‘Nâu jĭ pơlei oei xa kơ tơpôl bơngai Việt hơdrĕch Lào, đei dêh char chĕng hơmet vă atŏk tơiung chă tơmang lăng lơ̆m tơpôl đơ̆ng dang ei truh sơnăm 2025. Tơ̆ plei Trí, xăh Krông Na, apŭng Buôn Đôn dang ei đei vă jê̆ 100 unh hnam, hăm 250 ‘nu bơngai Việt hơdrĕch Lào oei arih xa păng đei lơ trong jang xa, jŏh ayŏ kơdŏ xoang tơklep kơjăp hăm anih chă tơmang lăng Gơng Hơneh Buôn Đôn.

Lơ̆m khei 4 rim sơnăm, dêh char Dak Lak jang hơdoi hăm Khul jang tơbôl Việt – Lào hơnơ̆ng pơgơ̆r Têt Bunpimay, ‘nâu jĭ tơdrong lêh so tih hlŏh kơ tơpôl bơngai Lào tơ̆ tơring. Buôn Đôn kŭm jing tơring đei lơ anih gru groa so, ƀĕnh tơdrong juăt đơ̆ng Lào. ‘Nâu jĭ dôm tơdrong ‘lơ̆ng vă dêh char hơnơ̆ng dăr lăng păng đei lơ tơdrong jang lăp ‘lơ̆ng vă tưk tơiung tơdrong chă tơmang lăng lơ̆m tơpôl, chă roi tơƀôh tơdrong juăt, joh ayŏ kơdŏ xoang ‘lơ̆ng hơiă kơ bơngai Việt hơdrĕch Lào tơ̆ Dak Lak truh hăm tơmoi chă tơmang lăng.