang apŭng plĕnh teh.

Thuem: Tơ blơ̆