VOV4.Bahnar - Truh ‘năr 27/1, tơ drong jang pơm nhak hăm đak tơ̆ Anih thŏng nan dơ̆ng lơ̆m dơ nâu Xuân Hương hlôi pơm đang tơ tom tơ mât yoa ăn tơ moi păng kon pơ lei tơ̆ tơ ring lăng, mơ̆ng ngôi ƀât tết Nguyên đán Nhâm Dần 2022. Tơ drong jang pơm nhak hăm đak âu, đei jên jang vă jê̆ 10 ti, yoa Công ty jang hơ doi tơ mât jên jang Lan Anh – Đà Lạt hơ păh.

Nhak hăm đak anih ‘lơ̆ng hơ iă kơ Đà Lạt tơ̆ kơ măng, pơ vih ăn tơ drong truh năng, mơ̆ng ngôi đơ̆ng kon pơ lei păng tơ moi chă tơ mang lăng

Tơ drong jang đei pơm tơ̆ tơ ring anih thŏng nan dơ̆ng lơ̆m dơ nâu Xuân Hương, pơm kiơ̆ nhak đak blŭh, rim tơ drong đei tĭt hăm kơ măy ngăl. Tơ drong jang ‘nâu mă ưh đei tih mă lei đei pơm ƀât mum dơ nâu Xuân Hương, hơ dai hăm cham char, pơ gar pơ kao iĕ, jơ va nhak, unh đeng pơ chrang tôch ‘lơ̆ng… jing anih tôch hơ iă hăm tơ moi truh tơ̆ tơ ring. Ưh lăp ƀât têt đĕch, nhak đak âu gô đei vei kơ jăp lơ̆m rim gơ măng lơ̆m năr 5, năr 6, năr 7 rim giĕng, pơ dui đunh truh đĭ ‘năr 31/12/2024.

Dơ̆ng: Tơ blơ̆