VOV4.Bahnar - Tơ̆ ‘măng hop akŏm Anih pơ gơ̆r Teh đak tang găn jĭ Covid-19 ‘nao pơ gơ̆r hơ tuch giĕng âu ki, Phŏ Tướng Vũ Đức Đam athei rim tơ ring kăl tơ lĕch jang hloi điên thoăi kăl, rim khŭl jang pơ gang tơ pôl truh tơ̆ rim tơ ring kon pơ lei oei vă gơh băt, dăr hơ len, tơ gŭm jang pơ gang kơ tă anih ăn kon pơ lei hơ yơ đei bôh tơ drong jĭ jâu jĭ Covid-19 păng dôm tơ drong jơ hngơ̆m jăn nai hai.

Truh dang ei, yŏng jĭ tơ plih ‘nao Gamma hlôi đei tơ̆ 81 teh đak păng yŏng jĭ tơ plih ‘nao Delta tơ̆ 142 teh đak. Anih tơm vei lăng găh jang pơ gang hơ len lăng, hăm yŏng jĭ tơ plih ‘nao Delta, jĭ hơ buh tŏk bŏk tơ plih krê hơ mơt, đei ƀôh kơ tang, tơ poh lanh nhĕnh păng pơm ăn lôch lơ tơ̆ lơ teh đak lơ̆m apŭng plĕnh teh, mă loi ‘noh jĭ tơ ring Đông Nam Á. Tơ̆ Việt Nam, ‘măng đei ƀôh jĭ mă 4 âu, lơ̆m teh đak đei hloh 243 rơ bâu, lơ̆m noh tơ̆ pơ lei tơm Hồ Chí Minh đei hloh 137 rơ bâu ‘nu jĭ. Anih tơm vei lăng găh jang pơ gang akhan: jĭ hơ buh rŏ lăng gô pơ dui đunh, mă loi ‘noh jĭ tơ̆ pơ lei tơm Hồ Chí Minh păng rim tơ ring găh pơ băh. 1,2 dêh char đei hơ mơt kơ ƀôh jĭ hơ lơ̆k dơ̆ng, tơ hli truh jơ hngơ̆m pran, hơ kâu jăn kon pơ lei, pơm ư̆h kơ ‘lơ̆ng tih truh hơ tŏk tơ iung mŭk drăm – tơ pôl.

Lăng băt đơ̆ng pơ lei tơm Hồ Chí Minh păng rim tơ ring găh pơ băh ăn ƀôh, tơ drong tơm pơm ăn đơ̆ng tơ poh lanh hrĕnh đơ̆ng jĭ ‘noh jĭ pơm kiơ̆ ư̆h kơ hret tơdrong ư̆h kơ ăn yak vih vơ̆t lơ̆m tơ pôl kiơ̆ tơ chơ̆t 16. 1,2 anih jang, anih mơ dro sa păng 1,2 ‘nu kon pơ lei oei pơm pơ hơi, ư̆h kơ chăng, oei chă ngôi, pơ ma dơ nuh hăm băl, tam măngôi hơ tăih băl đơ̆ng hnam hăm hnam lơ̆m hơ nih pơ vang găn. Tơ roi dơ̆ng găh tơ drong hơ len lăng, Kơ dră Anih tơm vei lăng găh jang pơ gang Nguyễn Thanh Long tơ băt:  

         “Tơ drong kăl chă ƀôh roi hrôih gô tơ jur đei, ăn oei hơ drô̆ đei tơ jur anih tơ poh, nhen hơ len lăng tơ̆ rim tơ ring, trung ương lăp pơ tho tơ drong kăl, tơ̆ tơ ring hlôi đei khŭl jang vă hơ dai hăm tơ ring pơ jing hơ len lăng pơm lăp hăm đĭ đăng rim tơ drong ‘mĕh vă. Tơ drong kăl athei tơ klăh iŏk F0 lĕch đơ̆ng tơ pôl, thoi noh mă tơ jur tơ drong tơ poh lơ̆m tơ pôl”.

