VOV4.Bahnar -‘Nao âu, pơ ma tơ̆ jơ tơ ƀơ̆p, bơ̆ jang hăm 70 ‘nu bơ ngai jang khoa hŏk; rim giáo sư, ƀak si; kơ dră chĕp kơ̆l, sơ̆ pơm kơ dră chĕp kơ̆l hnam pơ gang, hnam trưng đăi hŏk, anih jang tơ chĕng hơ len tơ drong jang pơ gang; bơ ngai tang măt rim khŭl jang khoa hŏk păng anih jang vei lăng khoa hŏk jang pơ gang, Thủ tưởng teh đak Phạm Minh Chính pơ ma hơ dăh: tơ drong vang tơ gop tôch kĭt kăl đơ̆ng anih jang pơ gang lơ̆m tơ drong vei lăng jơ hngơ̆m pran kơ kon pơ lei. Đảng, teh đak păng kon pơ lei băt bơ nê kơ khŭl jang khoa hŏk tơ drong jang pơ gang kiơ̆ rim khei ‘năr, mă loi ‘noh jĭ lơ̆m jĭ hơ buh Covid-19.

Pơ̆ih blŭng ‘măng tơ ƀơ̆p muh măt, Thủ tướng tơ ƀôh jơ hngơ̆m đon bơ nê, hơ dai hăm ‘meh vă răp mơ̆ng, chih iŏk dôm nơ̆r tơ gop hơ met ming mă lăp. Hloh kơ ‘noh, Thủ tướng tôch kơ meh đe thây, đe kô, đe bơ ngai jang khoa hŏk đei hlôh vao lơ̆m tang găn jĭ tơ chĕng hơ len, pơm tơ lĕch dôm kơ loăi pơ gang, vắc-xin tang găn jĭ Covid-19, kiơ̆ lơ̆m noh bơ̆n drơ̆ng nơ̆r đei trong jang mă lăp vă tang găn jĭ Covid-19. Thủ tướng ‘meh rim bơ ngai jang khoa hŏk ‘măn jơ năr vang tơ gop nơ̆r.

Tơ̆ ‘măng hop akŏm, lơ bơ ngai jang khoa hŏk pơ ma nơ̆r tơ gop păng tơ ƀôh jơ hngơ̆m đon hơ iă iŏk đei tơ drong bơ ngơ̆t truh, vang tơ gŭm đơ̆ng  Đảng, teh đak păng kon pơ lei; tơ ƀôh đon khŏm plang hơ kâu ăn tơ drong jang pơ gang teh đak, mă loi ‘noh jĭ lơ̆m khei ‘năr jĭ hơ buh Covid-19 dang ei, lơ bơ ngai jang khoa hŏk tŏk bŏk đei dôm tơ gop ‘lơ̆ng lơ̆m tơ drong jang tang găn jĭ hơ buh. Rim bơ ngai jang khoa hŏk tơ roi tơ băt kơ Thủ tướng teh đak dôm tơ drong hơ drin, pơ cheh hơ gei lơ̆m tơ drong hơ tŏk ‘lơ̆ng đei yua tơ drong jang hơ len lăng, rơ̆ih iŏk dôm F0, F1, vei lăng tơ ring jơk păng hơ met dôm bơ ngai jĭ F0 păng tơ lĕch ăn 1,2 nơ̆r apĭnh, athei vă hơ tŏk ‘lơ̆ng đei yua tơ drong jang tang găn jĭ. GS. TS Nguyễn Thanh Bình Kơ dră Jơ nŭm hnam trưng Đại học Dược Hà Nội akhan athei jang kiơ̆ kơ tang dôm trong jang mă khŭl kơ dră teh đak hlôi tơ lĕch ăn.

