VOV4.Bahnar - Năr lêh ‘nhot sa iŏk đei jơnei gĭt kăl tĕh đak, twodrong pơgơ̆r pơdă păng pai sa 100 ‘nhĕm ‘nhŏt ‘lơ̆ng đơ̆ng ‘nhot-ƀum-plei păng pơkao Đà Lạt đei pơgơ̆r lơ̆m năr blŭng khei 4/2021 gô jing tơdrong pơgơ̆r gĭt kăl hlŏh,pơ̆ih blŭng ăn pơgơ̆r kơkŭh chơt hơ iă Festival Pơkao Đà Lạt sơnăm 2021. Jô̆ trŭh năr 15/3/2021, tơdrong pơgơ̆r au hlôi hơvơn đei lơ bơngai vang pơlong ‘nŏh bơngai pai por ‘nhot, chĭh hơnăn apĭnh vang pai hlŏh 100 kơ loăi ‘nhĕm ‘nhot; lơ̆m au lăp hơdrô̆ bơngai pai gŏ tơ̆ Lâm Đồng, đei 77 ‘nu bơngai đơ̆ng Đà Lạt, 17’nu bơngai đơ̆ng rim apŭng; pă dôm yơ ‘nŏh đơ̆ng rim dêh char, pơlei tơm lơ̆m tĕh đak. Dôm bơngai chĕp gŏ au ư̆h khan lăp hơdrô̆ đơ̆ng dôm bơngai chĕp gŏ tơ̆ rim hnam et sa tih, hơnih et sa păh ai; mă lei oei đơ̆ng rim hnam trương pơtho tơdrong jang, hơnih pơm tơlĕch tơmam drăm ... Tơdrong pơgơ̆r “100 ‘nhĕm ‘nhot sa đơ̆ng ‘nhot păng pơkao Đà Lạt” kơ yuơ Khŭl tơmang pơ hiơ̆ Lâm Đồng - Đà Lạt (LDTA) pơgơ̆r, jing jơ rơvơn vă chă tơ ƀơ̆p, hŏk pơhrrăm dih băl tơdrong pai por ‘nhot đơ̆ng rim bơngai chĕp gŏ jơ̆p tơring; adoi nhen tơ ƀô̆h tơbăt păng tơdrong mơ̆t lĕch ‘nhot-ƀum-plei păng pơkao Đà Lạt”.

Tơblơ̆ nơ̆r: Amazưt