VOV4.Bahnar - Tơ̆ tơ ring Tây Nguyên, Năr et soi kơ Hùng Vương sơ năm ‘nâu kŭm đei rim tơ ring pơ gơ̆r tih. Tơ̆ Lâm Đồng, năr et soi đei pơ gơ̆r lơ̆m 2 năr ‘năr 20 păng 21/4 (vă khan ‘năr 9 păng 10 khei 3 âm lịch) tơ̆ Hnam soi Âu Lạc – Hơ nih tơ mang lăng chơ kơi đak Prenn, Đà Lạt. Hăm hơ năn “ Atŭm 1 tơm a”, năr et soi đei lơ tơ drong jang ‘lơ̆ng hơ iă.

Hnam soi Âu Lạc tơ̆ kông Phượng Hoàng – Hơ nih tơ mang lăng chơ kơi đak Prenn

Hơ dai hăm tơ drong joăt et soi joăt joe, năm iŏk, pơ yơ̆r soi tơ mam, soh nhang tơ̆ Hnam soi Trung - Thượng - Hạ păng hnam soi Mẹ Âu Lạc; lơ tơ drong jang kŭm pơ gơ̆r ‘lơ̆ng hơ iă nhen: Hơ nih hơ ri hơ soang joăt joe, roi tơ ƀôh dôm tơ dra hơ ri kră sơ̆, pơ long cờ tướng, dôm tơ drong pơ chơt kră sơ̆, hơ nih tơ mam sa 3 tơ ring, pơ long pơ rŏ mâm tơ mam et soi, pơ rŏ pơ kao pơ yơ̆r ăn teh đak... Mă loi ‘noh, năr et soi sơ năm ‘nâu đei reh hơ ri tài tử Nam bộ đơ̆ng dôm bơ ngai hơ ri, reh truh đơ̆ng Anih jang găh jŏh ayŏ kơ dŏ soang dêh char An Giang.  

Anih vei lăng jŏh ayŏ kơ dŏ xoang, tơ plŏng kơ dâu păng chă tơ mang lăng dêh char ăn tơ băt, anih âu jang hơ doi hăm Dơ nŏ anih vei lăng kon pơ lei plt Buôn Ma Thuột păng dôm anih đei ƀơm truh pơ gơ̆r et soi kơ Ƀok Pơ tao Hùng, 10-3 sơ năm Tân Sửu 2021 lơ̆m ‘năr 20 păng 21/4/2021, tơ̆ Anih gru groa gĭt kăl kơ tĕh đak Hnam soi Lạc Giao (kơ sô̆ 67, trong Phan Bội Châu, plt Buôn Ma Thuột).

Lêh et soi kơ Ƀok Pơ tao Hùng 10-3 âm lịch rim sơ năm jing năr lêh kơ đĭ đăng hơ drĕch hơ drung, jing tơ drong tơm vă tưk tơ iung jơ hngâm pran đơ̆ng tơ guăt đĭ đăng kon pơ lei vang yak hlŏh dôm tơ drong mơ mat tat đơ̆ng khei ‘năr tơ blăh sơ̆, đơ̆ng tŏ ‘mi kial kơ nê̆; hơ met kơ jăp đon lui lơ̆m tơ pôl kŭm hăm băl năm truh ning mônh kơnh, pơ jing tĕh đak Việt Nam roi đunh roi pran pơ drŏng, ‘lơ̆ng rŏ. Tơ drong pơ gơ̆r lêh soi kơ Ƀok Pơ tao Hùng jĭ jơ năr vă pơ lung đĭ đăng kon pơ lei pơ jei băl bơ̆ jang, khŏm jang ‘lơ̆ng dôm tơ drong jang atŏk tơ iung mŭk drăm, jŏh ayŏ kơ dŏ xoang, tơ pôl kiơ̆ tơ drong tơ chơ̆t đơ̆ng Hop akŏm Đảng ƀô̆ dêh char ‘măng mă XVII. 

Đơ̆ng rŏng kơ Anih tơm vei lăng găh Joh ayŏ, tơ plŏng kơ dâu păng tơ mang lăng đei hla ar gơ̆ih kơ Anih vei lăng kon pơ lei dêh char Quảng Nam găh tơ drong pơ long lăng sơng tơ moi tơ mang lăng apŭng plĕnh teh đơ̆ng khei 7 truh khei 9/2021, âu ki, Kơ dră Anih vei lăng kon pơ lei dêh char Quảng Nam hlôi kĭ hla ar tơ̆l nơ̆r Anih tơm vei lăng găh jŏh ayŏ, tơ plŏng kơ dâu păng tơ mang lăng, pơm hla ar hăm Khŭl kơ dră teh đak ‘noh jĭ tơ ring pơ long lăng blŭng a kơ lơ̆m teh đak sơng tơ moi apŭng plĕnh teh năm tơ̆ Việt Nam tơ mang lăng sơ đơ̆ng hiôk. Kiơ̆ kơ ƀok Lê Trí Thanh, Kơ dră anih vei lăng kon pơ lei dêh char Quảng Nam, dêh char hlôi tơ lĕch trong jang hơ dăh, ƀơ̆t măt gô rơ̆ih tơ moi đơ̆ng Hàn Quốc năm ngôi pơ dơh tơ̆ Hơ nih pơ dơh ngôi akŏm Hoiana, tơ̆ apŭng Duy Xuyên păng Tui Blue Nam Hội An, tơ̆ apŭng Núi Thành, kiơ̆ cham gre păr Chu Lai, hăm trong rim ‘măng păr apŭng plĕnh teh kơ tă kiơ̆ ‘măng năm, jơ năr oei sa đơ̆ng 5 truh 10 năr. Kiơ̆ hơ len lăng yan âu, Anih vei lăng tơ mang lăng Việt Nam lăng Quảng Nam ‘noh jĭ tơ ring đei tôm tơ drong ‘lơ̆ng găh trong nơ năm, jang pơ gang, hơ nih pơ vih pơ văn tơ mang lăng... vă tơ lĕch jang pơ long lăng.

Thuem hăm Dơ̆ng: Tơ blơ̆