VOV4.Bahnar - Tơ̆ hop akŏm trư̆k tuyê̆n lơ̆m tĕh đak găh trong tang găn jĭ Covid-19 pơ gơ̆r ‘năr 29-5, Thủ tướng Phạm Minh Chính pơ ma hơ dăh athei akŏm đĭ jơ hngâm, bơ̆ jang tôch ai vă tang găn jĭ. Mă loi, Thủ tướng pơ ma hơ dăh dôm anih tơm, anih jang kơ pal athei hơ met pơ ‘lơ̆ng rim tơ drong mơ mat tat, tơ hlăk tăk ăn dôm tơ ring kiơ̆ jơ hngâm 3 ưh: ưh đei pơ ma nơ̆r ưh kơ măh jên ăn tơ drong tang găn jĭ; ưh đei pơ ma nơ̆r ưh kơ măh pơ gang, tơ mam pơ yoa ăn jang pơ gang vă tang găn jĭ; ưh đei pơ ma nơ̆r ưh kơ đei tôm trong tơ gŭm vă tang găn jĭ. 

 Pơ ma truh dôm tơ drong oei đei hrei ‘nâu, 1,2 tơ ring oei đei lơ tơ drong mơ mat tat, tơ drong jĭ oei tôch krê hơ mơt nhen tơ̆ Bắc Ninh, Bắc Giang păng 1 păh Hà Nội, ‘nao hlŏh jĭ anih đei jĭ tơ̆ pơ lei tơm (plt) Hồ Chí Minh. Hlŏh kơ ‘nŏh dơ̆ng, kơ loăi virus ‘măng mă âu krê hơ mơt ƀiơ̆ păng tang găn mơ mat ƀiơ̆ hai. Đei ƀôh tơ drong tơ pŏh đơ̆ng tơ pôl mât tơ̆ anih jang kơ măy păng hơ lơ̆k dơ̆ng, đei ƀôh jĭ tơ pŏh đơ̆ng tơ drong jang akŏm lơ bơ ngai, đơ̆ng năm hơ kŭm, Thủ tướng pơ ma hơ dăh găh tơ drong chĕp kơ̆l pơ gơ̆r bơ̆ jang mă ‘lơ̆ng, đei yoa; khŏm hơ met pơ ‘lơ̆ng mơ mat tat găh trong jang, tơ drong tơ gŭm, dôm tơ drong oei tơ hlăk tơ̆ anih tơm, anih jang kơ pal. Bơ̆ jang pran ‘lơ̆ng găh vắc-xin. Iŏk tang găn pơm tơm. Thủ tướng pơ ma, tơ̆ hơ năp kơnh, tơ drong bơ̆ jang vei lăng jơ hngâm pran, tơ drong arih kơ kon pơ lei oei jing tơ drong kăl hlŏh đĕch, mă loi ‘nŏh athei tang găn, hơ met klăih đĭ jĭ tơ̆ dôm tơ ring đei jĭ dêh nhen Bắc Giang, Bắc Ninh, kăl loi tơ̆ dôm tơ ring jang kơ măy păng plt Hồ chí Minh. Đon tơ chĕng mưh chĕp kơ̆l pơ gơ̆r ‘nŏh "tang găn jĭ nhen thoi tang găn hơ yăt:

“Kơ plăh dang ei athei tang găn rim tơ drong, bơ̆ jang đĭ jơ hngâm, kơ rŭn tôch ai, bơ̆ jang mă pran, đei yoa hlŏh dơ̆ng tơ̆ rim anih jang chinh trĭ păng đĭ đăng kon pơ lei hăm đon pơ hnŏng mă brĕ, bơ̆ jang mă kơ tang, đei yoa ƀiơ̆, khŏm găn, hơ met pơ đĭ dôm anih đei jĭ, jăh vei lăng ‘lơ̆ng dơ̆ng tơ drong sơ đơ̆ng. Bơ̆n athei hơ nơ̆ng kơ chăng hlôh vao, băt hơ dăh tơ drong tơ dra hơ drol, vang jang hơ doi mă ‘lơ̆ng, đei yoa kơ plăh tơ drong tang găn păng hơ met, kăl hlŏh jĭ tơ drong hơ met pơ klăih, tang găn athei bơ̆ jang đunh đai, hơ met athei jang khŏm klăih hloi, ưh gơ̆h lê̆ đunh. Ưh gơ̆h đei đon lăng pơ hơi, kŭm ưh gơ̆h hli tăr văr mưh đei jĭ, lê̆ kơ lao đon, lêl mưh đei jĭ kơnh jing đei tơ drong tơ chơ̆t ưh kơ lăp, ưh đei yoa.” 

