-https://vov4.vov.vn/bahnar/todrong-joat-long-dong-so-van-hoa/lo-bai-lang-sa-dom-todrong-jang-long-bai-1-pom-leh-hang-po-akom-yak-kotang-456550.vov4

-https://vov4.vov.vn/bahnar/todrong-joat-long-dong-so-van-hoa/bai-ma-2-koch-homet-dong-kotu-dak-hodram-456699.vov4

Hơmet ming đak hơdrâm, pơjing anih jŏh ayŏ kơ dŏ xoang, hnam kơjung păng hnam pơdă tơmam tơ̆ plei K’Li A, phường Đạt Hiếu, thĭ xăh Buôn Hồ ‘nŏh vă tơƀôh ăn tơdrong “Chĕp vei păng tưk tơiung dôm tơdrong juăt ‘lơ̆ng đơ̆ng hơdrĕch kon kông lơ̆m tơdrong pơjing păng vei lăng teh đak”. Tơdrong ‘nâu roi hơiă hlŏh dơ̆ng, mưh tơiung đei đon băt ‘mêm, ‘mĕh chĕp vei tơdrong juăt ‘lơ̆ng đơ̆ng hơdrĕch hơdrung mưh Kơdră vei lăng kon pơlei thĭ xăh Buôn Hồ đei kơ thơ chih: Krao hơvơn đĭ đăng khul grŭp, rim bơngai plang pơyơ̆r bơ̆n um rup, tơmam so ƀơm truh tơdrong pơjing păng jang tŏk đơ̆ng thĭ xăh Buôn Hồ. Đĭ đăng dôm tơmam âu gô đei pơjao ăn Hnam ming pơdă tơmam kơ plei K’Li A.

“Inh jĭ bơngai Rađe. Inh plang ăn tơpăl tŭl hơmrĕ. ‘Nâu jĭ tơmam đei đơ̆ng sơ̆, hơnơ̆ng đei yoa lơ̆m tơdrong arih xa. ‘Nâu jĭ tơmam đơ̆ng yă ƀok inh ‘măn ăn. Inh ‘mĕh ming lơ̆m Hnam pơdă tơmam âu vă rim bơngai ƀôh păng ƀlŏk dơ̆ng tơdrong juăt ‘lơ̆ng đơ̆ng hơdrĕch kơdih.”

Kơpal ‘nŏh hei jĭ nơ̆r pơma đơ̆ng ƀok Y Xuân Ayun, 71 sơnăm, thây pơdơ̆h hưu dang ei arih xa tơ̆ plei Kwăng, xăh Cư Bao. Ƀok Y Xuân tơroi, ƀât oei năm pơtho chư sơ̆, ƀok hơnơ̆ng tơtă ăn đe hŏk tro bơngai Rađe athei adrin hŏk pơhrăm nơ̆r pơma, chư chih kơ hơdrĕch kơdih. ‘Nâu jĭ tơdrong kăl vă gơ̆h băt hơdăh tơdrong juăt, jŏh ayŏ kơ dŏ xoang đơ̆ng 1 hơdrĕch hơdrung. Tôch sơ ‘ngon yoa hrei ‘nâu lơ bơngai đei hŏk truh um, pơm bơ̆n kăn ƀô̆, mă lei ưh gơ̆h pơma, ưh gơ̆h chih chư hơdrech kơdih.

Kŭm tơ̆ plei Kwăng, xăh Cư Bao mơ̆n, ƀok Y Khuê Ayun tơroi: Adrol sơ̆ hnam ƀok đei lơ chĭng chêng, ge gŏ ‘năi. Mă lei đei tơmam ‘nŏh song ăn kơ đe, đei tơmam ‘nŏh tĕch hŭt lê̆. Tơchĕng hơnơ̆ng, ƀok Y Khuê kŭm chă đei 1 tơmam mă kơdih tôch lăp đon: “Inh plang ăn tơpăl hăm hơdrei peh ƀa, pơm hăm ‘long. Inh ‘mĕh ning mônh kơnh đe ‘lơ̆ ‘lơ̆p năng ƀôh ‘nŏh băt truh dôm tơmam yoa tôch kơ juăt hăm mĕ ƀă yă ƀok sơ̆. Tơpăl âu đei đunh dêh bơih, dang 100 sơnăm bơih. Tơpă âu bơngai Rađe iŏk vă peh ƀa, tŭl pơlăh.”

