Pơgơ̆r đơ̆ng năr 26/12/2022 păng pơdui truh Têt dương lĭch 2023, Giĕng Joh ayŏ - Tơmang pơhiơ̆ Măng Đen xơnăm 2022 đei Anih vei lăng kon pơlei apŭng Kon Plông, dêh char Kon Tum pơgơ̆r tơ̆ Anih tơmang pơhiơ̆ cham char Măng Đen hlôi hơvơn lơ tơmoi truh vang akŏm hơlen băt joh ayŏ Tây Nguyên.

Oh Lương Phạm Việt Anh, tơmoi đơ̆ng dêh char Đăk Nông ăn tơbăt, truh Măng Đen, Việt Anh hlôi đei lăng dôm khul joh ayŏ kon kông Xơ Đăng pơdreh chĭng chêng-hơxuang, pơdăh dôm tơmam pơdreh tơdra kon kông păng inh đei đon tơnŏ hăm kon pơlei tơ̆ âu: “Inh mơn ƀôh noh chrih mă adoi juăt mơ̆n, kơlih unh hnam inh năm oei tơ̆ Tây Nguyên erih jang xa noh inh adoi jing bơngai Tây Nguyên bơih. Inh ƀôh vơch păng băt ‘mêm kơ kon bơngai tơ̆ âu. Rim bơngai tơ̆ âu noh chơmăh, kơyah kơyak”

Lơ̆m lơ tơdrong đei pơgơ̆r tơ̆ Anih tơmang pơhiơ̆ cham char Măng Đen ăh xơnăm 2023, hơvơn lơ tơmoi truh hloh noh akŏm hơlen băt joh ayŏ “Plenh teh tơring Tây Nguyên”. Tơ̆ âu ăh hơla bri ‘long hơngo, đei 5 tŏ rông juăt jue kơ bơngai Xơ Đăng hơdrung Mơ Nâm păng Ca Dong đei hơmet pơ-‘lơ̆ng. Atŭm hăm noh đei kơ hrĕng tơmam drăm tơguăt hăm tơdrong erih pơm jang kơ kon pơlei đei pơdăh ‘lơ̆ng hơƀăp. Oh Nguyễn Ngọc Thủy Trang, sinh viên xơnăm mă 2 Đăi hŏk FPT tơ̆ pơlei tơm Hồ Chí Minh ăn tơbăt: “ ‘Nâu jing ‘măng mă blŭng inh năm truh Măng Đen, inh ƀôh tơdrong erih kon pơlei tơ̆ âu êm gruei. Mă đe kơƀah găh mŭk drăm mă lei găh đon bơnôh đe đei tôm tong. Kon pơlei noh hơnơ̆ng đei ‘măng xŏng xa tôm tơnŏ hăm dih băl. Inh truh Đà Lạt bơih păng inh ƀôh Măng Đen ưh đei le lăi hăm Đà Lạt, hăm đei dôm tơdrong pha hăm Đà Lạt. Ning nai kơnh noh hơbŏ inh gô chôt vih tơmang Măng Đen hăm minh ‘nua boăl noh thoi yơ ăi”.

Ƀok Đặng Đình Toán, Kơdră Anih Joh ayŏ păng Tơroi tơbăt apŭng Kon Plông ăn tơbăt, vă hơvơn kon pơlei adoi nhen tơmoi truh hơlen băt joh ayŏ Tây Nguyên tơ̆ Anih tơmang pơhiơ̆ cham char Măng Đen ƀơ̆t xơnăm ‘nao 2023, apŭng Kon Plông hlôi axong ming hơmet tơnăp. Atŭm hăm noh, jang hadoi hăm bơngai chhơ̆ xĭt hơbăn ao Minh Hạnh păng bơngai hơlen akŏm tơmam drăm xo Tây Nguyên, Đặng Minh Tâm chă pơm tơlĕch pơdăh minh anih tơbang um ai joh ayŏ Tây Nguyên tơ̆ Măng Đen: “Kiơ̆ đơ̆ng cham char joh ayŏ kơ nhôn tơ̆ âu minh tơdrong hơpơi ‘moih pơtrruh hăm tôm tơmoi noh jing tơdrong vei răk tơƀăk mong dôm kơjă joh ayŏ juăt jue trŏ nhen xơkơ̆t mă Hop akŏm joh ayŏ jâ̆p teh đak xơnăm 2021 ƀok Tổng ƀĭ thư Nguyễn Phú Trọng hlôi pơgơ̆r, noh joh ayŏ  jing pơhngol kơ hơdrung hơdrĕch, joh ayŏ chơng trong ăn kon pơlei yak păng joh ayŏ oei noh hơdrung hơdrĕch oei. Noh jing dôm tơdrong tơm dơnơm mă nhôn ‘meh pơtrruh hăm tơmoi ƀơ̆t truh akŏm hơlen băt joh ayŏ lơ̆m tơring teh kơ apŭng Kon Plông”.