VOV4.Bahnar - Lêh pơih blŭng ăn SEA Games 31 vă pơ gơ̆r tơ̆ cham đă ƀŏng lŏng Mỹ Đình lơ̆m gơ măng 12/5. Đĭ đăng vĕ mât lăng lêh pơih blŭng, lêh pơ tôch, đă mă hơ tuch păng tơ gar băl mê đai kong kơ tơ drong đă ƀlŏng lŏng drŏ nglo SEA Games 31 gô mơ̆ng đơ̆ng Anih pơ gơ̆r tơ lĕch ngăl. Kiơ̆ kơ ‘nŏh, Anih pơ gơ̆r ưh đei tĕch vĕ mât lăng lêh pơih blŭng, lăp ƀơk ăn dang 20.000 vĕ ăn kuan tih, bơ ngai tơ plŏng kơ dâu, dôm khul tơ plŏng kơ dâu đơ̆ng dôm tĕh đak năm truh tơ̆ cham đă ƀŏng lŏng Mỹ Đình vang pơm lêh đĕch.

Lêh pơih blŭng SEA Games 31 vă pơ gơ̆r lơ̆m 120 pơ nĭt tơ̆ cham đă ƀŏng lŏng Mỹ Đình. Kiơ̆ kơ ‘nŏh, đơ̆ng rŏng kơ lêh yak pơ rŏ đơ̆ng 11 khul tơ plŏng kơ dâu, tơ chĕng adrol Thủ tướng Phạm Minh Chính vă iung pơ ma nơ̆r pơih blŭng ăn SEA Games 31. Anih pơ gơ̆r hlôi tơ lĕch tơ drong hơ găt thi pơ long băl, hla ar pơ tho tơ ƀôh, năr thi dôm môn; iŏk hla ar chih măt đơ̆ng 7.878 ‘nu kăn ƀô̆, bơ ngai pơ tho, bơ ngai tơ plŏng kơ dâu đơ̆ng 11 tĕh đak; krao 1.299 ‘nu bơ ngai pơm trŏng tai, hơ len năng, kuan tih jang ki thuơ̆t lơ̆m apŭng plenh tĕh; 2.502 ‘nu bơ ngai chih tơ drong kơ tơ̆ng ang lơ̆m păng ‘ngoăih kơ tĕh đak; hơ met 31 hnam hotel pơm anih tep pơ dơ̆h ăn dôm khul truh thi tơ plŏng kơ dâu…

Dơ̆ng: Tơ blơ̆