VOV4.Bahnar - Hăm hơ năn "Tơ plih hơ gei - jang tŏk kiơ̆”, pơ long pơ re nơ̆r lơ̆m teh đak ‘măng mă XV sơ năm 2022 yua đơ̆ng Radio nơ̆r pơ ma Việt Nam (VOV) jang hơ dai hăm Anih vei lăng kon pơ lei pơ lei tơm Hồ Chí Minh pơ gơ̆r gơ măng brei ‘năr  (4/8) tơ̆ Hnam joh hơ ri pơ lei tơm Hồ Chí Minh. Pơ long sơ năm ‘nâu đei tơ drong vang akŏm đơ̆ng 86 anih jang, đei 203 ƀai mơ̆t lơ̆m ‘măng pơ long pơ tôch, ‘noh đei 65 ƀai găh chih tơ roi; 37 ƀai găh apĭnh jet; 11 tơ drong pơm tông; 57 tơ drong pơ re nơ̆r; 33 pơm tông pơ re nơ̆r; 34 tơ drong pơ re nơ̆r kơ tă.

Pơ long pơ re nơ̆r ‘măng âu ‘noh jĭ 1 tơ drong jang tôch kơ ‘lơ̆ng hăm pơ lei tơm Hồ Chí Minh păng lơ̆m teh đak đơ̆ng rŏng hloh 2 sơ năm tang găn jĭ hơ buh COVID-19. Dôm ƀai chih tơ roi tơ păt păng hơ iă hloh lơ̆m tơ drong jang tang găn jĭ hơ buh păng tơ iung ming mŭk drăm - tơ pôl gô đei pôk pơ ư păng pơ jao tơ mam hơ păh lơ̆m ‘măng pơ long ‘măng âu.

Thuem: Tơ blơ̆