Tơdrong et xoi rok kiơ̆ khôi xŏ đak ăh blŭng pơyan puih kơ kon pơlei tơ̆ tơring păng jing tơdrong jang kăp gĭt pơih blŭng ăn tơdrong akŏm “Lêh akŏm tơbăt tơm a hla chă Pác Bó” xơnăm 2023.

Khôi xŏ đak ăh 'năr blŭng xơnăm 'nao jing um ai 'lơ̆ng rŏ lơ̆m tơdrong joh ayŏ đei kon pơlei Tày, Nùng tơ̆ lơ tơring tơ̆ Cao Bằng vei răk tơƀăk mong păng xŏ đak plang ăh anih xoi ƀlŏk kơ Ƀok Kơdră Hồ Chí Minh hlôi đei kon pơlei pơtơm ăh năr 1 khei 2 âm lĭch đơ̆ng lơ xơnăm kơ âu. Truh hăm Lêh akŏm tơbăt tơm a hla chă Pác Bó xơnăm 2023, tơmoi oei đei lăng dôm tơdrong pơdăh joh ayŏ ƀenh kơ um ai joh ayŏ kon pơlei kon kông apŭng Hà Quảng; hrâu dơh po lơ̆m tơdrong akŏm pơchơt juăt jue nhen hơtơng plei còn, kơ-'nĕk 'nhĕt, hao xim xơng, truơ̆ khŏ tơ̆r...; chă xa dôm 'nhot xa kăp gĭt kơ bơngai kon kông, năm tơmang anih pơdăh tơmam đơ̆ng Pơlei tanh brai păng lơ tơdrong akŏm joh ayŏ kăp gĭt kơ kon pơlei kon kông tơring âu.