Chao iŭ – nhen hơnăn krao, hăp iŭ ‘lơ̆ng ƀâu phu kơ ƀuih tơdrô ge. Pha hăm dôm tơƀăng xa juăt jue nai nhen por prung, ier ƀuh... hơnơ̆ng đei xa mưh đei tơdrong et xoi tơbeh lơ̆m pơlei pơla, chao iŭ jing minh tơmam xa juăt jue kơ rim unh hnam bơngai K’Ho. Đe xư pai chao iŭ vă ‘măn xa rim năr, ‘nhăk ba tơ̆ mir pơtăl kơ đaknhă. Kiơ̆ kơ yă K’Bri tơ̆ Tơring kơdrâ̆m Kon Tách Đăng, thĭ trâ̆n Đinh Văn, apŭng Lâm Hà, dêh char Lâm Đồng, tơmam pai chao iŭ noh ƀônh đĕch, noh jing dôm kơloăi phe. Yă K’Bri ăn tơbăt: “Pai chao iŭ noh phe yơ duh gơh, phe mir, phe hmă dăh mă hơƀo. Mưh phe hmă noh bơ̆n rơih por hơrăng. Mă lei ‘lơ̆ng hloh noh phe mir”

Vă pai pơjing đei chao iŭ noh đe athei pai phe jing chao. Mă blŭng noh ôp phe, nĕ ‘nhao rơgoh dêh hnang kơlih mưh thoi noh chao ưh đei klĭ ôh. Đơ̆ng rŏng kơ noh dêk tơ̆ tơnuh unh pai. Vă đei tơmam chao iŭ noh gŏ chao pai xĭn păh lăp đĕch, nĕ pai klĭ ôh, kơlih thoi noh kơnh hăp jing ƀuih chao iŭ gô xao.  

Chao đơ̆ng rŏng kơ pai đang ưh kăl tăh ƀoh ƀôk ngok kiơ ôh, mă lê̆ ngach đang kơ noh tuh lơ̆m get đak, klŭ hlơp. Kơtol ăh hơdra unh lơ̆m 1, 2 năr noh đei chao iŭ bơih. Yă K’Bri tơroi găh trong pai pơjing chao iŭ thoi âu:  “Inh pai chao xĭn păh lăp noh hăp ‘lơ̆ng. Nĕ kơ pai chao klĭ dêh hnang. Hơnơ̆ng noh 1, 2 năr chao gô iŭ. Vă gơh đei chao iŭ noh đơ̆ng rŏng kơ pai đang ba athei tăh chao lơ̆m get đak đang kơ noh kơtol ăh hơdra unh”

Tơroi găh tơmam xa hadoi, yă K’Bri ăn tơbăt, chao iŭ gơh xa atŭm hăm dôm tơƀăng xa đei pai pơjing. Kiơ̆ kơ tơdrong kăl păng tơdrong lăp kơdih kơ bơngai xa mă đe xư gô xa hăm dôm tơmam xa phara băl. Yă ăn tơbăt:  “Inh gơh xa hăm rim tơƀăng xa nhen ‘nhot, ‘nhĕm... mă lei ‘lơ̆ng hloh păng trŏ hloh noh xa hăm ka kro, ka hâ̆p ƀuh đang kơ noh tŭl hăm hơmrĕ hơdrih”

Bơngai K’Ho lui, chao iŭ jing minh tơmam xa ‘lơ̆ng bek, ưh gơh kơƀah. Kơloăi chao âu đei lơ tơdrong, đei yua nhen lĕ đak nhă vă da ƀiơ̆ kơ hal đơ̆ng rŏng kơ jang hrat tơ̆ mir. Atŭm hăm noh, chao iŭ oei gơh bơ̆ng xoai tô̆, tơgŭm ăn hơkâu jăn pran jăng hloh. Chao iŭ jing tơmam xa juăt jue kơ bơngai K’Ho. Noh jing um ai joh ayŏ tơƀăng xa đei răk vei đơ̆ng xơ̆ ki. Tơmoi truh hăm Lâm Đồng gơh xa chao iŭ vă hơlen băt kăp gĭt đơ̆ng tơmam xa chao iŭ âu.