Lơ̆m tơdrong pơgơ̆r kơ̆m kang kơnang giĕng chŏh jang sa kơ bơngai M’nông, pơgơ̆r et jur sa ‘nŏh tơdrong pơgơ̆r kăl hlŏh. Tơdrong pơgơ̆r au ư̆h khan lăp tơdrong joăt joe vă bơnê kơ yang hri vei lăng năng tông ƀa hơƀo blŭh vơ̆ jing ‘lơ̆ng đei plei lơ mă lei oei tơbăt jơhngơ̆m đon tơgoăt tơgoăl, ‘mĕh vă đei tơdrong erĭh sa hiôk chơt ăn ŭnh hnam, pơlei pơla lơ̆m mĭnh sơnăm ‘nao.

Ƀok Y Tiêng (hơdrung M’Nông) oei tơ̆ tơring Nâm Nung, apŭng Krông Nô, dêh char Đak Nông tơbăt “Et jur sa” ‘nŏh jĭ nar Têt.“Et jur sa, soi kơ yang hri sơ̆ ‘nŏh jĭ tôch kơ gĭt kăl, jing năr kơ̆m kang kơnang giĕng tih, jei nhen năr Têt hrei au mơ̆n. Lăp đơ̆ng rŏng soi kơ yang hri sa ƀa ‘lơ̆p, kĕch ƀa đơ̆ng mir mă blŭng pŭ brŏk tơ̆ hnam ‘nŏh pĕh ƀa, pai por hăm ƀa ‘nao vă chă hơvơn kon pơlei vang sŏng sa. ‘Măng mă blŭng et jur sa đơ̆ng rŏng ‘nŏh et sa ăn ŭnh hnam pran jăng grăng akau hăm dôm ‘nhĕm ‘nhot chă pơ prŏ ‘nŏh por tơyông, ‘nhĕm nhŭng, tơdrô ge... tơpơng ăn kơ yang. ”

‘Nhŏng Rơ Châm Nguưr, tơ̆ pơlei Jut 1, xăh Ia Dêr, apŭng Ia Grai, dêh char Gia Lai ăn tơbăt, adrol ki, bơngai Jrai ưh đei xa Têt juăt jue nhen bơngai Kinh. Xơnăm ‘nao kơ bơngai Jrai đei pơtơm ăh pơyan puih phang, hơnơ̆ng noh ăh khei 3 rim xơnăm, ăh mă kon pơlei hlôi kat yua đang pơyan choh jang. Bơngai Jrai mơ̆t lơ̆m pơyan et xa kơ xơnăm, hăm lơ tơdrong et xa kăp gĭt, nhen et xŏng ƀa ‘nao, et brư̆... Kiơ̆ khei năr dăr xơnăm, ăh mă tơpôl kon pơlei Jrai păng bơngai Kinh atŭm erih xa, đei tơdrong lŭk lơ̆k găh joh ayŏ, bơngai Jrai duh pơgơ̆r xơng Têt juăt jue. Lơ̆m khei năr âu, rim unh hnam hơmet dôm tơmam xa juăt jue vă jong ăn tơmoi, kơtum kơtŏng đơ̆ng ataih truh. Tôm đei hơmet tơnăp, tơdrong xơng xơnăm ‘nao hơnơ̆ng chơt hơ-iă, xô̆ hơ̆k, vă xơng khei năr anô̆ anăp kơnh ‘lơ̆ng rŏ, xơnêp xơnua: “Unh hnam inh păng kon pơlei kueng ƀôt, pơlei pơla inh tơ̆ Ia Dêr âu hơnơ̆ng xao hla ƀlang, pai tơpŭng dăh mă ‘nhot nai đei lơ̆m pơgar. Unh hnam đei ƀiơ̆ noh ƀuh ier, nhŭng, tih hloh noh ƀuh rơmo kiơ̆ tơdrong kĕ đei kơ unh hnam. Hơnơ̆ng noh ăh năr mônh Têt bơngai Jarai duh pơgơ̆r xoi tơbeh kơ yă ƀok dơnơm, ‘năr noh duh jing ‘năr kon xâu pôk bơnê kơ mĕ ƀă, yă ƀok. Xơnăm ‘nao thơ thâu băl, năm apong dih băl vă xô̆ xôn, tơguăt tơgŭm dih băl lơ̆m tơdrong jang adoi nhen lơ̆m tơdrong erih unh hnam, pơlei pơla roi năr roi hơtŏk tơ-iung kơjăp. Bơngai ‘lŏ noh yuk trong ăn kon xâu hŏk ƀoi, vă đe xư adrin, pơ-‘nam hŏk pơhrrăm vă đei tơdrong erih jơnap hloh khei năr kơnh, tơgŭm ăn kơdih po, unh hnam păng tơpôl roi năr roi hơtŏk hloh”.