Lơ̆m ‘măng Akŏm sih kuan mơlôh Ƀô̆ đô̆i Kơđông linh vei sơlam teh Việt Nam păng sih kuan mơlôh Kŏng an Lào, tơ̆ Hnam akŏm joh ayŏ tơbôl Việt Nam- Lào- Campuchia tơ̆ thôn Tà Ka, xah sơlam teh Pờ Y, apŭng Ngọc Hồi, dêh char Kon Tum pơgơ̆r lơ tơdrong akŏm kăp gĭt, kơhret tơdrong tơguăt tơguăl đơ̆ng đe sih kuan mơlôh kơ 2 teh đak.

Tơ̆ âu đe sih kuan mơlôh Việt Nam- Lào pơgơ̆r Hop akŏm tơroi tơbăt khôi luơ̆t ăn Kon pơlei tơ̆ tơring sơlam kơ 2 teh đak. Đe sih kuan mơlôh Việt Nam- Lào adoi asong jên hŏk  “Pôk jơ̆ng oh năm truh hnam trưng” ăn  40 hŏk tro, lơ̆m noh đei 20 hŏk tro Việt Nam păng 20 hŏk tro Lào đei tơdrong hơrih tơnap tap; atŭm pơtăm trong tơm ‘long jơk tơbôl lơ̆m cham Hnam akŏm joh ayŏ vă chih tơbăt tơdrong pơgơ̆r âu păng pơ-‘lơ̆ng cham char.