Băt hơdah đon tơchĕng Hồ Chí Minh, băt hơdah anih dơ̆ng, sơnong kăp gĭt kơ joh ayŏ: “noh pơhngol dơnơm kơ kon pơlei”, “Joh ayŏ oei noh Kon pơlei oei”, Ƀok Tổng bí thư Nguyễn Phú Trọng hlôi akŏm lơ jơhngơ̆m đon pơjing joh ayŏ gơh hơgei, ƀenh kơ um ai kon pơlei, tơpă jing tơdrong kăp gĭt kơ tơpôl, jing jơhngơ̆m pran lơ̆m kon pơlei, tơdrong kăp gĭt vă hơtŏk tơ-iung teh đak.

Ah mă pơgơ̆r tơdrong hop akŏm jơ̆p teh đak gah tơlĕch jang kiơ̆ tơchơ̆t kơsô̆ 23 đơ̆ng Anih tơm Chĭnh trĭ gah Trong hơtŏk jang mŭk drăm – tơpôl, vei sơđơ̆ng tơpôl tơring Tây Nguyên truh sơnăm 2030, sơkơ̆t truh sơnăm 2045, Ƀok Tổng bí thư Nguyễn Phú Trọng hlôi ră hơdah tơdrong mă âu: " Pơjing joh ayŏ Tây Nguyên gơh hơgei trŏ hăm khôi juăt kră sơ̆, drơ̆ng minh păng ‘lơ̆ng. Tơgĭt dôm kơjă joh ayŏ phara băl đơ̆ng dôm hơdrung bơngai, lăng âu jing jơhngơ̆m pran vă hơtŏk tơ-iung păng jang hadoi lơ̆m apŭng plenh teh. Asong hơdrol tơdrong vei răk tơƀăk mong joh ayŏ kăp gĭt, khôi so sơ̆ kơ dôm hơdrung bơngai kon kông, mă kăl noh tơdrong et xa juăt jue, joh ayŏ chĭng chêng Tây Nguyên. Inh ‘meh ră hơdah ah anih joh ayŏ. Tơrĕk truh Tây Nguyên bơ̆n đei kơdih um ai joh ayŏ, noh đe mih ma athei hơdrin iŏk yua hăm gơh ưh? ‘Nâu ưh kơsĭ joh ayŏ pơchơt pơhiơ̆ ôh, âu jing vei răk tơƀăk mong joh ayŏ kon kông, păng âu adoi jing Trong vă bơ̆n jang mŭk drăm lơ̆m chăl ‘nao âu noh ‘lơ̆ng tơpă".

Vih hơdơ̆r 13 sơnăm kơ âu, ah ƀok Tổng bí thư Nguyễn Phú Trọng năm tơmang apŭng Mường Lát, dêh char Thanh Hóa, ƀok Lầu Minh Pó, sơ̆ jang Phŏ ƀĭ thư Huyên uy Mường Lát adoi đei kơtơ̆ng dôm nơ̆r Ƀok tơtă gah sut lê̆ khôi kơtul chơdư păng vei răk tơƀăk mong um ai joh ayŏ kon kông. Dang ei kon pơlei Mông tơ̆ Mường Lát hlôi sut lê̆ bơih khôi bơngai lôch ưh tah lơ̆m bong păng vei răk tơƀăk mong dôm khôi juăt ‘lơ̆ng rŏ: "Um ai joh ayŏ ah năm tơ̆ âu Ƀok akhan, mă thoi yơ kon pơlei adoi athei vei răk kơdih joh ayŏ po, noh bơngai Mông dang ei adoi oei vei răk tơƀăk mong um ai joh ayŏ, mă kăl noh hơri pơkong. Kon drăkăn tih vơ̆ năm iŏk klo athei pơ-nam, noh jing joh ayŏ kơ bơngai Mông. Pă pôm dơ̆ng noh hlôm keng, hlôm đing, kơ bơngai Mông tŏk bŏk oei hơdrin hơtŏk vei răk".

‘Nhŏng Đinh Ply, bơngai Bahnar truh đơ̆ng dêh char Gia Lai tŏk bŏk oei hơrih tơ̆ bơbŭng hnam hơtŭm 54 hơdrung bơngai (tơ̆ Pơlei joh ayŏ Tơmang pơhiơ̆ hơdrung kon kông Việt Nam, Đồng Mô-Sơn Tây-Hà Nội), răk vei nơ̆r tơtă đơ̆ng Ƀok Tổng bí thư gah vei răk joh ayŏ: " Ƀok hlôi tơroi gah tơdrong vei răk tơƀăk mong joh ayŏ juăt jue kơ kon pơlei Việt Nam pơma atŭm adoi nhen dôm hơdrung kon pơlei kon kông pơm thoi yơ vă tơguăt tơguăl atŭm tơ-iung pơjing pơlei pơla teh đak hơtŏk pran, pơm trong hiôk ăn kơdih băl vă hơtŏk mŭk drăm, adoi nhen chă tơgŭm dih băl, hŏk pơhrăm gah joh ayŏ. Chĕp vei sơnong mă noh inh hơdrin pơhrăm vă vei răk tơƀăk mong kiơ̆ nơ̆r Ƀok pơtho tơtă adoi nhen âu ki năm iŏk kơsơ̆p hla bar ƀok pơtruh ăn kon pơlei kon kông. Hla bar chih ƀrơ̆k kơ jơhngơ̆m, nơ̆r ƀok chih pơsư̆ ăn trong vei răk tơƀăk mong joh ayŏ kon pơlei Việt nam adoi nhen kon pơlei Bahnar tŏk bŏk oei vei răk lơ̆m Pơlei joh ayŏ pơma hơtŭm, jing kăp gĭt hloh hăm kon pơlei Việt Nam bơ̆n".

Tơ̆ Hop akŏm Joh ayŏ jơ̆p teh đak sơnăm 2021, Ƀok Tổng Bí thư Nguyễn Phú Trọng ră hơdah: “Joh ayŏ noh um ai kơ kon pơlei, joh ayŏ oei noh kon pơlei oei, joh ayŏ hiong noh kon pơlei hiong”. Tơdrong pơtơ̆ng đei kơjă kăp gĭt âu hlôi păng tŏk bŏk hơ-‘nhăk hơyuh ‘nao, um ai ‘nao hăm dôm tơring teh hơtaih yaih kơ teh đak. Hloh kơ noh, um ai joh ayŏ dôm hơdrung hơdrĕch đei vei răk tơƀăk mong hlôi pơhơtŏk “jơhngơ̆m pran lơ̆m lăm” vă sut lê̆ khôi kơtul chơdư, pơngot rơvĕt hin dơnuh, pơdrĭu dôm tơring teh, hơyak truh minh khei năr ang hơdah hơnô̆ hơnăp kơnh.