VOV4.Bahnar - Tơ̆ Tây Nguyên, lơ tơring hlôi pơjing Hơnĭh soi tơbĕh Ƀok dơnơm  Hùng Vương. Rim sơnăm, Pơm lê̆h Soi tơbĕh Ƀok dơnơm Hùng Vương đei rim tơring pơgơ̆r ‘lơ̆ng rŏ. Đơ̆ng nŏh tơgop pơtho tơbăt tơdrong joăt joe “nhă đak chăm kơtu, băt ‘mêm bơnê kơtang rim rim Ƀok pơtao Hùng hlôi tơ iung pơjing tĕh đak păng rim mĭh ma nuih mơng tơblăh tang găn ayăt pơjei, vei lăng tĕh đak kơ jăp.

Đơ̆ng năr 20/4 – 21/4/2021, tơ̆ Hơnĭh gru gra gĭt kăl dăr sơnăm tĕh đak Đình Lạc Giao, kơsô̆ 67 trong Phan Bội Châu, pơlei tơm Buôn Ma Thuột, Dơnŏ anĭh vei lăng Jŏh ayŏ kơdŏ soang, Đă ƀŏng lŏng tơplŏng kơdau păng Tơmang pơ hiơ̆ jang hơdoi hăm Dơno anĭh vei lăng kon pơlei kơ pơlei tơm hăm rim hơnĭh đei ƀơm trŭh pơgơ̆r Pơm lê̆h Soi tơbĕh Ƀok dơnơm Hùng Vương 10 khei 3 sơnăm Tân Sửu 2021 vă yak trŭh Pơm lê̆h tĭh Ƀok dơnơm Hùng Vương. ‘Moi kiơ̆ rim tơdrong pơgơ̆r kơ Pơm lê̆h Soi tơbĕh Ƀok dơnơm Hùng Vương, hơlêm rim răih kon pơlei hưch hanh hơmanh bơnê pơting dĭh băl jang pran kơ tang, jang iŏk đei jơnei kơ jăp rim tơdrong jang, trong tơlĕch jang atŏk tơ iung muk drăm, jŏh ayŏ, oei sa, tơpôl.

Hơnĭh soi tơbĕh Ƀok pơtao Hùng tơ̆ Gia Lai.

Hlôi jing tơdrong joăt joe, năr 10/3 âm lĭch rim sơnăm, lơ kon pơlei dêh char Gia Lai păng rim dêh char tơ jê̆ hlôi năm sŏh hlôt nhang tơ̆ Hơnĭh soi tơbăt Ƀok dơnơm Hùng Vương tơ̆ Hơnĭh pơchơt pơ hiơ̆ Đồng Xanh (tơring An Phú, pơlei tơm Pleiku, Gia Lai) lơ̆m jơhngơ̆m đon hưch hanh đei vĭh hơlơ̆k tu so. Hơnĭh soi tơbĕh Ƀok dơnơm Hùng Vương tơ̆ hơnĭh pơchơt pơ hiơ̆ Đồng Xanh đei tơ iung pơjing hnam nhen pơbŭng rông Tây Nguyên kơ jung 18 met, găh lăm hơnĭh soi tơbĕh ‘nŏh rup Ƀok dơnơm Hùng Vương pơm ăn ‘long kơ jung 6 met, trăp 3 tân đei sơng băh măih, găh hơnăp hơnĭh au đei 18 Ƀok pơtao Hùng. 

Kiơ̆ đơ̆ng kơdră chĕp pơgơ̆r Kŏng ty Jŏh ayŏ kơdŏ soang-Tơmang pơ hiơ̆ Gia Lai: Lơ̆m năr 9/3 âm lịch, hơnĭh au pơm ƀĕng chĕng, ƀĕng yay, tơmam drăm doi tơbĕh ... vă tom ăn pơgê năr 10/3 glơng ba ăn mĕ ƀă yă ƀok dơnơm. Dôm sơnăm tơ jê̆ au, năr Soi tơbĕh Ƀok dơnơm Hùng Vương hlôi jing năr lê̆h kơ kon pơlei rim hơdrung kơ dêh char Gia Lai. Tôch kơ lơ ŭnh hnam ba kôn mon kon sau chă ngôi, mă kăl mĭnh ƀar hnam trương lơ̆m dêh char hlôi pơgơ̆r tơdrong jang vĭh ngôi kơtu so vă pơtho tơbăt ăn jơhnơr mơlô̆h, tơgoăt kơ jăp jơhngơ̆m đon hưch hanh hơmanh bơnê tĕh đak, jơhngơ̆m đon hưch hanh găh chăl sơnăm nuih mơng kơ hơdrĕch hơdrung.

Kon pơlei M’Nông vang pơm lê̆h Soi tơbĕh Ƀok dơnơm  Hùng Vương tơ̆ Dak Buso

Vang mơt hơdoi lơ̆m jơ ‘năr chơt hơ iă kơ lơ̆m tĕh đak, năr 10/3 âm lĭch rim sơnăm, kon pơlei rimn hơdrung tơring sơlam tĕh đak  Đak Buso, apŭng Tuy Đức, dêh char Dak Nông akŏm vĭh năm tơ̆ hơnĭh soi tơbĕh Ƀok pơtao Hùng đei pơjing hlôi pơjing đei rơvơn ăn kon pơlei rim tơring vĭh ngôi tơbăt jơhngơ̆m đon ‘mêm kơ eng kơ mĕ ƀă yă ƀok dơnơm. Hnam soi tơbĕh să hloh 250 m², đei ming man kiơ̆ hnam sơ̆ ki tŏk bŏk lơ̆m bri kông jơk ƀlĭk Tây Nguyên nuih mơng. Đĭ đăng kon jên ming man ‘nŏh kon pơlei chă tơra, lơ̆m au găh tĕh kơ yuơ mĭnh ŭnh hnam plang ăn. Ƀok Nguyễn Đình Lương oei tơ̆ thôn 6, tơring Dak Buso tơbăt, găh lơ kon pơlei oei tơ̆ au đơ̆ng Phú Thọ mơ̆t tơ̆ Dak Nông jang sa. Lĕch vĕh đơ̆ng pơlei so hlŏh 20 sơnăm kơ au, mă lei rim bơngai oei ƀlok hơdơ̆r trŭh năr Sŏh tơbĕh Ƀok dơnơm. Rim bơngai hlôi chă pơma dơnŭh dĭh băl, drơ̆ng mĭnh nơ̆r apĭnh kơdră tơring tơ iung pơjing Hơnĭh soi tơbĕh Ƀok pơtao Hùng.

Pơm lê̆h soi tơbĕh Ƀok dơnơm Hùng Vương lơ̆m năr 10 khei 3 rim sơnăm hlôi jing năr Tĕh đak soi tơbĕh kơ hơdrĕch hơdrung, jing jơhngơ̆m đon hơ iă pơjing đei jơhngơ̆m pran tơgoăt tơgoăl lơ̆m kon pơlei yak hlŏh lơ tơdrong mơmat tat hrat hrĭn, hli hlơt kơ tơblăh vang hrang tơ ƀet, tŏ ‘mi kial pơrăm, mơmat tat ..., hơmet pơ ‘lơ̆ng jơhngơ̆m đon lui kiơ̆ kơ jăp đơ̆ng kon pơlei vă atŭm dĭh băl lăng trŭh tơ̆ hơnăp, tơ iung pơjing tĕh đak Việt Nam roi năr roi pơdrŏng,pran kơtang ‘lơ̆ng liĕm hlŏh dơ̆ng.

Quốc Học chĭh hơkŏm

Tơblơ̆ nơ̆r: Amazưt