VOV4.Bahnar - Việt Nam oei pơ gơ̆r ƀet vắc xin tang găn jĭ Covid-19 tơ̆ 1, 2 dêh char, plt đei jĭ păng hơ met đei jĭ tơ pŏh. Tơ̆ hơ năp kơnh, vắc xin gô đei chơ pơ truh ăn đĭ đăng dêh char, plt lơ̆m tĕh đak. Vă băt hơ dăh ƀiơ̆ găh vắc xin tang găn jĭ Covid-19, tơ drong đei yoa, tơ drong sơ đơ̆ng kŭm nhen dôm tơ drong kăl kơ băt mưh ƀet bơ̆ng jĭ, nhôn tơ gĕch pơ ma nuh hăm ƀak si Trịnh Quang Trí, Kơ dră Anih vei lăng tơ drong jĭ jăn dêh char Dak Lak.

- Ƀak si ăi, apĭnh ih rơ tơ băt mă rơ đăh găh kơ loăi vắc xin tang găn jĭ Covid-19 oei pơ gơ̆r ƀet dang ei tơ̆ Việt Nam năng?

-Ƀak si Trịnh Quang Trí: Hrei ‘nâu, tơ drong ‘mĕh vă đei vắc xin Covid-19 tôch lơ mă lei ưh đei anih pơ truh tôm yoa thoi nŏh lăp pơ gơ̆r ƀet ăn 1 kơ sô̆ bơ ngai krê tơ pŏh đĕch. Vắc xin tang găn jĭ Covid-19 oei yoa dang ei ‘nŏh đơ̆ng anih AstraZeneca yoa tĕh đak Anh pơm, đei yoa ăn rim bơ ngai đơ̆ng 18 truh 65 sơ năm, ưh đei jĭ pơ lŏ, tŏ hơ kâu, dăh mă đei dôm tơ drong jĭ găh plei nuih...

- Dôm tơ drong blơ̆ pơ gang đei ƀôh thoi yơ đơ̆ng rŏng kơ ƀet păng athei tơ rĕk truh tơ drong kiơ mưh ƀet vắc xin Covid-19, hă ƀak si?

-Ƀak si Trịnh Quang Trí: Kŭm nhen dôm kơ loăi vắc xin nai, vắc xin tang găn jĭ Covid-19 mưh đei ƀet lơ̆m hơ kâu jăn ƀât lăp sư pơm ăn hơ kâu blơ̆ pơ gang nhen: pơ ‘ngiĕh ƀât anih ƀet, jĭ kơ̆l, yuh, lap, ich chroh… Hăm dôm tơ drong blơ̆ dêh ƀiơ̆ dang ei tam đei ƀôh hơ dăh. Lơ̆m apŭng plenh tĕh hlôi iŏk yoa hlŏh 500 triu kơ liêu vắc xin tang găn jĭ Covid-19 đơ̆ng dôm anih pơm pơ gang pha ra băl, mă lei gơ̆h pơ ma dôm kơ loăi vắc xin âu sơ đơ̆ng ‘lơ̆ng ngăl.

Athei băt mưh ƀet vắc xin Covid-19 athei ƀet đunh kơ dôm ‘măng ƀet vắc xin nai tŏ sĕt hlŏh ‘nŏh 2 giĕng. Vắc xin đei ƀet tơ̆ ti, 1 ‘măng ƀet ‘nŏh 0,5ml păng ƀet 2 kơ liêu, 1 kơ liêu đunh băl 12 giĕng. Ƀet tôm 2 kơ liêu ‘nŏh gơ̆h vei lăng hơ kâu jăn đơ̆ng 70-80%. Pha hăm tơ drong ƀet tang dôm kơ loăi vắc xin nai, ƀet vắc xin Covid-19 lăp ƀet tơ̆ dôm anih jang pơ gang đĕch, 1 ‘măng ƀet tôch ai ‘nŏh 50 ‘nu. Adrol kơ ƀet, bơ ngai ƀet gô đei kăn ƀô̆ jang pơ gang roi tơ ƀôh, khăm hơ len, sư chu ƀet ‘mơ̆i na đe ƀet. Đơ̆ng rŏng kơ ƀet gô đei hơ len năng tơ̆ hnam pơ gang 30 pơ nĭt, đang kơ ‘nŏh athei hơ len năng jơ hngâm pran kơ dih tơ̆ hnam đơ̆ng 24 - 48 jơ. Dôm anih jang pơ gang hơ nơ̆ng răp mơ̆ng điên thoăi đơ̆ng kon pơ lei krao, tơ roi găh pơ gang blơ̆ đơ̆ng rŏng kơ ƀet vắc xin Covid-19.