Thủ tướng athei vei kơ jăp ki luơ̆t, pơ trŭt trong jang rơ gei lơ̆m tơ drong tang găn jĭ, hơ tŏk tơ drong dăr lăng, klăih song hơ năp jang vă dăr hơ len ƀônh. Jang răh, chih iŏk răh tơ drong kăl, tơ lĕch dơ̆ng trong jang hơ iă, đei yoa. Năng kăl tơ drong tơ roi tơ băt, krao hơ vơn kon pơ lei, đei trong vă kon pơ lei vang jang, vang pơ ma nuh, vang iŏk yoa dôm tơ drong jơ nei đơ̆ng tang găn jĭ. Rim bơ ngai athei đei đon vei lăng kơ dih, vei lăng tơ pôl, yoa tơ drong đei yoa kơ tĕh đak, kơ hơ drĕch hơ drung.

Găh dôm tơ drong jang, trong jang tơm, Thủ tướng pơ ma hơ dăh, athei lăng kiơ̆ rim tơ drong tơ̆ yăn âu, bơ̆ jang hrĕnh, tơ tom, tơ lĕch dôm tơ drong tơ chơ̆t, trong jang mă rơ đăh. Thủ tướng pơ ma hơ dăh, tơ̆ hơ năp dang ei, athei Phó Thủ tướng Vũ Đức Đam pơ gơ̆r atŭm găh tơ drong ‘nâu; Phó Thủ tướng Trương Hòa Bình hơ len năng chĕp kơ̆l pơ gơ̆r atŭm tơ̆ plt Hồ Chí Minh. Phó Thủ tướng Lê Văn Thành pơ gơ̆r jang tơ iung dơ̆ng tơ drong jang xa, tĕch mơ dro tơ̆ 2 dêh char Bắc Ninh, Bắc Giang ‘nŏh jĭ tơ ring jang kơ măy. Tơ̆ Hà Nội, Bí thư đảng Hà Nội Đinh Tiến Dũng iŏk chĕp kơ̆l pơ gơ̆r bơ̆ jang. Dôm anih jang athei klăih sơng tơ drong jang mă rơ đăh, đei yoa. Jang răh, chih iŏk răh dôm tơ drong kăl, ưh gơ̆h lê̆ đei tơ drong ưh tom băt, tơ hlăk tăk.

“Rim anih jang kơ pal athei bơ̆ jang mă tơ tom, hơ met pơ ‘lơ̆ng dôm tơ drong mơ mat tat ăn dôm tơ ring kiơ̆ trong “3 ưh”: ưh đei pơ ma nơ̆r ưh kơ măh jên ăn tơ drong tang găn jĭ; ưh đei pơ ma nơ̆r ưh kơ măh pơ gang, tơ mam pơ yoa ăn jang pơ gang vă tang găn jĭ; ưh đei pơ ma nơ̆r ưh kơ đei tôm trong tơ gŭm vă tang găn jĭ. Tơ dăh tơ drong kiơ tih, kăl vă jang hloi ‘nŏh athei tơ roi ăn Khul kơ dră tĕh đak.”

