Um la kak tơmang pơhiơ̆ joh ayŏ Đà Lạt tơbang jê̆ 60 anih truh tơmang tơ̆ pơlei tơm Đà Lạt păng minh ƀar tơring tơjê̆ đei chih hăm 2 nơ̆r Anh păng nơ̆r Việt. Um la kak đei asong jing 8 grŭp nhen:  cham char gru grua kơ hnưr hơrih păng mŭk drăm, cham char ‘lơ̆ng rŏ, anih ‘măn pơdah tơmam păng anih pơdah joh ayŏ, anih hơri hơsuang... pơm trong hiôk ăn tơmoi gơh năm truh tơmang păng akŏm dôm anih tơmang pơhiơ̆ joh ayŏ kơdŏ suang kơ tơring groi kông âu.

Ƀok Đặng Quang Tú, Kơdră Anih jang vei lăng kon pơlei pơlei tơm Đà Lạt ăn tơbăt, hơtuch sơnăm 2023, Đà Lạt chơt hơ-iă đei tơmơ̆t vang jang lơ̆m jơnŭm jang dôm pơlei tơm gơh hơgei kơ UNESCO lơ̆m tơdrong joh ayŏ kơdŏ suang. Tơdrong chih tơbang um la kak tơmang pơhiơ̆ joh ayŏ Đà Lạt jing 1 lơ̆m 3 tơdrong hơgei hloh kơ tơring vă pơm kiơ̆ dôm tơdrong hlôi đei pơkăp ƀơ̆t mơ̆t jang hadoi lơ̆m grŭp, adoi nhen vă hơtŏk tơdrong akŏm joh ayŏ gơh hơgei lơ̆m tơdrong hơtŏk tơ-iung kơjăp sơđơ̆ng: “Tơmam drăm âu ưh hơdrô̆ jing tơmam chơng trong, mă oei jing gơng tơroh đơ̆ng dôm bơngai jang joh ayŏ, rim anih jang joh ayŏ păng tơpôl; tơgŭm pơih ăn tơdrong tơroi gah jơhnơr hơrih, joh ayŏ păng gơh hơgei, atŭm hăm noh hơtŏk tơ-iung kơjăp sơđơ̆ng kơ tơdrong jang tơmang pơhiơ̆, joh ayŏ tơguăt hăm pơlei tơm tơdra hơri. Lơ̆m khei năr truh, nhôn gô pơtoi keh đang, hơtŏk păng keh đang um la kak âu vă asong tôm păng hơdah gah tơdrong kăl kơ dôm anih truh tơmang păng akŏm joh ayŏ ‘nao, dôm tơdrong akŏm joh ayŏ kăp gĭt kơ tơring”.

Pơma ah lêh tơbang, ƀok Jonathan Wallace Baker, Kơdră jang tang măt ăn Anih Pơtho pơhrăm, Khua hŏk păng Joh ayŏ kơ Liên hơp kuôk (UNESCO) tơ̆ Việt Nam sơkơ̆t hơdah, đơ̆ng vang jang lơ̆m Jơnŭm dôm pơlei tơm gơh hơgei UNESCO lơ̆m tơdrong joh hơri, Đà Lạt hăt hot vang akŏm lơ tơdrong pơkăp lơ̆m apŭng plenh teh păng tơring mă jơnŭm jang pơkăp, chih akŏm rah tơdrong tơlĕch jang kơ jơnŭm jang âu.

UNESCO sô̆ hơ-iă đei yak hadoi păng tơgŭm Đà Lạt chih akŏm um la kak tơmang pơhiơ̆ – minh um la kak vă sơkơ̆t hơdah dôm tơdrong akŏm hơ-iă hơgei kơ tơring lơ̆m pơlei tơm adoi nhen dôm anih truh tơmang pơhiơ̆ tơ̆ âu: “Inh tơchĕng tơdrong jang âu gô tơgop sơkơ̆t hơdah cham char joh ayŏ păng tơdrong hơgei kơ pơlei tơm Đà Lạt, păng gô jing minh tơmam kăp gĭt vă tơmoi truh tơmang gơh chă vih vơ̆t ƀônh hiôk hloh lơ̆m pơlei tơm. Atŭm hăm noh, gơh chă tơgŭm hăm dôm anih jang Kơpal kơ teh đak vei lăng păng iŏk yua cham char mŭk drăm, joh ayŏ hơgei kơ pơlei tơm âu gơh tơnăp hloh”.

Adoi kiơ̆ kơ ƀok Jonathan Wallace Baker, Đà Lạt đei mŭk drăm tih tên lơ̆m tơdrong iŏk yua mŭk drăm joh ayŏ kơ po ăn dôm tơdrong jang hơtŏk tơ-iung kơjăp, kơlih tơ̆ âu đei tơdrong juăt jue joh ayŏ kơyuơ tơpôl 20 hơdrung bơngai kon kông pơjing đei. Kơyuơ noh, tơdrong hrơ hrâu đơ̆ng hơtŏk mŭk drăm – tơpôl hăm vei răk tơƀăk mong mŭk drăm joh ayŏ, hơtŏk kơjă mŭk drăm đơ̆ng tơdrong hơgei gah joh ayŏ, păng tơrĕk truh tơdrong hơgei kơ rim bơngai, jơnŭm jang dah mă kon pơlei pơla gô ưh hơdrô̆ hơtŏk mŭk drăm kơ pơlei tơm mă oei vei răk mŭk drăm hloi.