Năr jŏh ayŏ kơ dŏ xoang kơ dôm hơdrĕch kon kông apŭng Ea Kar sơnăm ‘nâu đei lơ tơdrong nhen: hơri hơxoang đơ̆ng dôm hơdrĕch kon kông; thi dôm tơdrong pơm ngôi kră sơ̆; ming pơdă păng et xa ngôi tơmam xa đơ̆ng dôm tơring; truh lăng tơdrong jŏh ayŏkơ dŏ xoang Tây Bắc, Tây nguyên păng tơdrong jŏh ayŏ kơ dŏ xoang chăl hle; truh lăng anih gru groa chơkơi đak ‘lơ̆ng rŏ Drai Y Bar; hao thi thŏng nan kơ thŭng păng thŏng nan Ka Yak; ming pơdă păng tĕch dôm tơmam ‘lơ̆ng, tơmam OCOP tơ̆ tơring.

Kŭm hăm jơva chĭng chêng kơ bơngai Êđê, đơn tính hơri then kơ bơngai Tày-Nùng, boa hơri quan họ Bắc Ninh ‘nŏh jĭ dôm tơdrong pơm ngôi tôch kơ chơt đơ̆ng kră sơ̆ kơ dôm hơdrĕch hơdrung nhen klơ̆m plei còn, tơphai bơbe tâm băl, chô̆ măt rôp bip, hao dĕng dŏng. ‘Nâu jĭ sơnăm mă 3 apŭng Ea Kar pơgơ̆r Năr jŏh ayŏ kơ dŏ xoang dôm hơdrĕch kon kông tơ̆ apŭng, ưh lăp pơm lăp jơhngâm đon kon pơlei tơ̆ tơring păng tơmoi chă tơmang lăng đĕch mă oei tơgop roi tơƀôh um ai kon bơngai, tơdrong ‘lơ̆ng đơ̆ng jŏh ayŏ kơ dŏ xoang kơ dôm hơdrĕch hơdrung hai.