‘Nau khul tơmoi tơmang pơhiơ̆ teh đak đe yak trong đak dơsĭ truh tơ̆ pơlei tơm Đà Nẵng lơ̆m sơnăm ‘nao 2024. Hơnih jang tơmang pơhiơ̆ pơlei tơm Đã Nẵng iung jang hơdoi hăm Kŏng ty Dơnŏk duk Đà Nẵng, Ƀô̆ đô̆i vei lăng sơlam teh đak Dơnŏk duk Đà Nẵng păng Kŏng ty ba tơmang pơgiơ̆ Destination Asia pơgơ̆r sơng khul tơmoi tơ̆ dơnŏk duk Tiên Sa.

Tơmoi tơmang pơhiơ̆ đei pôk ăn pơkao, tơmam drăm păng ba tơmoi năm tơmang hơnih tơmang pơhiơ̆. 2.000 ‘nu tơmoi au ‘nŏh găh lơ đơ̆ng teh đak Hà Lan, rim teh đak châu Âu, Canada, Mi, Hàn Quốc, Nhật Bản, Úc. Tơmoi đei mĭnh năr vă tơmang pơhiơ̆ hơnih ‘lơ̆ng rŏ kơ pơlei tơm Đà Nẵng nhen Hơnih tơmang ‘lơ̆ng rŏ Ngũ Hành Sơn, hnam chua Linh Ứng, Hơnih mong răk mŭk drăm chrăh pơrŏ Chăm Đà Nẵng. Tơchĕng hơlau, sơnăm 2024 gô đei 45 tong duk đak dơsĭ chơ ba 40.000 ‘nu tơmoi tơmang pơhiơ̆ truh tơ̆ Đà Nẵng.