Đơ̆ng rŏng lơ ‘măng chih hơmet, hơmet ming, tơmơ̆t dơ̆ng, năr 4/4, tơ̆ pơlei tơm Kon Tum, Ban Tuyên giáo Tỉnh ủy Kon Tum pơgơ̆r Hop akŏm pơma dơnuh tơgop nơ̆r trong vă pơjing kơsơ̆p hla bơar “Chih akŏm rim tơdrong gĭt kăl chăl sơnăm dêh char Kon Tum đơ̆ng sơnăm 1471- 2021” vă yak truh pơm tơlĕch kơsơ̆p hla bơar.

Hop akŏm ‘măng mă 2 kơsơ̆p “Chih akŏm rim tơdrong gĭt kăl chăl sơnăm dêh char Kon Tum đơ̆ng sơnăm 1471- 2021” hơbơ̆l hlŏh 700 păh hlak. Kơsơ̆p hla bơar au iŏk sơnăm tơm ‘nŏh sơnăm 1471 sơnăm blŭng chăl Lê chĕp pơgơ̆r sơkơ̆t hơdăh sơlam hơdrar vei lăng tơring Groi kông. Tơdrong tơroi lơ̆m kơsơ̆p hla bơar đei 3 tơdrong tơm ‘nŏh chăl sơnăm gĭt kăl kơ dêh char Kon Tum đei klăh asong 3 chăl sơnăm.

Hăm ‘mĕh vă kơsơ̆p hla bơar, “Chih akŏm rim tơdrong gĭt kăl chăl sơnăm dêh char Kon Tum đơ̆ng sơnăm 1471- 2021” ‘nŏh tơbăt hơdăh chăl sơnăm tơ iung pơjing păng atŏk tơ iung dêh char Kon Tum, Khul chih tơlĕch kơsơ̆p hla bơar tơgoăt iŏk lơ nơ̆r tơgop trŏ lăp vă chih tơmơ̆t dơ̆ng dôm tơdrong pơgơ̆r gĭt kăl kơ dêh char, kơ hơnih jang, rim tơdrong lơ̆m rim chăl sơnăm … ‘Moi kiơ̆ rim tơdrong tơgop nơ̆r, Khul chih tơlĕch kơsơ̆p hla bơar gô chih hơmet, tơmơ̆t dơ̆ng vă mư̆h pơm tơlĕch bơngai đŏk băt hơdăh găh groi teh,găh kon bơngai, tơdrong oei sa jŏh ayŏ, chăl sơnăm gĭt kăl kơ dêh char Kon Tum lơ̆m tơƀôh tơbăt hơdăh chăl gĭt kăl dăr sơnăm.