Kiơ̆ đơ̆ng mơ̆ng lăng hop akŏm mă 7, Quốc hội jăl 15, lơ bơngai tăh hla tơ̆ Gia Lai, mă loi jĭ bơngai tăh hla tơ̆ tơring kon kông tôch tơrek truh tơdrong apinh jet păng tơl nơ̆r apinh jet đơ̆ng Kơdră tơm vei lăng jŏh ayŏ kơ dŏ xoang, tơplŏng kơdâu păng chă tơmang lăng Nguyễn Văn Hùng. Bơngai tăh hla hơpơi ‘nmĕh anih jŏh ayŏ kơ dŏ xoang pơjing tơdrong ‘lơ̆ng, trong tơgŭm mă lăp vă tưk tơiung tơdrong joh ayŏ kơ dŏ xoang kơ hơdrech kon kông, atŏk tơiung tơdrong chă tơmang lăng pơm hơtŏk tơdrong arih xa ăn kon pơlei.

Bơngai tăh hla H’Uyên tơ̆ apŭng Chư Păh, dêh char Gia Lai pơma: “Đơ̆ng rŏng kơ hop akŏm, kơdih kâu inh tôch hơmĕng Quốc hội tơrek hlŏh dơ̆ng găh tơdrong chĕp vei jŏh ayŏ kơ dŏ xoang kơ hơdrĕch kon kông dêh char Gia Lai, tơ̆ tơring kon kông. Chĕp vei tưk tơiung dôm tơdrong juăt ‘lơ̆ng nhen rông athei pơm mă trŏ thoi rông kră sơ̆, dôm tơdrong jang tanh sĭt, pơgơ̆r dơ̆ng tơdrong et soi kơ kon pơlei kon kông tơ̆ âu vă ning mônh kơnh đe ‘lơ ‘lơ̆p gơ̆h băt truh păng chĕp vei ăn rim jơhnơr đơ̆ng rŏng”.