Tŏk bŏk chă yak tơ̆ trong teh lơ̆m Mir pơgar bri teh đak Yok Đôn, găh tơring Krông Na, apŭng Buôn Đôn, dêh char Dak Lăk, rôih yŏng H’Blú lăng ƀôh tơmam sa ‘noh hăp krao hloi bôl boăl hăp. Kiơ̆ đơ̆ng rŏng rôih H’Blú, rôih yŏng Khăm Phanh jei tĕnh koăng năm tơ̆ tơm prit hlôi kŏh ming tơ̆ noh. Lăp đơ̆ng rŏng sa, đe hăp yak năm tơ̆ jih đak kroong trep nhă đak, hum vă tơmoi chă tơmang lăng. 

     Dôm tơdrong chă yơ yak kơ 2 tŏ rôih tôch hơ iă, pă đei nơ̆r chă pơđep au to đơ̆ng tơ-‘ngla vei lăng. Tơmoi tơmang pơhiơ̆ dơ̆ng đơ̆ng hơtăih chă lăng păng mơ̆ng bơngai jang tơblang tơroi tơbăt găh rôih păng tơdrong chă pơhrăm, vei lăng năng tông kơ mĭnh tŏ rôih ‘noh lơ liơ. Mŏ Phan Ngọc Quế Lâm, tơmoi oei tơ̆ quận 11, pơlei tơm Hồ Chí Minh vang năm tơmang pơhiơ̆ tơbăt:“Tơdrong rôih chă yơ yak hiôk hian lơ̆m bri lơ lau ba jei hơ iă dêh, kơ yuơ đei pơm kiơ̆ tơdrong vei lăng năng tông, pơđep đơ̆ng kon bơngai. Rôih ‘noh jĭ mĭnh kơ loăi sem bri brăh păng đei hơrih sa joăt lơ̆m bri dơ̆ng ‘noh jĭ hơ iă hloh. Đei ‘nhŏng jang tơblang tơbăt tơroi tơbăt dơ̆ng lơ tơdrong găh rôih jĭ tôch hơ iă păng ‘meh vă băt hloh dơ̆ng găh tơdrong oei sa joăt joe kơ rôih”.       

Tơdrong pơgơ̆r chă tơmang lăng au ‘noh tour tơmang pơhiơ̆ cham char ‘lơ̆ng hơ iă hăm rôih kơ yuơ Mir pơgar bri Teh đak Yok Đôn păng Khul jang vei lăng năng tông Sem bri brăh châu Á vang iung jang hơdoi đơ̆ng tŏk bŏk sơnăm 2018. Hăm tơdrong tơm ‘noh vei lăng năng tông rôih rong tơ̆ Dak Lăk tơ̆ hơnăp tơdrong ƀôh hơdăh yan au ‘noh rôih roi năr roi kră krŭt, hơrih sa ưh kơ hiôk hian. Hrei au, đei 10 tŏ rôih vang tơlĕch jang kiơ̆ trong jang au, lơ̆m au đei 6 tŏ rôih hơnơ̆ng tơƀơ̆p hăm tơmoi. Kiơ̆ đơ̆ng ‘nhŏng Phạm Xuân Quỳnh, kang ƀô̆ bơ̆ jang tơdrong vă jang kơ Khul jang vei lăng năng tông Sem bri brăh Châu Á, dôm tŏ rôih vang jang kiơ̆ tơdrong jang au hlôi đei ăn hơrih sa hiôk hian lơ̆m bri, yak hloh tơdrong chă chô̆ krên hăm jal păng pơđep đơ̆ng kon bơngai. Tơplih ăn yŭn rôih, tơmoi đei tơmang lăng đơ̆ng hơtăih, chă lăng đe hăp chă sa, hum, tep bun, chă yơ yak lơ̆m bri hiôk hian ưh kơ đei tơdrong yă kiơ pơ ieng đe hăp.“Tơ-‘ngla yŭn ruih pă đei chĕp pơnai rôih, pă đei đei chĕp mut ‘long, lăp chă hơpăh ăn tơmam sa vă ăn kơ rôih sa đĕch. Bơ̆n pơm lơ lau roi năr roi tơgŭm ăn đe hăp vih hơlơ̆k dơ̆ng hơrih sa hiôk hian lơ̆m bri, tơgŭm ăn đe hăp băt chă sa dôm tơmam drăm sa tơ̆ yơ, vei lăng năng tông dih băl lơ liơ. Roi năr rôih hơrih sa roi hiôk hian, pran jăng hloh dơ̆ng. Tơmam sa, đak nhă ‘noh ƀlep hăm dôm tơmam mă đe hăp ‘meh chă sa, ‘meh chă nhă. Tơdrong đei iŏk yua kơ rôih roi năr roi ‘lơ̆ng hơ iă hloh”.