Thủ tướng athei tang găn đơ̆ng hơ tăih, đơ̆ng hrôih adrol kơ đei jĭ truh kiơ̆ nơ̆r tơ băt 5K + vắc-xin; iŏk yoa kơ măy kơ mŏk ‘nao lơ̆m tơ drong tơ chă, vei lăng, tang găn jĭ covid, đei trong tơ jră hăm dôm bơ ngai kơ chu, ưh ‘mĕh pơm kiơ̆ nơ̆r athei...; tang găn hrôih, chă ƀôh hrôih, ăn oei hơ drô̆ hrĕnh, hơ met jĭ mă ‘lơ̆ng, jăh vei lăng sơ đơ̆ng rim tơ drong. Vei lăng ‘lơ̆ng bơ ngai đơ̆ng tĕh đak đe truh păng bơ ngai mât oei xa glăi luơ̆t. Găh trong jang ƀơm truh vắc-xin, Thủ tướng athei jang kiơ̆ rim trong vă gơ̆h iŏk đei vắc-xin.

“Jơ̆p apŭng plenh tĕh hrei ‘nâu kăl đei vắc-xin ngăl kơ na tôch mơ mat vă gơ̆h gơ̆h iŏk đei vắc-xin mă lei ưh kơ sĭ yoa thoi nŏh mă bơ̆n hŭt hơ chăng hloi ôh. Athei chă trong, adrin pơm tơ lĕch pơ gang lơ̆m tĕh đak; tơ chă kơ măy kơ mŏk. Roi tơ băt găh tơ drong pơ gơ̆r ƀet vắc-xin kiơ̆ tơ drong pơ ‘nhŏ tơ gŭm hơ drol hăm dôm khul grŭp, tơ ring tơ rang hlôi đei tơ lĕch. Tơ blang mă hơ dăh vă kon pơ lei ƀet vắc-xin yoa ‘nâu jĭ trong tang găn ‘lơ̆ng hlŏh. Akŏm đĭ jơ hngâm ăn tơ drong tang găn jĭ, kăl hlŏh jĭ răt vắc-xin. Thủ tướng krao hơ vơn rim anih jang, tơ ring tơ rang, anih tĕch mơ dro, kon pơ lei vang tơ gop jên, đon rơ gei, trong jang hơ iă vă răt vắc-xin. Hơ nơ̆ng pơ jing Anih mong jên tang găn jĭ Covid-19.”

Găh tơ drong roi tơ băt, Thủ tướng pơ ma hơ dăh athei pơm ăn kon pơ lei hlôh vao trong jang đơ̆ng Đảng, khôi luơ̆t tĕh đak ƀơm truh tơ drong tang găn jĭ. Athei pơ tho ăn kon pơ lei vang jang hăm rim anih jang chinh trĭ, anih jang đảng, khul kơ dră tơ ring; vang tơ gŭm băl kơ plăh mơ mat tat, tơ iung jơ hngâm pran ăn kon pơ lei lui kiơ̆ tơ drong chĕp kơ̆l pơ gơ̆r đơ̆ng Đảng, tĕh đak; akŏm jơ hngâm pran đơ̆ng kon pơ lei vang tơ gop ăn tơ drong jang ‘nâu hăm tơ drong tơm ‘nŏh bơ̆ jang ‘lơ̆ng rim tơ drong, tôch đei yoa.

          Thủ tướng pơ ma hơ dăh, athei tơ iung đon rơ gei, kơ chăng, bơ̆ jang hơ bĕch hơ bal đơ̆ng anih jang đảng, khul kơ dră jơ̆p tơ ring hăm đon jang rơ gei đơ̆ng kon pơ lei. Đe kăn ƀô̆, anih jang, tơ ring tơ rang athei jang mă tơ tĕnh, đei yoa ‘lơ̆ng. Thủ tướng hơ pơi ‘mĕh păng lui tôch dêh, hăm tơ drong tơ gŭm đơ̆ng đĭ đăng kon pơ lei, bơ̆n gô jang đang ‘lơ̆ng tơ drong tang găn jĭ hơ buh âu.

Vũ Khuyên: Chih

Dơ̆ng: Tơ blơ̆