- Trong vă pơ gơ̆r ƀet vắc xin tang găn jĭ Covid-19 tơ̆ Dak Lak thoi yơ hă ƀak si? Bơ̆n hăm đei tơ ƀâp tơ drong mơ mat tat kiơ mưh pơ gơ̆r ƀet ưh?

-Ƀak si Trịnh Quang Trí: Tơ chĕng adrol hơ tuch khei 4 âu kơnh vă pơ gơ̆r ƀet vắc xin tơ̆ dêh char. Mưh đei vắc xin vă pơ gơ̆r ƀet ăn dôm bơ ngai kiơ̆ tơ drong Tơ chơ̆t 21 đơ̆ng Khul kơ dră tĕh đak ‘nŏh jĭ bơ ngai bơ̆ jang tơ̆ dôm anih jang pơ gang, kăn ƀô̆ jang pơ gang vang tang găn jĭ, khul bơ ngai chă hơ len tơ drong jĭ, khăm hơ len jĭ ‘nŏh jĭ grŭp kơ sô̆ 1 kăl đei ƀet hơ drol. Đơ̆ng rŏng kơ ‘nŏh jĭ công an, khul linh; thây kô, dôm bơ ngai bơ̆ jang đa tơ ƀât lơ bơ ngai… Mưh đei tôm vắc xin ‘nŏh vă ƀet ăn dôm grŭp bơ ngai kiơ̆ tơ drong hơ găt kăl tơ gŭm ƀet hơ drol.

Mơ mat tat mưh pơ gơ̆r ƀet vắc xin tang găn jĭ Covid-19 ‘nŏh jĭ kơ măy pơm tơ ngiĕt vă ‘măn răk vắc xin. Lơ vắc xin athei ‘măn răk hlŏh âm đô̆, oei kơ măy ‘măn răk hrei ‘nâu oei yoa dang 28 đô̆ C.

Anih vei lăng tơ drongjĭ jăn hlôi pơ jing trong jang păng hơ met kơ măy tơ ngiĕt vă pơm ‘lơ̆ng ăn tơ drong ƀet vắc xin Covid-19.

Lei ah, bơ nê kơ ih ƀak si hơ!

Pơ tho pơm kiơ̆ 5 Nơ̆r tơ băt tang găn jĭ đơ̆ng Anih tơm vei lăng jang pơ gang

-Che gom: Athei iŏk che gom, gom muh măt mă hơ nơ̆ng tơ̆ anih kơ drâm bơ ngai lơ̆m tơ pôl, gom muh măt hăm che gom tang găn jĭ tơ̆ dôm hnam pơ gang, anih ăn oei hơ drô̆.

-Pruih pơ gang pơ lôch pơ rang jĭ: Hơ nơ̆ng ôp ti hăm sơ ƀŏng mă ưh ‘nŏh đak pơ gang pơ lôch pơ rang jĭ. Vei rơ gŏh rim tơ mam đa chĕp ba, pel hăm ti nhen (‘long hơ boch ‘măng, điên thoăi, kơ măy tĭnh, kơ ƀang, tang dŏ…). Vei rơ gŏh, ôp hơ met păng pơih ‘măng hnam rơ hơi, rơ gŏh gơ glang.

-Dơ̆ng hơ tăih băl: Athei dơ̆ng hơ tăih băl mưh tơ ƀâp, pơ ma nuh hăm bơ ngai nai.

-Ưh gơ̆h pơ gơ̆r ngôi hơ dai kơ drâm bơ ngai.

-Chih tơ roi găh hơ kâu jăn: pơm kiơ̆ tơ drong chih tơ roi găh hơ kâu jăn tơ̆ App NCOVI; kai iŏk BlueZone tơ̆ anĭh https://www.bluezone.gov.vn vă gơ̆h iŏk đei nơ̆r roi tơ băt tơ dăh ƀôh krê tơ pŏh jĭ COVID-19.

Mưh ƀôh hơ kâu yuh, hiĕn, dui jơ hngâm mơ mat jăh krao kơ sô̆ điên thoăi kăl kơ Anih tơm jang pơ gang 19009095 mă ưh ‘nŏh kơ măy điên thoăi kăl tơ̆ tơ ring vă gơ̆h iŏk đei nơ̆r roi tơ ƀôh, tơ gŭm, pơ tho năm khăm sơ đơ̆ng ‘lơ̆ng.

Athei vei sơ đơ̆ng ăn boăl păng đĭ đăng bơ̆n tơ̆ hơ năp tơ drong jĭ COVID-19.

Dơ̆ng: Tơ blơ̆