VOV4.Bahnar - Hrei ‘nâu vă rim dêh char lơ̆m tơ ring tĕh tơ măn đak krong Cửu Long hlôi đei trong ƀet vắc xin ăn đe ŏh hŏk tro. Lơ̆m tơ drong tơ lĕch jang, dôm dêh char năng kăl truh tơ drong khăm hơ len, pơm ‘lơ̆ng ăn bơ ngai đei ƀet. 

Pơ tơm đơ̆ng ‘năr 3/11, Kiên Giang pơ gơ̆r ƀet vắc xin ăn hlŏh 13.300 ‘nu hŏk tro lăm 12, jô̆ hloi hŏk tro hŏk ƀô tŭk lơ̆m dêh char. Đe ŏh hŏk tro lăm 12 gô đei ƀet lơ̆m 1 năr păng ƀet pơ tôm đĭ dôm bơ ngai tam mă ƀet lơ̆m năr đơ̆ng rŏng tơ̆ hnam trưng đe ŏh oei hŏk mă ưh ‘nŏh tơ̆ anih jang pơ gang đơ̆ng apŭng truh tơ̆ xăh, phương.

Tơ̆ dêh char Hậu Giang, kiơ̆ trong jang đơ̆ng Dơ nŏ anih vei lăng kon pơ lei dêh char đơ̆ng ‘năr 4 - 6/11 âu kơnh, dêh char vă pơ gơ̆r ƀet vắc-xin tang găn jĭ Covid-19 ăn hơ iŏh đơ̆ng 12 truh hơ la kơ 18 sơ năm hăm vắc-xin Pfizer kiơ̆ tơ drong hơ găt đơ̆ng Anih tơm vei lăng jang pơ gang.

Dư̆ng: Tơ blơ̆