Tơ̆ groi kông Langbiang ‘lơ̆ng rŏ groi kơjung 1.500m pơtêng hăm đak dơsĭ, Đà Lạt đei cham char pôk ăn rơngơp prăt sơnăm, cham char ‘lơ̆ng liĕm, hlôi jing hơnih truh sơđơ̆ng, ‘lơ̆ng rŏ ăn tơmoi lơ̆m teh đak păng teh đak đe tơmang lăng. Jĭ tơring hơrih sa đunh đai tai sơnăm kơ bơngai K’ho, lơ̆m dôm sơnăm anglŏ 19, bơngai Phalăng hlôi năm truh tơ̆ tơring au tơ iung pơjing pơlei tơm pơdơ̆h pơdei, đơ̆ng rŏng ‘noh hơvơn đei lơ kon pơlei năm oei. Hăm tơdrong oei sa mơ̆t lĕch dih băl kơ rim hơdrung hlôi pơjing đei tơdrong hơrih sa ‘lơ̆ng rŏ kơ bơngai Đà Lạt hrei au.

Hlŏh 130 sơnăm tơ iung pơjing păng atŏk tơ iung, tơring kơdrơ̆m Đà Lạt, dêh char Lâm Đồng hlôi đei tơplih kơtang, mŭk drăm-tơpôl atŏk tơ iung, sơđơ̆ng dơ̆ng kơjăp, tơgoăt tơbôl đei pơih să. ‘Ngoăih tơdrong pran kơtang kơtang găh atŏk tơ iung choh jang sa hăm kmăi kmŏk hơgei, tơmang pơhiơ̆ hlôi jing tơdrong jang mŭk drăm tơm. Mă kăl, Đà Lạt hlôi iung jang jơnei dôm tơdrong oei sa jŏh ayŏ ‘lơ̆ng rŏ kơ hơdrech hơdrung, tơklep hăm tơdrong hơrih sa kơ bơngai Đà Lạt “Gơ̆h găt-băt ‘mêm kơ eng-Phăl hơlăng”.

Ƀok Đặng Quang Tú, Kơdră chĕp pơgơ̆r pơlei tơm Đà Lạt sơkơ̆t hơdăh, dôm tơdrong jơnei iŏk đei kơ pơlei tơm, ‘nŏh hlôi jing Hơnih tơm Tơmang pơhiơ̆ đe ư hơhang ang hơnhăk hlŏh lơ̆m teh đak păng apŭng plenh teh, Pơlei tơm Festival Pơkăo kăl hlŏh kơ Việt Nam, Pơlei tơm gơ̆h hơgei, Pơlei tơm Tơchăr tơdra hơri kơ UNESCO, păng dang ei tŏk bŏk hơnơ̆ng hơdrin tơ iung pơjing đei jing hơnih kơdrơ̆m mŭk drăm cham char. Ư̆h khan lăp lơ loh đech ôh, Đà Lạt oei đei 2 ‘măng drơ̆ng nơ̆r ‘noh “Pơlei tơm tơmang pơghiơ̆ rơgoh ‘lơ̆ng ASEAN” păng mĭnh lơ̆m dôm hơnih truh ‘lơ̆ng rŏ hloh châu Á. Ƀok Đặng Quang Tú, sơkơ̆t hơdăh:“Sơnăm 2014, Thủ tướng Teh đak pơjing Tơdrong tơchơ̆t 704, adoi nhen Tơdrong tơchơ̆t 04 kơ Hơnih Đảng dêh char Lâm Đồng hlôi sơkơ̆t hơdăh trong jang: Tơ iung pơjing Đà lạt jing hơnih kơdrơ̆m gơ̆h hơgei, pơlei tơm tơchăr, jĭ hơnih tơm tơmang pơhiơ̆ cham char, hơnih pơdơ̆h hơgei ‘lơ̆ng liĕm, tơmang pơhiơ̆ joh ayŏ kơdŏ soang gĭt kăl, jĭ hơnih tơm jŏh ayŏ kơdŏ soang, đă ƀŏng lŏng tơplŏng kơdau păng pơchơt pơhiơ̆ tơring; mĭnh hơnih gĭt kăl găh tơchăr păng pơgơ̆r joh ayŏ kơdŏ soang. Tơ̆ hơnăp tơdrong pơgơ̆r lêh tih, Hơnih Đảng, Khul kơdră chĕp pơgơ̆r păng kon pơlei kơ pơlei tơm Đà Lạt gô tơgoăt tơgoăl dih băl minh nơ̆r ƀơ̆r đon kơjăp, hơdrin đĭ ai tơplih ‘nao, hơnăp jang kơtang vă jang kiơ̆ keh đang dôm tơdrong ‘meh vă atŏk tơ iung, plang ăn tơdrong tơgop tih tên đơ̆ng rim jơhnơr mĕ ƀă yă ƀok hlôi tơ iung pơjing păng atŏk tơ iung pơlei tơm au”.