          Tơ̆ ‘măng hop akŏm, rim bơ ngai jang kơ Anih pơ gơ̆r jang, tơ roi hơ dăh hlôh vao tih hloh tơ̆ rim tơ ring ăn ƀôh mă hơ drol athei vei lăng kơ jăp tơ ring sơ đơ̆ng, hơ dai hăm ‘noh pơ vang găn tơ ring hơ mơt lơ, tôch kơ lơ; lơ̆m pơm kiơ̆ ư̆h kơ ăn yak vih vơ̆t lơ̆m tơ pôl kiơ̆ tơ chơ̆t 16, rim tơ ring kăl hơ tŏk tôch ai hơ năp jang đơ̆ng rim khŭl jang, grŭp tơ pôl, grŭp COVID-19 tơ pôl, đĭ đăng kon pơ lei, tơm ‘noh jĭ khŭl kŏng an, vă “ năm tơ̆ rim trong, tơ teh rim hnam, hơ len lăng rim bơ ngai”, băt hơ dăh đĭ đăng dôm bơ ngai đơ̆ng tơ ring nai brŏk, sek phak tơ păt dôm bơ ngai ư̆h kơ tơ roi tơ băt ăn khŭl jang pơ gang dăh mă ư̆h kơ tơ păt.

Khŭl jang pơ gang ‘noh đei ya ƀak si, thây kô pơ tho hŏk găh tơ drong jang pơ gang, sinh viên y khoa…năm jang tơ gŭm đơ̆ng tơ ring găh pơ tu ‘nao păr năm tơ gŭm pơ lei tơm Hồ Chí Minh tang găn jĭ Covid-19

         Kiơ̆ kơ Phŏ thủ tướng Vũ Đức Đam ƀơ̆t hlôi jang kiơ̆ ư̆h kơ ăn yak vih vơ̆t lơ̆m tơ pôl athei vei sơ đơ̆ng ƀlep tơ drong “bu oei tơ̆ yơ oei dơ nơ̆ng tơ̆ noh”. Hăm tơ drong jang hơ len lăng, đei tơ drong 1,2 tơ ring iŏk yua hơ len lăng hrĕnh, ‘nhoen hơ len lăng RT-PCR, yua thoi noh, Phŏ thủ tướng athei tơ drong jang hơ len lăng athei đei kăl, vei sơ đơ̆ng khoa hŏk, đei yua. Rim tơ ring kăl akŏm bơ ngai jang lơ hloh ăn rim tơ̆ng hơ met tơ̆ hơ la vă kâp kư̆u, hơ met pơ ‘lơ̆ng tơ tom dôm bơ ngai đei ƀôh jĭ ăl hrĕnh, đei tôm bơ ngai jang, pơ gang, oxi pơ gang, tơ mam kơ măy kơ mŏk kiơ̆ tơ drong hơ găt vă vei sơ đơ̆ng kơ sô̆ giơng hơ met tơ pă. Phŏ Thủ tướng Vũ Đức Đam pơ ma hơ dăh:

“Rim tơ ring athei pơ jing hloi điên thoăi kăl, rim khŭl jang pơ gang tơ pôl truh tơ̆ rim tơ ring kon pơ lei oei vă sơng iŏk, dăr hơ len, tơ gŭm pơ gang kơ tă anih ăn dôm kon pơ lei hơ yơ đei ƀôh tơ drong jĭ jâu jĭ  COVID-19 kŭm nhen rim tơ drong jơ hngơ̆m jăn nai, dêh char hơ yơ đei khŭl chă năm jang kăl pơ jing lơ hloh, rim tơ ring athei jô̆ hloi ư̆h kơ ăn yak vih vơ̆t ‘noh athei bơ ngơ̆t khŭl jang pơ jao tơ mam, mă khŭl pơ jao tơ mam dang ei ‘noh gĭt kăl hloh, rim dêh char dang ei kŭm athei bơ ngơ̆t trŭh khŭl pơ jao tơ mam ‘ngoăih kơ hơ len lăng, ƀet vaccine ‘noh gre athei lăng băt đei kŏng an athei lăng ƀôh ‘noh trŏ kơ bơ ngai jang pơ jao tơ mam. Tơ drong ‘noh athei hơ met ăn yua kơ ‘noh jĭ ƀai hŏk hlôh vao ‘lơ̆ng.”

