Hăm bơngai Rađe, bri ‘long tôch kơ sĭt, vei lăng bri jĭ vei lăng tơdrong arih xa kơ kon pơlei. Tơdrong ‘nâu đei chih hơdăh lơ̆m khôi juăt kơ ngai Rađe tôch rơđăh vă huei đei bơngai yơ phă pơrăm truh tơdrong sĭt đơ̆ng bri. Đơ̆ng sơ̆, tơpôl bơngai Rađe đei đon hlôh vao tôch rơđăh găh tơdrong vei lăng bri, anih arih xa atŭm, lơ̆m nŏh, đei vei lăng bri 'nŏh jĭ tơdrong tôch sĭt, jĭ tơdrong juăt đơ̆ng sơ̆ kơ bơngai Rađe. 

Khôi juăt kơ bơngai Rađe đei chih hơdăh tơdrong vei lăng bri ‘long găh tu đak, vei lăng bri ‘long tơter thong, vei lăng bri ƀât tu đak hơdrâm, vei lăng bri kơdrơ̆ng, vei lăng bri ‘nao blŭh. Vei lăng bri jĭ vei lăng kơtu đak ăn pơlei pơla. Apăng 231 lơ̆m Khôi juăt Rađe chih: “Teh, thong đak, bri ‘long nhen thoi kơđum kơđŏng, jĭ kơdŭ rŏng đe yă ƀok. Yă ƀok jĭ bơngai vei lăng trôm hơgơp, vei lăng bri ‘long, vei lăng ‘long K’tơng, ‘long Kdjar”, bơngai bu kŏh phă bri, tơgar iŏk tĕh bri bơngai nai ưh jor gô đei rôp sek tơlang”.

Ƀok Y-Bhiu Buôn Yă – Kră pơlei, ƀok pơgơ̆r pơlei Tơ̆ng Jŭ, xăh Ea Kao, plt Buôn Ma Thuôt tơroi: Sơ̆ mưh bơngai Rađe chă tĕh vă pơjing pơlei pơla, blŭng a ‘nŏh athei chă đei groi tĕh mă sĭt, mă ưh ‘nŏh groi teh jê̆ tu đak vă vei lăng đak: “Đak tôch gĭt kăl, đak nhen thoi đak tŏh mĕ, bri ‘long jĭ yang lê̆ bơ̆n vei lăng, ưh ăn bơ̆n kŏh phă, bơ̆n athei vei lăng, nhen thoi ‘long katê, ‘long tơnơ̆ng păng lơ kơloăi ‘long kăp gĭt nai hai, kră sơ̆ mưh ‘mĕh kŏh ‘nŏh athei soi apinh kơ yang adrol ‘mơ̆i”.

Hăm bơngai Rađe, oei đei bri jĭ oei đei tơdrong arih, hiong bri ‘nŏh hiong đĭ đăng yoa tơdrong juăt, jŏh ayŏ kơ dŏ xoang, ‘long bri hơnơ̆ng đei kơjăp lơ̆m jơhngâm đon bơngai Rađe. Đơ̆ng ‘nao rơnĕh, đe nge đĭ tôch juăt hăm không tanh brai kơ bơngai mĕ đei kŏh pơm hăm ‘long bri, hơkăt đei tanh đơ̆ng ‘lao, pơ o kŏh đơ̆ng bri, klĕp truh lôch hơchăng mưh brư̆ yang đang pơsat đe kŭm kŏh ‘long pơm mul meo nhen ‘mĕh chông ba kon bơngai vih dơ̆ng hăm bri ‘long.

Y- Đhiăm Ayun (Ama Nghiêm) tơ̆ plei Tu, xăh Ea Tul apŭng Cư Mgar, dêh char Đắk Lắk tơroi, bơngai Rađe hơnơ̆ng oei xa tôch kơjăp hăm bri kông, um ai bri kông hơnơ̆ng đei lơ̆m tơdrong hơ ‘mon kơ bơngai Rađe nhen Dam Săn, Dam Yi… păng lơ̆m dôm ƀai hơri brông hăm lơ nơ̆r tơtă ăn kon sâu vei lăng bri ‘long mă ‘lơ̆ng. ‘Mĕh pơm tĭng nĭng, chĭng klơk kŭm athei chă tơmam đơ̆ng bri hai: “Ƀai hơri eirei kơ bơngai Rađe mă mĕ ƀă yă ƀok đa hơri sơ̆, đei lơ ƀai hơri kơ pơlei pơla, hơri kơ tơdrong tơhưch păng hơri găh lơ tơdrong nai hai, ‘nŏh hơnơ̆ng đei nơ̆r jô̆ pơđơ̆k truh tơ̆ bri ‘long kăp gĭt, ‘lơ̆ng rŏ”

Bri ‘long hăm bơngai Rađe ưh lăp tơmam drăm đĕch mă oei jing tơmam đei kơjăp lơ̆m jơhngâm đon, đei lơ̆m đon lui yom kơ yang dơ̆ng. Rim tơdrong juăt đơ̆ng bơngai Rađe hơnơ̆ng ƀơm truh tơ̆ bri ‘long, đơ̆ng hnam kơjung truh jơva chĭng chêng. Ƀok Y-Om Ksor (oei krao ‘nŏh Ama H’Lim), Bí thư chi ƀô̆ plei Ky, phường Thành Nhất, plt Buôn Ama Thuột, tơroi, adrol kơ kŏh iŏk 1 tơm ‘long bri, đe athei soi kơ yang ‘long păng dôm yang vei lăng ƀri ‘mơ̆i. ‘Nâu jĭ 1 tơdrong juăt, jĭ đon lui tơƀôh hơdăh tơdrong năng kăl bri ‘long đơ̆ng bơngai Rađe: “Lơ nơ̆r pơđơ̆k mưh hơri găh tơdrong vei lăng bri ‘long tôch hơiă. Sơ̆ rim bơngai athei pơm kiơ̆ ngăl. Dôm jơhnơr mĕ ƀă yă ƀok sơ̆ akhan, tơdrong vei bri, vei lăng tơm ‘long tôch kăp gĭt. Kơna adrol kơ đe kŏh ‘long bri yơ ‘nŏh đe athei soi kơ yang ‘long hơdrol, vă tơƀôh jơhngâm đon lui yom kơ bri kông”.

Oei đei bri jĭ oei đei tơdrong juăt đơ̆ng sơ̆ kơ bơngai Rađe păng oei hơnơ̆ng chĕp vei, tưk tơiung truh ning mônh kơnh. Tơhiong lê̆ bri, tơdrong juăt ‘lơ̆ng hơiă rơbâu sơnăm đơ̆ng bơngai Rađe lăp oei đei lơ̆m đon tơchĕng đĕch. Tôch kăl đei tơdrong vang bơ̆ jang đơ̆ng đĭ đăng tơpôl vă tơdrong juăt 'lơ̆ng đơ̆ng bơngai Rađe, tơdrong jŏh ayŏ kơ dŏ xoang 'lơ̆ng hơiă ƀơm truh bri 'long gơ̆h chĕp vei hơnơ̆ng truh ning mônh kơnh.