Vei tôch ‘lơ̆ng rup phĭn hơdai hăm nhap Tổng Bí thư Nguyễn Phú Trọng, yă H’Yam Buôn Krông, tơ̆ plei Tơng Jú, xăh Ea Kao, plt Buôn Ma Thuột, dêh char Đắk Lắk čhưu jơhngâm tơroi dơ̆ng, yă chơt hơiă đei 2 ‘măng tơƀâp Tổng Bí thư. Mă loi, sơnăm 2011, yă păng đe mŏ oh tanh ao Rađe tôch ‘lơ̆ng pôk ăn Tổng Bí thư ƀât ƀok truh ngôi tơ̆ pơlei: “Ƀât iŏk đei nơ̆r roi tơbăt ‘nŏh pơtơm vai brai tanh ao vă pôk hơpăh ăn Mih, tơƀôh jơhngâm đon ‘mêm kơeng, kŭp yom đơ̆ng kơdih hăm Mih. ‘Măng mă 2 tơƀâp mih ƀât inh vang năm Hop akŏm pôk pơ ư bơngai đei hŏk jrŭ, bơngai tĕch mơdro rơgei păng bơngai kon kông đei bưng ai, đei grih tơ̆ Hà Nội. Inh ƀôh tôch ‘mêm kơeng, tôch kăp gĭt hăm dôm nơ̆r mih tơtă ăn kon pơlei kon kông pơma hơdrô̆ păng jơ̆p lơ̆m teh đak pơma atŭm, athei mât 1 jơhngâm đon, mât 1 ƀơ̆r đon ‘mơ̆i mă gơ̆h jang đei”.

Chĕp vei nơ̆r tơtă đơ̆ng nhap Tổng Bí thư, dôm sơnăm âu ki, yă H’Yam kŭm hăm 45 ‘nu bơngai jang lơ̆m HTX tanh brai vai khăn Tơng Bông (tơtă bơngai Rađe lơ̆m xăh Ea Kao ngăl), hơnơ̆ng mât 1 ƀơ̆r đon jang tŏk, adrin chă hơlen năng, hơmet pơ ‘lơ̆ng tơmam tanh, hơdai hăm chĕp vei dôm tơdrong juăt so vă pơjing pơlei chă tơmang lăng lơ̆m tơpôl.

Hăm ngê̆ nhơ̆n rơgei A Biu tơ̆ plei Klĕch (xăh Ngọc Bay, plt Kon Tum, dêh char Kon Tum), mă đơ̆ng đĭ kră bơih, măt ưh gan bang, jơ̆ng ti đĭ pă jang bơih mă lei ƀok oei hơnơ̆ng mong akŏm tơmam tôn reh păng pơtho ăn jơhnơr mơlôh dơ̆ng. Ƀok ‘măn jơhngâm năm chă chĭng chêng, đơn, hơgơ̆r, mul… lơ̆m tơpôl bơngai Bahnar, chĕp brŏk tơ̆ hnam kơdih păng pơm anih âu jing 1 anih chă tơmang lăng tơpôl.

Ƀok A Biu tơroi: “Vă roi tơbăt găh tơdrong juăt, jŏh ayŏ kơ dŏ xoang Tây Nguyên mă đơ̆ng đĭ kră bơih mă lei tơ̆ hnam, inh pơm đei 1 anih chă tơmang lăng, mong akŏm đei vă jê̆ 30 sơmrŭk chĭng chêng. Dang ei inh oei chă roi tơƀôh dôm tơdrong juăt ‘lơ̆ng ‘nŏh, tơroi ăn đe hŏk tro, đang kơ ‘nŏh jĭ kôn mon kon sâu lơ̆m unh hnam, păng mih ma duch nă rông ƀôt. Ƀât lăp ‘nao âu, inh oei năm pơtho tơdrong tôn chĭng Bahnar dơ̆ng. Hơmĕng hăm tơdrong tơrek đơ̆ng teh đak thoi âu ưh jor kon pơlei gô mât 1 ƀơ̆r đon lơ̆m tơpôl, vang tưk tơiung dơ̆ng jơva chĭng chêng”.