Mŏ H'Nghin Niê, Bí thư chi ƀô̆ plei Krưm B, xăh Cư Bao, ăn tơbăt: Tơ̆ hop akŏm chi ƀô̆, đe đảng viên bơngai Rađe pơma nuh tôch hơiă păng drơ̆ng nơ̆r akhan: plang pơyơ̆r dôm tơmam yoa đơ̆ng sơ̆ ‘nŏh jĭ trong jang vă chĕp vei dôm tơmam âu ‘lơ̆ng hlŏh dơ̆ng. Mưh dôm tơmam đơ̆ng kơdih plang pơyơ̆r đei pơdă tơƀôh, đei lơ bơngai truh năng ‘nŏh kŭm jing tơdrong tôch čhôk ‘nă: “Chi ƀô̆ pơlei krao hơvơn đe đảng viên plang pơyơ̆r dôm tơmam so. ‘Nŏh jĭ tơmam yoa, tơmam chă hơngoang, tơmam tôn reh, ge, gŏ so vă chĕp vei ăn kon sâu ning mônh kơnh băt, vă huei kơ hiơt hiong dôm tơmam đơ̆ng yă ƀok sơ̆ juăt yoa. Sơ̆ 1 pôm gŏ dăh mă 1 pôm ge athei tơplih hăm 1 mă ưh ‘nŏh 2 tŏ kơpô ‘mơ̆i.”

Đĭ đei 11 khul grŭp, anih jang păng 34 ‘nu bơngai plang pơyơ̆r 60 tơmam. Đơ̆ng tơmam yoa tôch juăt, truh tơmam chă hơngoang păng tơmam tôn reh hai… Lơ̆m noh đei lơ tơmam tôch kăp gĭt nhen: ge, gŏ kong, ching so. Ƀok Nguyễn Văn Tài, Kơdră Anih vei lăng jŏh ayŏ kơ dŏ xoang, tơôi tơbăt păng tơplŏng kơdră thĭ xăh Buôn Hồ ăn tơbăt: anih jang oei rơih hơmet, hơlen năng chăl sơnăm vă pơm hla ar chih tơblang mă hơdăh hăm rim tơmam: “Anih jŏh ayŏ kơ dŏ xoang păng roi tơbăt sơng iŏk dôm tơmam đơ̆ng anih jang, khul grŭp, kăn ƀô̆, bơngai jang ăn teh đak, đơ̆ng kon pơlei păng khul tơpôl plang pơyơ̆r ăn vă tăh ming vei lăng păng đei trong pơdă tơƀôh.”

Ƀlep ƀât tơbăt ‘măng mă 134 sơnăm năr rơnĕh ƀok Hô, 19/5 âu ki, Khul kơdră chĕp kơ̆l đảng thĭ xăh Buôn Hồ pơgơ̆r hop akŏm “Hơlen năng kơdih, chă hơmet ming trong chĕp vei păng tưk tơiung dôm tơdrong juăt ‘lơ̆ng đơ̆ng rim hơdrĕch kon kông tơ̆ thĭ xăh”. Tơ̆ hop akŏm âu, kơdră chĕp kơ̆l thĭ xăh pôk pơ ư păng pơjao hla ar chih tơbăt ăn dôm khul grŭp păng rim bơngai plang song tơmam.

Yă Nguyễn Thị Thu Nguyệt, Bí thư Đảng thĭ xăh Buôn Hồ, pơma hơdăh: “Sơnăm 2024 âu thĭ xăh hlôi pơgơ̆r hop akŏm “Hơlen năng, hơmet ming kơdih kâu” lơ̆m tơdrong chĕp vei păng tưk tơiung dôm tơdrong juăt, jŏh ayŏ kơ dŏ xoang ‘lơ̆ng hơiă kơ hơdrĕch kon kông tơ̆ tơring. Đảng ƀô̆ đei tơdrong tơchơ̆t tôch hơdăh, chă krao hơvơn, mong akŏm jên tơmam vă jang atŏk tơiung thĭ xăh, pơma trong, man anih jang, pơm anih jŏh ayŏ kơ dŏ xoang. Kiơ̆ đơ̆ng noh, hơnăp jang đơ̆ng anih jang Đảng, đơ̆ng đe đảng viên roi tŏk ‘lơ̆ng, hăm lơ tơdrong jang tôch đei yoa.”

Hnam pơdă tơmam kơ plei K’Li A vă pơih ‘măng sơng tơmoi truh lăng lơ̆m khei 11/2024 ‘nâu, ƀlep ƀât Đắk Lắk pơgơ̆r tơbăt 120 sơnăm pơjing dêh char. Dôm tơdrong jang đei yoa ‘lơ̆ng, pơm lăp hăm tơdrong ‘mĕh vă tôch tơgăl đơ̆ng kon pơlei hlôi păng tŏk bŏk lang xă tơ̆ jơ̆p tơpôl dôm hơdrĕch kon kông. Đảng ƀô̆, khul kơdră pơgơ̆r thĭ xăh đei đon pơhnŏng klĕp truh: sơnăm 2025 Buôn Hồ tŏk jing tơring kơdrâm kơloăi III- 1 pơlei tơm “pơdrŏng ‘lơ̆ng rŏ, gơ̆h hơgei, đei ƀĕnh tơdrong ‘lơ̆ng.”