VOV4.Bahnar - Gơ măng (19/6), Anih jang Đoàn pơ lei tơm Đà Nẵng jang hơ dai hăm Kâu lak ƀô̆ Tsubasa (Khŭl vei lăng hơ druh tơ dăm pơ lei tơm) pơ gơ̆r “ Lêh joh ayŏ kơ dŏ soang Việt- Nhật, Tsubasa Matsuri 2022” sơng đei vă jê̆ 700 hơ druh tơ dăm, sinh viên tơ̆ dôm hnam trưng cao đẳng păng đại học lơ̆m pơ lei tơm vang akŏm. ‘Nâu jĭ tơ drong jang tơ băt 50 sơ năm pơ jing tơ drong pơ vei jang tơ bôl Việt Nam- Nhật Bản.

Lêh pơ gơ̆r joh ayŏ kơ dŏ soang Việt- Nhật hlôi pơm tơ ƀôh dơ̆ng tơ drong joh ayŏ ‘lơ̆ng hơ iă kơ Nhật Bản, pơ dă păng tơ ƀôh hơ nih huch hla che Nhật Bản, pơm châp hla ar Origami, hơ nih pơ dă rup Nhật Bản, pơ dă hơ băn ao hrŭk kră sơ̆ Việt- Nhật, dôm tơ drong pơ chơt kră sơ̆ păng pơ long joh hơ ri hơ soang đơ̆ng dôm anih jang. Anih jang Đoàn pơ lei tơm Đà Nẵng tơ băt: ‘Moi kiơ̆ tơ drong jang ‘nâu tơ gŭm đe buăl mơ lôh băt dơ̆ng găh tơ drong joăt ‘lơ̆ng hơ iă Nhật Bản, đei dơ̆ng hơ nih hŏk pơ hrăm nơ̆r pơ ma, đơ̆ng noh gô jing gơng tơ ƀưh đơ̆ng Nhật Bản păng Việt Nam.

Thuem: Tơ blơ̆