Hăm hơnăn “Chĕp vei, tưk tơiung păng pơ ư pơ ang tơdrong jŏh ayŏ kơ dŏ xoang ‘lơ̆ng hơiă kơ dôm hơdrĕch kon kông kơtuei bơngai”, năr jŏh ayŏ vang tơgop pơm hơtŏk tơdrong tơguăt đĭ đăng hơdrĕch hơdrung; pôk pơ ư, tưk tơiung dôm tơdrong juăt kăp gĭt ‘lơ̆ng hơiă đơ̆ng dôm hơdrĕch kon kông đei kơsô̆ măt bơngai tam mă truh 10.000 ‘nu lơ̆m tĕh đak pơma adrô̆ păng tơdrong juăt, jŏh ayŏ kơ dŏ xoang ‘lơ̆ng đơ̆ng 54 hơdrĕch hơdrung Việt Nam pơma atŭm.

11 khul đơ̆ng 11 tơring đei kơsô̆ kon pơlei tam mă truh 10 rơbâu ‘nu truh akŏm, hơnhăk ăn năr jŏh ayŏ kơ dŏ xoang lơ tơdrong tôch hơiă, hăm lơ tơdrong pơchĕh, pơjing tơmam pha ra băl, tơƀôh hơdăh chăl arih so sơ̆, tơdrong jŏh ayŏ kơ dŏ xoang đei hơdrô̆ đơ̆ng rim hơdrĕch hơdrung. Mă đơ̆ng tơdrong jŏh hơri hơxoang, tôn rĕh ưh đei pơgơ̆r tih rŏ mă lei oei tơƀôh tôm tơdỏng juăt đơ̆ng kră sơ̆, hăm tơdrong vang akŏm đơ̆ng lơ ngai juăt soi kơ yang, bơngai gơ̆h tôn chĭng, hơri hơxoang, kŭm hăm lơ tơmam soi plang, tơmam tôn rĕh, tơƀôh dơ̆ng tơdrong juăt oei chĕp vei tơ̆ yăn âu lơ̆m tơdrong arih xa păng jơhngâm tơguăt băl, mât mĭnh ƀơ̆r đon đơ̆ng kon pơlei dôm hơdrĕch hơdrung.