Hăm tơdrong hơmet tôch hơiă găh tơdrong tôn chĭng, hơxoang păng âm pli, unh tơ̆k hơdăh, festival hlôi pơih tơƀôh ăn bơngai lăng tơdrong jŏh ayŏ kơ dŏ xoang tôch hơiă, pôk pơ ư kơjă kăp gĭt đơ̆ng tơdrong tôn chĭng chêng Tây Nguyên; pôk pơ ư tơ ‘ngla tơmam tôn tôch hơiă âu ‘nŏh jĭ dôm hơdrĕch bơngai Jrai, Bahnar, Rađe, Sê Đăng, Jeh -Triêng, M’nông… arih xa tơ̆ 5 dêh char groi kông đei Kon Tum, Gia Lai, Đak Lak, Đak Nông, Lâm Đồng. Tơ̆ Festival, dêh char Gia Lai chơt hơiă đei sơng iŏk Ƀăng chih tơbăt anih gru groa kăp gĭt kơ tĕh đak đơ̆ng Thủ tướng teh đak, hăm Anih so Rộc Tưng – Gò Đá păng Tơchơ̆t chih tơbăt tơmam teh đak hăm dôm tơmam đei mong akŏm ƀât blŭng chăl Tơmam pơm hăm tơmo An Khê.

Lơ̆m “Giĕng jŏh ayŏ kơ dŏ xoang-Chă tơmang lăng dêh char Gia Lai sơnăm 2023”, hlŏh 1000 ‘nu ngê̆ nhơ̆n truh đơ̆ng dôm tơring kơ 5 dêh char Tây Nguyên vang tôn pơrŏ chĭng chêng tơ̆ trong glung, sơng đei lơ bơngai chă tơmang lăng păng kon pơlei truh lăng tôch hơiă. Hơnhăk chĭng chêng đơ̆ng pơlei pơla truh hăm tơring kơdrâm, roi jê̆ ƀiơ̆ hăm đĭ đăng kon pơlei ‘nŏh jĭ trong mă dôm dêh char Tây Nguyên oei yak vă chĕp vei păng tưk tơiung kơjă kăp gĭt đơ̆ng chĭng chêng – Tơmam jŏh ayŏ kăp gĭt kơ kơ bơngai. Kiơ̆ đơ̆ng tơdrong lêh vang pơjing đei anih ‘lơ̆ng hơiă vă chĕp vei tơdrong jŏh ayŏ kơ dŏ xoang, hơtŏk tơdrong mât 1 ƀơ̆r đon, hlôh vao băl, tơgŭm băl đơ̆ng kon pơlei dôm hơdrĕch hơdrung lơ̆m dêh char Gia Lai păng tơpôl dôm hơdrĕch hơdrung oei arih xa tơ̆ dôm dêh char Tây Nguyên.