VOV4.Bahnar - Puăn dêh char lơ̆m tơ ring Tây Nguyên ‘nŏh Gia Lai, Kon Tum, Dak Lak păng Dak Nông tŏk bŏk tơ lĕch jang jăl jang 2 tơ drong jang ƀet vắc xin tang găn jĭ bạch hầu, kơ sô̆ ƀet bơ̆ng ‘nao đei hlŏh 80% jrŭm 1 păng hlŏh 50% jrŭm 2, oei tŏ sĕt hlŏh pơ têng hăm tơ drong hơ găt tơ lĕch ăn. Kiơ̆ kơ Anih jang Vệ sinh dịch tễ Tây Nguyên, khei ‘năr âu, rim dêh char Tây Nguyên ‘nao tơ lĕch jang ƀet vắc xin bạch hầu tơ̆ jăl jang 2, păng kơ sô̆ ƀet jrŭm 1 ‘nao đei hlŏh 84%, jrŭm 2 ‘nao đei hlŏh 50%. Gia Lai ‘nŏh jĭ đei ƀet vắc xin jăl jang 2 hiơ̆ hlŏh ƀơ̆t ‘nao đei 72% jrŭm 1 păng 5% jrŭm 2. Lơ̆m kơ plăh ‘noh, tơ dăh kiơ̆ ƀlep trong tơ lĕch jang, rim dêh char athei tŏk bŏk ƀet vắc xin bạch hầu jăl jang 3. Anih Vệ sinh dịch tễ Tây Nguyên akhan, tơ drong ƀet hiơ̆ ‘nŏh jĭ yua đơ̆ng lơ tơ drong tơm pơm ăn, nhen 1,2 tơ ring tam mă tơ pă bơ ngơ̆t truh, pơ tho ăn; jĭ tơ jur pơm ăn 1,2 ‘nu kon pơ lei pơm pơ hơi, ư̆h kơ jang kiơ̆ ƀet vắc xin; đei bơ ngai nai năm jang hơ tăih kơ na ƀơm ư̆h kơ ‘lơ̆ng trŭh tơ drong ƀet.

Thuem: Tơ blơ̆