Ngê̆ nhơ̆n Y-Dŭ Êban tơroi, ưh băt đơ̆ng lai yơ jơva chĭng chêng hrơm mât lơ̆m jơhngâm đon. Ƀok lăp ƀlŏk kơdih kâu arih xa truh ‘lŏ hăm ƀĕnh jơva chĭng đơ̆ng chăl yă ƀok păr ang nhen đak kơtăh, nhen ƀơ̆r sem asi lơ̆m bri kơdrơ̆ng. Ƀât oei ‘lơ̆p sơ̆, ƀok hơnơ̆ng truh ngôi lơ̆m dôm ‘măng tôn chĭng chêng năr et soi, pơyan et tơdrô gô kơdroh, hăm đon kuăt kơna ƀok tôch ƀônh rơbot dôm ƀai chĭng păng boa hơri so đơ̆ng yă ƀok sơ̆: “Inh mơ̆ng lơ ƀai chĭng chêng lơ̆m năr pơlei pơla pơgơ̆r et soi, jơva chĭng hrơm mât lơ̆m jơhngâm đon inh, yoa inh hơnơ̆ng ngôi jê̆ đe tôn chĭng vă mơ̆ng. Đe mih, đe ma asong ăn inh tôn pơlong thư lăng đơ̆ng nŏh inh ƀôh kơdih kâu tôch ‘mĕh tôn chĭng kơna hŏk rok. Inh gơ̆h tôn chĭng ƀât oei tơdăm sơ̆. Lơ bơngai ƀôh inh gơ̆h tôn chĭng kơna athei inh mât tôn lơ̆m khul păng pơtho dơ̆ng ăn dôm bơngai nai tôn chĭng.”

 Đơ̆ng sơ̆, lơ̆m dôm ‘măng pơgơ̆r et soi, hơri hơxoang kơ tơpôl, jơva chĭng chêng nhen tơguăt iŏk kon bơngai hăm yang, pơm ăn rim bơngai vang mât hơdai lơ̆m tơpôl. Kơlih thoi nŏh, jơva chĭng chêng jing pơhngol kơ pơlei pơla. Mưh ƀôh tơdrong tôn chĭng chêng nhen roi vă hiơt hiong, ngê̆ nhơ̆n Y-Dŭ Êban ‘măn jơnăr, hŭt jơhngâm vă pơih lăm pơtho ăn kon sâu tơ̆ pơlei pơla. Lơ chăl mơlôh tơ̆ pơlei jing gơ̆h tôn chĭng păng năm tôn tơ̆ lơ tơring.

Ngê̆ nhơ̆n Y-Dŭ Êban tơroi: “Lơ̆m pơlei inh jĭ bơngai hơmet chĭng preu, pơtho tôn chĭng ăn lơ bơngai lơ̆m pơlei vă vei kơjăp jơva chĭng chêng păng mưh năm tôn chĭng tơ̆ yơ ‘nŏh inh năm hơdai ngăl. Inh oei chă pơtho ăn đe kon mon đơ̆ng 15-16 sơnăm hai păng khul tôn chĭng đe ‘lơ ‘lơ̆p âu 3,4 ‘măng năm tôn chĭng ăn kơđe lăng bơih.”

Vă gơ̆h đei thoi âu, ngê̆ nhơ̆n Y-Dŭ Êban ưh đei hli ơm pơmat tat, kŭm hăm lơ bơngai lơ̆m pơlei vang pơhrăm tôn dôm ƀai chĭng hiôk, hơiă, ‘măn lơ jơnăr pơtho ăn đe hơiŏh dơ̆ng, tơgĕch pơtho ƀât pơyan pơdơ̆h he, khei ‘năr ‘lơ̆ng hlŏh vă pơtho tôn chĭng. Ƀok oei năm truh rim hnam, pơlung mĕ ƀă păng đe hơiŏh năm hŏk mă tôm. Đơ̆ng tơdrong adrin tôch pơnĕh thoi nŏh mă ngê̆ nhơ̆n Y-Dŭ Êban gơ̆h jang đei lơ tơdrong tôch hơiă, ‘nŏh jĭ đei lơ bôl boăl mơlôh hưch ‘mêm kơ chĭng chêng hơdrĕch hơdih: “Lăm pơtho tôn chĭng ăn hơiŏh inh pơih pơm 2 lăm A,B. Dang ei đe kon mon năm hŏk bơih kŭm hơnat vă rơih đei jơnăr lăp ‘lơ̆ng vă pơtho tôn chĭng. Inh tôch tơtăm pơm thoi yơ vă đe ‘lơ ‘lơ̆p gơ̆h tôn chĭng, ưh đei hŭt lê̆ tơdrong juăt ‘lơ̆ng đơ̆ng hơdrĕch kơdih. Kiơ̆ tơdrong arih xa chăl ‘nao, lơ tơdrong juăt ‘lơ̆ng nhen vă hiơt hiong đĭ. Inh ‘mĕh, ƀât kơdih kâu oei pran ‘nŏh chă pơtho dơ̆ng ăn đe kon mon tơdrong tôn chĭng âu.”

Chĭng chêng hăm bơngai Rađe ưh lăp tơmam vă tôn đĕch, mă oei jing tơmam kăp gĭt đei tơplih hăm lơ kơpô, rơmo, jĭ tơmam tôch sĭt lơ̆m unh hnam. Jơva chĭng chêng đei tôn pơchrang tôch chăl arih đơ̆ng rim bơngai Rađe, đơ̆ng năr ‘nao rơnĕh truh năr lôch hơchăng, vih dơ̆ng hăm yă ƀok sơ̆. Ngê̆ nhơ̆n Y-Dŭ Êban tơroi vă jơva chĭng chêng gơ̆h re ang ling lang athei đei tơdrong mât 1 jơhngâm đon đơ̆ng kon pơlei tơ̆ rim pơlei pơla păng khul kơdră pơgơ̆r tơring hai: “Tơdăh lăp hơdrô̆ unh hnam nhôn ‘mĕh chĕh vei, pơtho tơƀôh đĕch lei tơdrong tôn chĭng chêng hơdrĕch bơ̆n ưh gơ̆h chĕp vei ôh. Athei đei tơdrong tơgŭm đơ̆ng đe ƀok pơgơ̆r pơlei, khul kơdră tơring hai. Đei tơdrong tơgŭm đơ̆ng tơpôl păng lơ ngê̆ nhơ̆n nhen thoi nhôn âu. Nhôn ‘mĕh đe kon mon băt, ‘mêm tơdrong juăt tôch ‘lơ̆ng đơ̆ng hơdrĕch hơdrung âu”.

Hăm đon hlôh vao găh lơboa tôn chĭng, hơmet chĭng preu kŭm hăm tơdrong tơgop tih tên ăn tơdrong chĕp vei, tưk tơiung jơva chĭng chêng bơngai Rađe, ngê̆ nhơ̆n Y-Dŭ Êban lơ ‘măng iŏk đei ƀăng khen đơ̆ng anih jang kơpal. ‘Nâu jĭ dôm tơmam hơpăh tôch tơgăl, pơlung jơhngâm đon đe ngê̆ nhơ̆n nhen thoi ƀok vă hơnơ̆ng druh kiơ̆ tơdrong hưch hanh, vă jơva chĭng chêng gơ̆h păr ang ling lang.