Jô̆ truh dang ei, hlôi đei jê̆ 30 hơmrŭk chĭng chêng, hloh 430 blah hơbăn ao tanh kră sơ̆ đei asong ăn tơring, tơgop vei răk tơƀăk mong joh ayŏ chĭng chêng tơ̆ Đăk Lăk. Kiơ̆ kơ noh, sơnăm âu Anih jang hlôi asong 8 hơmrŭk chĭng chêng knah Êđê păng vă jê̆ 130 blah hơbăn ao tanh Êđê ăn dôm khul chĭng chêng, khul joh asuang tơ̆ 9 pơlei, 1 hnam trưng PTDT nô̆i trŭ păng 1 khul joh asuang tơ̆ xah lơ̆m 7 apŭng, thĭ xah kơ dêh char Đăk Lăk.

‘Nâu jing sơnăm mă 4 Anih Joh ayŏ, Tơplŏng kơdâu păng Tơmang pơhiơ̆ Đăk Lăk asong chĭng chêng păng hơbăn ao tanh kră ăn dôm khul chêng, khul joh asuang tơ̆ dôm thôn, pơlei. Mă kăl sơnăm âu, atŭm hăm tơgŭm đơ̆ng dêh char, oei đei jên asong đơ̆ng Anih jang hadoi apŭng plenh teh kơ dêh char Jeollabuk, Hàn Quốc kiơ̆ tơdrong asong jang Tơgŭm kih thuơ̆t vei răk tơƀăk mong joh ayŏ tơ̆ Đăk Lăk.