          Lơ̆m tơ drong jang hơ met, Phŏ Thủ tướng Vũ Đức Đam akhan, lăng băt đơ̆ng pơ lei tơm Hồ Chí Minh păng 1,2 dêh char găh pơ băh ăn ƀôh; athei tơ klăh hơ drô̆ hơ nih sơng iŏk blŭng a hăm bơ ngai jĭ Covid-19 ư̆h kơ đei ƀôh tơ drong jĭ, tam mă đei lăng ‘noh jĭ bơ ngai jĭ, vă vei lăng mă lăp găh kơ chơ̆t bek ‘lơ̆ng, hơ kâu jăn, jơ hngơ̆m đon, tơ jur kơ sô̆ F0 đei ƀôh tơ drong jĭ.

Tơ̆ hơ năp tơ drong jĭ hơ buh tŏk bŏk đei ƀôh tôch kơ hrĕnh, kơ sô̆ bơ ngai jĭ COVID-19 ăl đei ƀôh roi tŏk, Kơ dră Anih tơm vei lăng găh jang pơ gang Nguyễn Thanh Long hlôi kĭ hla ar kăl gơ̆ih kơ rim anih jang pơ gang găh tơ drong hơ tŏk loi dơ̆ng pơ tho pơ hrăm hơ tŏk ‘lơ̆ng kĕ kâp kư̆u, hơ met bơ ngai jĭ ăl. Kiơ̆ kơ ‘noh, đĭ đăng rim anih jang pơ gang chih hơ năn, jăh pơ tho pơ hrăm hơ tŏk loi dơ̆ng tơ drong kĕ kâp kư̆u, hơ met bơ ngai jĭ ăl ăn rim y ƀak si. Hơ drol ‘noh, Kơ dră tơm Nguyễn Thanh Long kĭ tơ lĕch Tơ drong jang “ Hơ tŏk loi dơ̆ng kĕ kâp kư̆u, hơ met hơ ngei jĭ ăl ăn rim hnam pơ gang hơ met bơ ngai jĭ COVID-19 ăl" athei păng pơ jing 12 Hơ nih hơ met bơ ngai jĭ ăl COVID-19 teh đak đơ̆ng 200 - 3.000 tŏ giơng bơ ngai jĭ ăl ‘măn tơ̆ rim hnam pơ gang.

Vă pơ lung khŭl y ƀak si, bơ ngai jang pơ gang tơ gŭm ăn pơ lei tơm  Hồ Chí Minh păng rim dêh char găh pơ băh tang găn jĭ Covid-19, Tổng Liên đoàn Lao động Việt Nam hlôi tơ lĕch tơ drong tơ chơ̆t găh tơ drong tơ gŭm hơ tŏk loi dơ̆ng kơ chơ̆t bek ‘lơ̆ng ‘măng sŏng sa ăn khŭl jang pơ gang tang găn jĭ COVID-19. Kiơ̆ kơ ‘noh, bơ ngai đei sa yua ‘noh jĭ khŭl ƀak si, điều dưỡng, kang ƀô̆ jang pơ gang đơ̆ng rim hnam pơ gang trung ương păng sinh viên, bơ ngai hŏk pơ gang rim hnam trưng hŏk pơ gang găh Anih tơm vei lăng găh jang pơ gang ( păng rim tơ ring) đei ăn năm jang tơ̆ 19 dêh char, pơ lei tơm găh pơ băh tŏk bŏk jang kiơ̆ ư̆h kơ ăn yak vih vơ̆t lơ̆m tơ pôl kiơ̆ tơ drong tơ chơ̆t 16. Kơ sô̆ jên tơ gŭm đei kơ jă 1.000.000 hlak jên 1 ‘nu.

VOV 1

Thuem: Tơ blơ̆