VOV4.Bahnar - ‘Nhot hơnuh xoh kơđoh prit pai hăm rơhŭng (tơneh) păng tơƀăng iŭ jing minh lơ̆m dôm tơmam xa ƀenh kơ um ai juăt jue kơ bơngai M’nông. Atŭm hăm dôm tơmam pai nhen lĕ ưh kơ ƀlep hăm bơngai M’nông noh pai pơjing đei hê̆ tơmam xa ‘lơ̆ng nham, ƀâu phu păng ‘lơ̆ng hăm jơhngơ̆m jăn...

Hrei âu, lơ̆m tơdrong erih kon pơlei M’nông duh oei vei tơdrong juăt, đon lăp pai ‘nhot xa atŭm hăm hơnuh xoh. Mă kăl noh hơbuh xoh đơ̆ng kơđoh prit xơ̆k hrăng.

‘Nguaih kơ hơnuh kơđoh prit, ‘nhot xa ưh gơh kơƀah 2 tơmam kăp gĭt noh plei rơhŭng păng tơƀăng iŭ đei pai hăm ‘nhĕm kơting. Rơhŭng noh athei iŏk plei hơdrih dăh mă pơtơm đum. Rơhŭng chet lê̆ kơđoh, chet klat hơtăng păh ai, ôp mă rơgoh kơtăk. Tơƀăng iŭ kơ bơngai M’nông hơnơ̆ng tong đunh năr, iŭ mrŭnh. Yuơ noh, ăh pai ‘nhot mă âu, tơƀăng iŭ athei ôp păng tơpĕt đak mă hrăng vă hăp da ƀiơ̆ kơ iŭ. Bơngai M’nông iŏk hơnuh prit tăh lơ̆m đak, đang kơ noh hơdrei iŏk lê̆ dih hlăng. Găh đak hlŏng noh đei kơmâu dreng dăh mă pơnĭk hơnuh xoh kiơ̆ kơ đak mă lŭk lơ̆k đơ̆ng blŭng.

Bơngai M’nông akhan, đak hơnuh đơ̆ng kơđoh prit pơm ăn dôm tơmam nai lơ̆m ‘nhot xa tenh xĭn klĭ hloh păng mă hơtuch noh tăh ƀoh ƀôh ngok âu to. Adrol ki, bơngai M’nông hơnơ̆ng iŏk lơ hơnuh xoh vă hlŏng iŏk đak ƀăt hloh pai pơtăl kơ tăh ƀoh. Hrei âu, bơngai M’nông ‘nguaih kơ yua hơnuh xoh vă pơjing ƀăt kăp gĭt hăm tơmam xa noh noh đe oei yua ƀoh, ƀôk ngok, hat nêm. Hăm ‘nhot hơnuh xoh kơđoh prit pai hăm rơhŭng păng tơƀăng iŭ, bơngai M’nông oei peh ƀoh hơmrĕ vă tăh atŭm. Tŏ xĕt ƀoh, ƀôh ngok atŭm hăm hơmrĕ tŭl hĕch đang kơ noh tăh lơ̆m tơƀăng. Hơnơ̆ng noh bơngai M’nông gô tăh lơ hơmrĕ hloh lơ̆m tơƀăng xa âu.

Hăm bơngai M’nông, tơƀăng xa âu noh nham ‘lơ̆ng păng rơklĭ noh mă ‘lơ̆ng. Kơting ‘nhĕm đei pai klĭ vă hăp nham răh hơ̆ răh, iŭ đei, ƀăt đei mă lei ưh đei rơhat. Tơƀăng xa đei pai đơ̆ng hơnuh xoh kơđoh prit kro jing tơmam xa ‘lơ̆ng, nham, ‘long hăm jơhngơ̆m jăn juăt jue kơ bơngai M’nông lơ̆m tơring kơ dêh char Đak Nông.

Lan chih păng pơre nơ̆r