 “Găh tơ drong jang mă bơ̆n hlôi tơ mơ̆t yua đơ̆ng nơ̆r athei đơ̆ng Khŭl kơ dră teh đak, Anih tơm vei lăng găh jang pơ gang nhôn akhan tôch kơ ƀlep, bơ̆n hlôi akŏm lơ̆m tang găn jĭ păng hơ met jĭ; tang găn bơ̆n đei ăn oei hơ drô̆, 5k, bơ̆n hlôi tơ mơ̆t yua bơ̆ih. Bơ̆n đei vắc xin kŭm hlôi tơ lĕch jang; hơ met jĭ bơ̆n đei pơ gang.”

PGS. TS Lê Văn Truyền Kơ dră Jơ nŭm tơ roi tơ ƀôh asong hla ar chih măt ăn yua pơ gang jơ̆p jang, tơ mam pơm pơ gang ‘noh akhan bơ̆n athei hơ vơn bơ ngai jang rim kŏng ti pơm tơ lĕch pơ gang lơ̆m teh đak akŏm pơm tơ lĕch pơ gang hơ met covid.

“Bơ̆n athei hơ vơn kơ măy kơ mŏk pơ gang lơ̆m teh đak bơ̆n đei vă jê̆ 300 hnam kơ măy, hơ drin tơ chă tơ mam pơm tơ lĕch pơ gang hơ met  covid hlôi đei apŭng plĕnh teh drơ̆ng ăn.”

Pơ ma pơ tôch ‘măng hop akŏm, Thủ tướng Phạm Minh Chính pơ ma hơ dăh 2 tơ drong tơm ‘noh jĭ tơ drong tơ gop đơ̆ng rim bơ ngai jang khoa hŏk tơ drong jang pơ gang hăm tơ drong jang vei lăng jơ hngơ̆m pran kon pơ lei păng tơ gop ăn dôm tơ drong hơ drin tang găn jĭ hơ buh Covid-19 tơ̆ teh đak bơ̆n. Thủ tướng akhan tơ drong vang tơ gop tôch kơ tih tên đơ̆ng anih jang pơ gang hăm tơ drong jang tang găn jĭ Covid 19 tơ̆ teh đak bơ̆n lơ̆m vă jê̆ 2 sơ năm âu ki. Thủ tướng tơ băt, tơ drong tơm vă bơ̆n tang găn, jơ nei jĭ hơ buh rŏ lăng jang kiơ̆ ‘lơ̆ng 3 tơ drong tơm; Tơ drong hơ drin mă brĕ đơ̆ng pơ đĭ khŭl jang chĭnh trĭ; tơ drong lăp đon đơ̆ng kon pơ lei; tơ mơ̆t yua dôm trong jang khoa hŏk tang găn jĭ, krăng hiă hăm Vacxin păng dôm trong hơ met hơ dai hăm pơ gang. Anih jang pơ gang ‘noh tơm gĭt kăl lơ̆m tơ drong jang tang găn jĭ găh trong jang khoa hŏk tơ jră jĭ, vang tơ gop găh tơ chĕng hơ len, pơm tơ lĕch Vacxin păng pơ gang hơ met jĭ păng vang tơ gop găh hơ met jĭ.

Thủ tướng tơ ƀôh hơ dăh, vă jơ nei jĭ Covid-19 pơ ma hơ drô̆ păng jĭ hơ buh pơ ma atŭm, mă kăl hloh, khŭl kơ dră teh đak kăl tơ drong hơ drin hloh , kơ tang hloh dơ̆ng đơ̆ng khŭl rim bơ ngai joăt jang, bơ ngai jang khoa hŏk vă hơ tŏk tơ iung tơ drong jang pơ gang Việt Nam hơ tŏk tơ iung roi ‘lơ̆ng ‘nao. Lơ̆m noh athei băt hơ dăh tơ drong jang pơ gang đơ̆ng bơ̆n ‘noh jĭ tơ drong jang khoa hŏk, hơ drĕch hơ drŭng, tơ pôl, yua kơ kon pơ lei pơ vih pơ văn; jang pơ gang găn hiă hơ drol ‘noh tơm, jang pơ gang tơ ring tơ drong kăl; jang pơ gang hơ gei hơ tŏ hăm jang pơ gang tơ pôl; tơ klep hơ dai y học cổ truyền hăm y học chăl hle, linh hăm kon pơ lei jang pơ gang hơ dai, jang pơ gang lơ̆m teh đak hơ dai hăm jang pơ gang teh đak đe. Hăm khŭl jang khoa hŏk, Thủ tướng athei:

