https://vov4.vov.vn/bahnar/todrong-joat-long-dong-so-van-hoa/lo-bai-lang-sa-dom-todrong-jang-long-bai-1-pom-leh-hang-po-akom-yak-kotang-456550.vov4

Đơ̆ng đak tơnglang plei K’Li A (phường Đạt Hiếu, thĭ xăh Buôn Hồ, dêh char Đắk Lắk) đei hơmet ming dơ̆ng, mă đơ̆ng hnam đei đak kuay mă lei mŏ H’En Niê oei hơnơ̆ng năm sŏ đak. H’En đei mĕ pơtho ăn tơdrong pơm ƀuih vă pai tơdrô ge. Mŏ H’En roi hơiă hlŏh dơ̆ng mưh băt plei sư pơjing HTX choh jang xa, juăt jang dôm tơmam so sơ̆, lơ̆m noh đei tơdrô ge. Đang kơ ‘nŏh tơdrô ge OCOP plei K’Li A ưh lăp đei yoa lơ̆m dôm năr et ot tơ̆ pơlei đĕch, năr et xa tơ̆ tơring đĕch mă oei tĕch ăn bơngai chă tơmang lăng păng chơ tĕch truh tơ̆ rim tơring hai: “Inh ‘mĕh khul kơdră pơgơ̆r tơring pơjing tơdrong ‘lơ̆ng, pơih lăm pơtho ăn đe ‘lơ ‘lơ̆p lơ̆m plei K’Ly A găh dôm tơdrong jang so đơ̆ng hơdrĕch nhôn. Đe drŏ kăn ‘nŏh hŏk tanh brai vai khăn, pai pơđih tơdrô; drŏ nglo ‘nŏh hŏk sĭt tơnanh, tanh hơkăt, pơm tĭng nĭng, chĭng klơk. Đei thoi nŏh gơ̆h chĕp vei kơjăp dôm tơdrong juăt ‘lơ̆ng đơ̆ng hơdrĕch hơdrung.”

Tơdrong arih xa kơ kon pơlei Êđê tơ̆ plei K’Li A gơnơm đơ̆ng choh jang xa ngăl, hăm dôm kơloăi ‘long pơtăm tơm nhen chĕh phe, tiu, sầu riêng. Rơnĕh păng arih xa truh ‘lŏ tơ̆ groi teh âu, ƀok Y Chép Mlô ƀôh hơdăh tơdrong tơplih tŏk ‘lơ̆ng đơ̆ng rim unh hnam lơ̆m pơlei; Mŭk drăm roi tŏk pơdrŏng, ưh pă đei unh hnam yơ pơngot, ưh đei hơbăn ao hrŭk. Mă lei ƀok Y Chép oei kơ hiôk jơhngâm, mưh ƀlŏk truh khei ‘năr adrol sơ̆, hăm jơhngâm đon tôch ‘mĕh mơ̆ng tơdrong hơ ‘mon, mơ̆ng jơva chĭng chêng, mơ̆ng đing put, dăh mă jơva đe peh ƀa jra hau. Đĭ đăng nhen oei đei lơ̆m jơhngâm đon tơchĕng đĕch, mă lei ưh ê sư đei hơlơ̆k dơ̆ng.

Ƀok Y Chép Mlô tôch hơiă: “Đĭ đăng rim bơngai lơ̆m pơlei tơtă mơ̆ng nơ̆r kră pơlei păng ƀok pơgơ̆r pơlei ngăl, adrin jang xa kơna mŭk drăm roi tŏk, hnam yơ kŭm mong đei mŭk mam. Lơ unh hnam đĭ man đei hnam kơjăp ‘lơ̆ng, răt tôm tơmam, kơmăy pơyoa ăn tơdrong arih xa. Dang ei nhôn oei năng kăl truh tơdrong chĕp vei dôm tơdrong juăt ‘lơ̆ng đơ̆ng hơdrĕch nhôn”.

