VOV4.Bahnar  – Thủ tướng teh đak bơ̆n Phạm Minh Chính 'nao pơkăl Anih tơm Y tê̆ pơgơ̆r, jang hadoi hăm dôm anih jang đei tơrĕk păng Anih vei lăng kon pơlei dêh char Thanh Hóa hăt hot hơlen, pơm hơdăh, xơkơ̆t tơdrong tơm đei răm đơ̆ng rŏng kơ ƀet vaccine bơ̆ng jĭ COVID-19 tơ̆ Thanh Hóa. Tơdrong răm đei tơ̆ Anih jang pơm chơkhŏ Kim Việt, apŭng Nông Cống, dêh char Thanh Hóa ăh năr 23 khei 11, pơm  4 'nu bơngai lôch đơ̆ng rŏng kơ ƀet vaccine bơ̆ng jĭ COVID-19. Thủ tướng teh đak pơkăl anih jang kơpal hơlen pơm hơdăh tơdrong đei ƀôh âu, xơkơ̆t tơdrong tơm, athei băt hơdăh đơ̆ng noh vă tơroi ăn Thủ tướng teh đak băt adrol kơ năr 30 khei 11. Thủ tướng pơkăl Anih tơm Y tê̆ jang atŭm kơjăp hăm dôm anih jang tơm nai, anih jang kơpal tơ̆ tơring, kiơ̆ xơnong jang đei pơjao vă vei xơđơ̆ng tơdrong kăl vei lăng vaccine bơ̆ng jĭ COVID-19 trŏ nhen tơchơ̆t, chiu pŭ xơnong tơlĕch ƀet vaccine bơ̆ng jĭ COVID-19 xơđơ̆ng, khoa hŏk, tơnăp lơ̆m jâ̆p teh đak.

Lan chih păng pơre nơ̆r