“Tơ̆ hơ năp tơ drong ưh kơ đei lơ vắc xin păng pơ gang hơ met covid-19 dang ei ‘noh athei rim bơ ngai jang khoa hŏk, rim bơ ngai joăt jang tơ gĕch yua tôch ai tơ drong jang hơ dai hăm khŭl jang rim bơ gai jang khoa hŏk, rim khŭl jang khoa hŏk lơ̆m apŭng plĕnh teh vă tơ chă dôm hơ nih pơ truh vắc xin, pơ gang hơ met covid-19 ăn Việt Nam păng pơ tho khăm hơ met jĭ covid- 19 ăn kon pơ lei ‘moi kiơ̆ dôm hla ar chih kơ tơ̆ng ang tơ pôl.”

Mă loi ‘noh jĭ lơ̆m tơ drong jang tơ roi tơ băt Thủ tướng athei, rim bơ ngai joăt jang, rim bơ ngai jang khoa hŏk kăl tơ gŭm tơ pôl vă tơ roi ƀlep, khoa hŏk găh dôm trong jang lơ̆m tang găn jĭ hơ buh.

“Rim bơ ngai joăt jang, rim bơ ngai jang khoa hŏk hơ tŏk hloh dơ̆ng hơ năp jang păng bưng ai đơ̆ng kơ dih lơ̆m tơ gŭm tơ pôl rim tơ drong kơ tơ̆ng ang tơ roi tơ băt vă tơ roi jơ̆p jang, tơ blang hơ dăh hăm kon pơ lei găh tơ drong lăng khoa hŏk đei dôm trong jang tang găn jĭ hơ buh đơ̆ng bơ̆n, tơ drong ‘nâu ‘noh ưh kơ đei bu tơ roi lăp dang đe thây đe kô ôh. Ĭnh tôch kơ ‘meh đe thây pơm liơ ăn kơ kon pơ lei băt. Mă 2 ‘noh jĭ pơm liơ ăn kon pơ lei hlôh, mă 3 pơm liơ ăn kon pơ lei lui. Tơ drong mă 4 ‘noh pơm liơ ăn kon pơ lei tơ gŭm jang kiơ̆, mă 5 ‘noh kon pơ lei vang jang. 5 tơ drong ‘nâu ‘noh athei rim đe thây đe kô vang hơ dai băl hlôi jang bơ̆ih, ‘meh vă đe thây đe kô jang lơ hloh pran kơ tang hloh dơ̆ng”.

Thủ tướng ‘meh vă rim bơ ngai, khŭl grŭp rim bơ ngai joăt jang, bơ ngai jang khoa hŏk lơ̆m tơ drong jang pơ gang lơ̆m păng ‘ngoăih teh đak, hơ tŏk tơ drong joăt joe đơ̆ng sơ̆ păng hăm tơ drong hlôh vao, tơ drong đĭ jơ hngơ̆m, jang tơ năp hơ nơ̆ng 1 jơ hngơ̆m đon, hăm dôm tơ drong jang kơ tang, ‘lơ̆ng, đei yua, hơ drin kŭm hăm lơ̆m teh đak jơ nei jĭ hơ buh Covid-19, vei lăng hơ nâu jăn, jơ hngơ̆m pran ăn Kon pơ lei, jăh hơ nhăk tơ drong arih sa hmă hơ lơ̆k dơ̆ng păng tơ iung ming, hơ tŏk tơ iung mŭk drăm - tơ pôl.

VOV 1

Thuem: Tơ blơ̆