Tơdrong chĕp vei dôm tơdrong juăt, jŏh ayŏ kơ dŏ xoang tơ̆ Tây Nguyên oei iŏk đon tơdrong tơtăm đơ̆ng lơ bơngai mơlôh dơ̆ng. Rơ Châm Tứ, tơ̆ plei Mrông Yố 1, xăh Ia Ka, apŭng Chư Păh, dêh char Gia Lai ‘nao 15 sơnăm mă lei đĭ gơ̆h tơroi hơ ‘mon Jrai dôm jĭt ƀai bơih. Oh ƀôh tôch pŭn yoa ƀok sư gơ̆h tơroi hơ ‘mon kơna sư adrin mơ̆ng, hŏk kiơ̆: “Hŏk dơ̆ng roi lơ ƀai roi ‘lơ̆ng, tơdăh bơ̆n ưh băt ‘nŏh mưh ƀok hiong kơnh gô hiong đĭ, tơdrong juăt, jŏh ayŏ kơ dŏ xoang hơdrĕch bơ̆n bơ̆n athei adrin chĕp vei, pơtho tơƀôh ăn băl dơ̆ng. Mă đơ̆ng ưh đei băt lơ thoi ƀok ‘nŏh kŭm chĕp vei đei tŏ sĕt ăn chăl đơ̆ng rŏng”.

Chĕp vei păng tưk tơiung dôm kơjă kăp gĭt đơ̆ng tơdrong juăt, jŏh ayŏ kơ dŏ xoang ‘lơ̆ng hơiă đơ̆ng sơ̆, Nghệ sĩ Ưu tú A Đuh, tơ̆ plei Trang, xăh Đăk La, apŭng Đăk Hà, dêh char Kon Tum hơnơ̆ng jur tơ̆ pơlei pơla vă chih răk dôm lơboa hơri brông. Ƀok oei tơchĕng hơlen pơm hơmet bơ̆n chĭng chêng, chĭng klơk, ting ning, klông-put păng chih pơchĕh lơ ƀao hơri ‘nao. Ƀok akhan, ‘nŏh jĭ trong jang vă tưk tơiung tơdrong juăt, jŏh ayŏ kơ dŏ xoang ‘lơ̆ng đơ̆ng sơ̆ lơ̆m tơdrong arih chăl hle: “Boa hơri so oei vei thoi noh, năng kiơ̆ dôm tơdrong tơm ‘nŏh sơ̆ mă đe tưk tơiung ming dơ̆ng. Tơgĕch iŏk boa hơri hơiă ‘nŏh mă bơ̆n pơm ăn kơ sư roi hơiă hlŏh dơ̆ng vă ning mônh kơnh đei lơ ƀai hơri pơvih ăn kon pơlei bơ̆n mơ̆ng roi ‘lơ̆ng hơiă ƀiơ̆”.

“Tơdrong juăt, jŏh ayŏ kơ dŏ xoang jĭ pơhngol kơ hơdrĕch hơdrung, tơdrong juăt, jŏh ayŏ kơ dŏ xoang oei đei ‘nŏh hơdrĕch hơdrung oei đei” – ‘nŏh jĭ nơ̆r pơma đơ̆ng nhap Tổng Bí thư Nguyễn Phú Trọng tơ̆ hop akŏm găh jŏh ayŏ kơ dŏ xoang lơ̆m teh đak sơnăm 2021 oei hơnơ̆ng tôch kăp gĭt. Ƀlŏk hơdơ̆r kơ Tổng Bí thư, kon pơlei dôm hơdrĕch kon kông tơ̆ Tây Nguyên hơnơ̆ng chĕp vei, tưk tơiung tơdrong juăt, jŏh ayŏ kơ dŏ xoang ‘lơ̆ng hơiă đơ̆ng sơ̆, kŭm jing chĕp vei kơjăp pơhngol hơdrĕch hơdrung ăn ning mônh kơnh hai./.