Iung pơma tơ̆ pơm lêh tơbăt 130 sơnăm Đà Lạt tơ iung pơjing păng atŏk tơ iung, Kơ iĕng Thủ tướng Teh đak Lê Minh Khái hlôi hôn bơnê kơtang dôm tơdrong jang mă Hơnih Đảng, Kơdră chĕp pơgơ̆r, khul ƀô̆ đô̆i kong ang păng kon pơlei rim hơdrung pơlei tơm Đà Lạt pơma hơdrô̆, dêh char Lâm Đồng pơma atŭm hlôi iŏk đei lơ̆m prăt jăl trong au ki, tơgop gĭt kăl lơ̆m tơdrong iŏk đei jơnei atŭm kơ pơđĭ lơ̆m teh đak.

Hăm hơmŏ păng jơhngơ̆m đon lui kiơ̆ găh mĭnh pơlei tơm Đà Lạt vei kơjăp ‘lơ̆ng rŏ hơbŏ nhen, tơdrong joăt joe sơ̆ ki mă lei hơnơng tơplih ‘nao, tơchăr hơgei, atŏk tơ iung roi năr roi gơ̆h hơgei hloh dơ̆ng, ‘lơ̆ng rŏ hloh dơ̆ng, Kơ iĕng Thủ tướng athei Hơnih Đảng, Kơdră tơring, kon pơlei kơ pơlei tơm Đà Lạt kăl pơtrŭt kơtang hloh dơ̆ng atŏk tơ iung mŭk drăm-tơpôl hăm trong iŏk kon bơngai ‘noh tơm; kon pơlei mĭnh păh ‘noh trong tơlĕch jang, mĭnh păh ‘noh tơ-‘ngla, adoi jing jơhngơ̆m pran, adoi jĭ bơngai đei iŏk yua sa hơpăh đơ̆ng tơdrong atŏk tơ iung. Kơ iĕng Thủ tướng pơma hơdăh:“Ĭnh athei Hơnih Đảng, Kơdră tơring, kon pơlei kơ pơlei tơm Đà Lạt kăl hơnơ̆ng vei kơjăp, atŏk kơtang tơgoăt tơgoăl pôm nơ̆r ƀơ̆r đon hơdrĕch hơdrung; ling lang atŏk kơtang jơhngơ̆m pran gơ̆h hơgei chĕp pơgơ̆r păng jơhngơ̆m pran iung tơjră đơ̆ng hơnih Đảng, đảng viên; hơdrin tơgoăt tơgoăl pôm nơ̆r ƀơ̆r đon lơ̆m hơnih Đảng păng pơđĭ khul chinh trĭ, pơjing đei mĭnh nơ̆r ƀơ̆r đon kơ rim răih kon pơlei. Tơlĕch lơ trong jang chă hơvơn jơnei đơ̆ng rim tơpôl păng tơlĕch jang kơtang hloh dơ̆ng lơ̆m tơmơ̆t jên jang atŏk tơ iung trong hnam ‘lơ̆ng liĕm, trŏ lăp, mă kăl dôm tơdrong jang kăl, tơdrong jang tơm, găh joh ayŏ kơdŏ soang, pơtho pơhrăm, jang pơgang, găh kmăi kmŏk tơplih kơsô̆, tơ iung pơjing pơlei tơm gơ̆h hiwgei, tơgop hơnhăk Đà Lạt jing mĭnh tơring atŏk tơ iung kăl hlŏh lơ̆m tơring, lơ̆m teh đak, hơnih tơgoăt gĭt kăl lơ̆m tơring păng apŭng plĕnh teh”.

Kơ iĕng Thủ tướng pơkă, Đà Lạt kăl hơnơ̆ng kiơ̆ yok rok jơ̆ng jơnei hơnăn Pơlei tơm Festival pơkao Việt Nam; pơgĕnh dôm tơdrong đei păng rơvơn, tơmơ̆t jên jang atŏk tơ iung Tơmang pơhiơ̆ ‘lơ̆ng liĕm; atŏk tơ iung choh jang sa kmăi kmŏk hơgei kiơ̆ trong rơgŏh ‘lơ̆ng, gei kơjăp, trŏ lăp hăm cham char; iung jang kơtang păng kiơ̆ yok rok jơ̆ng ‘lơ̆ng hơnăp jang lơ̆m khul rim pơlei tơm tơchăr kơ UNESCO, đơ̆ng noh tơgop pơtrŭt kơtang tơdrong tơgop đơ̆ng hơnih jang joh ayŏ kơdŏ soang au to lơ̆m tơdrong jang mŭk drăm kơ tơring.