VOV4.Bahnar - Tơ̆ hơ năp tơ drong krê hơ mơt đơ̆ng jĭ COVID-19, vă kơ chăng chă ƀôh F0 lơ̆m tơ pôl, Dơ nŏ anih vei lăng kon pơ lei pơ lei tơm (plt) Buôn Ma Thuột, dêh char Dak Lak tơ lĕch trong set hơ len hrĕnh pơ rang jĭ SARS-CoV-2 tơ̆ plt ‘măng mă 2.

Plt Buôn Ma Thuột vă test hrĕnh ăn kon pơ lei

Kiơ̆ kơ ‘nŏh, plt vă test hrĕnh pơ rang jĭ ăn 16 xăh, phương đei jĭ krê hơ mơt khei ‘năr âu ki, đei: phường Ea Tam, Tân Tiến, Tự An, Tân Lợi, Tân Lập, Tân An, Thắng Lợi, Tân Hòa, Thành Nhất, Thành Công, Tân Thành, Thống Nhất, xăh Cư Êbur, xăh Hòa Thuận, Hòa Thắng păng xăh Ea Tu.

Khei ‘năr pơ gơ̆r đơ̆ng ‘năr 06/11 păng pơ tôch adrol kơ ‘năr 9/11/2021. Vă bơ̆ jang trŏ jơ năr, plt pơ jing 204 grŭp set hơ len jĭ, 1 grŭp set hơ len ăn dang 500 ‘nu 1 năr. Tơ drong set hơ len bơ̆ jang kiơ̆ trong “lôm hơ kok”, 1 unh hnam gô đei set hơ len ưh gơ̆h hlŏh 3 ‘nu vă tơ mât hơ dai lơ̆m 1 kơ mẫu.

Dơ̆ng: Tơ blơ̆