        Lơ̆m 6 sơnăm au ki, Mir pơgar bri Teh đak Yok Đôn sơng hơvơn tơmoi tơmang pơhiơ̆ kiơ̆ tour tơmang lăng bri brăh hăm rôih. Sơnăm 2023, tour tơmang pơhiơ̆ au đei Hơnih jang Kỷ lục Việt Nam tgơbăt hơdăh ‘noh mĭnh lơ̆m 20 tour ‘lơ̆ng hơ iă hloh kơ Việt Nam. ‘Nhŏng Y Siêm Hđơk, bơngai jang tơblang hơdăh Mir pơgar bri Teh đak Yok Đôn akhan: tơdrong drơ̆ng nơ̆r au tơƀôh hơdăh trong jang ‘nau ưh khan lăp pơm hơ iă hơdrô̆ kơ rôih păng cham char bri brăh đĕch ôh mă lei oei đei tơmoi lŭ lăp hloh dơ̆ng. “Tour tơmang lăng rôih tŏk bŏk jing tour hơvơn đei lơ tơmoi lơ̆m teh đak păng teh đak đe hloh, hơnhăk đei tơdrong ‘mêm kơ eng hơ iă hăm rim rôih rong. Lơ̆m jơ ‘năr tơmang lăng rôih ‘noh ba tơroi tơbăt ăn tơmoi ‘mêm kơ eng kơ rôih hloh dơ̆ng”.

     Atŭm hăm trong pơgơ̆r tơmang pơhiơ̆ ‘lơ̆ng hơ iă hăm rôih, tơmoi năm tơ̆ Mir pơgar bri Teh đak Yok Đôn jei chă tơmang lăng rim tơdrong pơgơ̆r anai nhen: hao thŏng nan tơ̆ đak kroong Sêrêpôk, chă văh, pơdơ̆h pơdei, tơmang lăng păng phĭn rup xem, chă yak lơ̆m bri, chă hơlen lăng bri ‘long kơdrơ̆ng… Ƀok Vũ Đức Giỏi, Kơ iĕng Kơdră chĕp pơgơ̆r Hơnih pơtho tơbăt cham char păng bơ̆ jang kơ Mir pơgar bri Teh đak Yok Đôn tơbăt, hơnih au tŏk bŏk tơlĕch lơ trong tơmang pơhiơ̆ adoi nhen lơ tơmam drăm hrei au đei gô hơvơn đei lơ tơmoi năm tơ̆ au. “Mir pơgar bri Teh đak au jei tơlĕch ăn rim tour tơmang pơhiơ̆ rôih mĭnh poăt năr dăh mă kơtĕch kơ năr vang chă tơmang lăng rôih dăh mă tour tơmoi tơmang lăng vă trŏ lăp hăm jơ ‘năr, tơdrong ‘meh vă kơ tơmoi. Truh au kơnh lăp đơ̆ng rŏng Tơdrong vă jang tơmang pơhiơ̆ đei pơjing keh đang, Mir pơgar bri Teh đak Yok Đôn gô krao hơvơn rim bơngai tơmơ̆t jên jang lơ̆m tơgoăt jang hơdoi, tơgoăt jang hơdoi dăh mă mơng cham char bri vă đe tơmơ̆t jên jang atŏk tơ iung tơmang pơhiơ̆ bri brăh kơ mir pơgar Bri Teh đak au".

Đei lơ bri ‘long, lơ kơ loăi sem bri brăh gĭt kăl hui kơ đei, Mir pơgar bri Teh đak Yok Đôn ‘noh hơnih đei ‘ngiĕt, đak nhă trŏ lăp vă rôih rong Dak Lăk oei păng vih hơlơ̆k gơ̆h chă oei sa lơ̆m bri păng tơ̆ pơlei. Đơ̆ng noh pơjing rơvơn vă đe hăp đei vei lăng năng tông ‘lơ̆ng đunh đai tai sơnăm, pran jăng păng hiôk hian hloh, adoi pơjing đei mĭnh trong jang tơmang pơhiơ̆ ‘lơ̆ng hơ iă hloh mưh tơmoi năm tơ̆ Dak Lăk.