VOV4.Bahnar - Gơ măng ‘năr 19/12, tơ̆ cham gre păr Nội Bài hlôi pơ gơ̆r pơm Lêh pơ jao vaccine, kơ măy kơ mŏk, tơ mam pơm pơ gang păng jên ăn rim anih jang, anih mơ dro sa kơ Việt Nam. Tơ̆ lêh pơ jao, Phŏ Thủ tướng teh đak Lê Minh Khái păng Tổng Thư ký Kuôk hô̆i, Kơ dră vei lăng anih jang Kuôk hô̆i Bùi Văn Cường hlôi pơ jao vaccine, tơ mam kơ măy kơ mŏk jang pơ gang, jên yua đơ̆ng rim anih jang mơ dro sa Hàn Quốc păng Ấn Độ asong Việt Nam ƀlep ƀơ̆t ‘măng năm bơ̆ jang đơ̆ng kơ dră Kuôk hô̆i ăn Anih tơm vei lăng găh jang pơ gang, Anih jang Trung ương Mặt trận Tổ quốc Việt Nam. Mă hơ dăh ‘noh, pơ jao 200.000 kơ liêu vaccine COVAXIN ăn hơ ioh hơ la kơ 18 sơ năm yua đơ̆ng Grŭp jang Bharat Biotech (Ấn Độ) tơ gŭm.

Pơ jao vaccine, kơ măy kơ mŏk, tơ mam pơm pơ gang păng jên

Pơ jao pơ đĭ kơ măy kơ mŏk păng 1 tấn tơ mam pơm tơ lĕch 4.750.000 găr pơ gang MOVINAVIR hơ met COVID-19 yua đơ̆ng kŏng ti Optimus Pharma (Ấn Độ) jang hơ dai hăm Kŏng ti pơm pơ gang Mekophar (Việt Nam). Pơ jao 2 ti Won (dang 40 ti hlak jên) yua đơ̆ng Grŭp jang jên hu Hana (Hàn Quốc) tơ gŭm kŭm hăm Anih mong jên mơ dro sa tơ mơ̆t jên jang păng hơ tŏk tơ iung Việt Nam (BIDV) vă tơ lĕch jang rim tơ drong jang vei sơ đơ̆ng tơ drong arih sa tơ pôl.

Thuem: Tơ blơ̆