VOV4.Bahnar – Pơgê năr 8/4, tơ̆ pơlong Tơplŏng Kơdâu dêh char Đăk Lăk, plei tơm Buôn Ma Thuột, Anih Joh ayŏ, Tơplŏng kơdâu păng Tơmang pơhiơ̆ dêh char jang atŭm hăm Anih jang găh Joh ayŏ, Tơplŏng kơdâu păng Tơmang pơhiơ̆ dêh char jang atŭm hăm Anih jang găh kon kông dêh char pơgơ̆r “Pơtơm Tơdrong Pơlong Tơplŏng kơdâu kon kông Đăk Lăk 'măng mă 18 xơnăm 2022”.

Tơdrong pơlong gô pơgơ̆r đơ̆ng năr 8/4 truh năr 10/4/2022. Hloh 600 'nu pơlong truh đơ̆ng 15 khul đơ̆ng dôm apŭng, thĭ xăh păng plei tơm Buôn Ma Thuột, vang tơgar 7 môn pơlong noh: teh ƀơlŏng (drŏnglo, drăkăn), kơdăh ƀơlŏng mini drŏnglo, kơdâu trong ataih (drŏnglo, drăkăn), hao xim xơng (drŏnglo, drăkăn), pơnăh hră (drŏnglo, drăkăn), drŭt 'long (drŏnglo, drăkăn) păng dui tơlei. 'Nâu jing dôm môn tơplŏng kơdâu juăt jue, hơnơ̆ng đei pơgơ̆r lơ̆m dôm 'năr lêh akŏm kơ tơring.

Tơdrong pơlong tơplŏng kơdâu hơdrung kon kông dêh char jing tơdrong tơplŏng kơdâu juăt jue đei pơgơ̆r rim xơnăm, mă lei kơyuơ pơrang jĭ Covid – 19 hơbuh hli, tơdrong pơlong xơnăm 2021 ƀơm tơhlăk truh xơnăm âu. Dôm bơngai pơlong noh bơngai kon kông tŏk bŏk oei erih pơm jang tơ̆ Đăk Lăk. Kiơ̆ đơ̆ng tơdrong pơlong, atŭm hăm hơtŏk pơih xă tơdrong pơlong tơplŏng kơdâu, hơtŏk jơhngơ̆m jăn, đon bơnôh ăn kon pơlei; iŏk jang, vei răk tơƀăk vei dôm kơjă joh ayŏ juăt jue, kơhret tơdrong tơguăt lơ̆m tơpôl hơdrung kon kông tơ̆ dêh char.

Lan chih păng pơre nơ̆r