Ƀok Y Ngia Mlô, Bí thư chi ƀô̆ plei K’Li A ăn tơbăt, lơ̆m kơsô̆ 277 unh hnam tơ̆ pơlei, lăp oei đei pă 13 unh hnam tơnuh, đei truh 43 unh hnam đei ƀôh. Dang ei, lơ̆m pơlei oei đei 40 tŏ hnam kơjung. Đei 5 unh hnam răt, chô̆ hơmet kơmăy lơ̆m hnam kơjung kơdih vă pơm anih tep pơdơ̆h păng et xa mưh đei tơmoi truh. Chi ƀô̆ ‘nao tơmât dơ̆ng 2 ‘nu đảng viên, hơtŏk đĭ đăng đảng viên lơ̆m chi ƀô̆ đei 17 ‘nu. ‘Nâu jĭ khul tơm lơ̆m tơdrong jang atŏk tơiung mŭk drăm; sut pơđĭ tơdrong juăt ưh kơ ‘lơ̆ng, chĕp vei kơjăp dôm tơdrong juăt ‘lơ̆ng đơ̆ng hơdrĕch bơngai Rađe: “Nhôn ling lang chĕp vei tơdrong juăt so đơ̆ng bơngai Rađe nhen: Et kôch đak, soi ăn jơhngâm pran kon pơlei. Mih ma duch nă oei pai tơdrô, chĕp vei hnam kơjung, păng dôm tơmam tôn reh, mă loi jĭ chĭng chêng.”

Yă Nguyễn Thị Trúc, Bí thư  Đảng phường Đạt Hiếu tơroi: Tơdrong jang: “Atŏk tơiung chă tơmang lăng lơ̆m tơpôl păng chĕp vei dôm kơjă kăp gĭt đơ̆ng chĭng chêng, tưk tơiung tơdrong pai tơdrô pơm tơmam OCOP” đei đĭ đăng kon pơlei tơ̆ plei K’Li A drơ̆ng nơ̆r, tơgŭm. Anih chĕp kơ̆l Đảng pơjao rim tơdrong jang ăn dôm khul grŭp, anih jang chinh trĭ tơ̆ tơring vang bơ̆ jang. Yă Nguyễn Thị Trúc pơma hơdăh: “Tưk tơiung dôm kơjă kăp gĭt đơ̆ng joh ayŏ kơdŏ xoang hơdai hăm jang chă tơmang lăng. Đon pơhnŏng atŏk tơiung chă tơmang lăng lơ̆m tơpôl kŭm nhen vei kơjăp kơjă kăp gĭt đơ̆ng chĭng chêng. Tưk tơiung tơdrong pai tơdrô jing 1 tơmam OCOP vă pơvih, tĕch ăn bơngai chă tơmang lăng.”

Vă tơgŭm ăn HTX tanh brai vai khăn plei K’Li A jang xa, Khul drŏ kăn thĭ xăh Buôn Hồ jang hơdoi hăm Anih pơtho tơdrong jang pơih lăm pơtho tanh brai, atŭm hăm ‘nŏh răt ăn đe mŏ oh drŏ kăn lơ̆m pơlei 3 không tanh. Yă Nguyễn Phạm Minh Tiết, Kơdră vei lăng Khul drŏ kăn thĭ xăh Buôn Hồ pơngơ̆t: athei pơm thoi yơ vă chă trong tĕch tơmam tanh đei, vei lăng ‘lơ̆ng tơdrong iŏk yoa ăn bơngai jang? Đe sư gơ̆h arih đơ̆ng tơdrong jang ‘nŏh mă gơ̆h chĕp vei tơdrong jang truh ning mônh: “’Ngoăih kơ pơjao jên jang, pơtho đon hlôh vao, kơdih kâu dôm bơngai jang lơ̆m HTX âu athei đei trong tĕch mơdro mă ‘lơ̆ng hai vă tơmam đơ̆ng đe sư jang đei ưh lăp ming pơdă đĕch mă oei tĕch ăn kơ đe hai. Athei đei đon jang tŏk kơdih păng tưk tơiung đon tơnăp lơ̆m tơdrong chĕp vei dôm tơdrong juăt ‘lơ̆ng đơ̆ng hơdrĕch hơdrung.”

Sŏ đak hlăng hlơ hlơr đơ̆ng kơtu đak hơdrâm, hling tuh lơ̆m tơdrô ge đei chô̆ hơmet ƀât tơngơ̆l. Ti gŭt kang, et ngôi tơdrô ge ƀou phu tôch ‘lơ̆ng. Djơ djring jơva chĭng chêng păr ang đơ̆ng hnam kơjung, ang jơva jơ̆p jang pơgar chĕh phe jing ‘lơ̆ng tơ̆ plei K’Li A, phường Đạt Hiếu, thĭ xăh Buôn Hồ./.