VOV4.Bahnar - Kơ sơ̆ 27/5, tơ̆ plt Buôn Ma Thuột, Anih ‘măn răk tơ mam kră sơ̆ kơ tĕh đak jang hơ doi hăm Anih ‘măn răk tơ mam Dak Lak pơ gơ̆r hôp roi tơ băt dôm tơ mam chă đei tơ̆ Anih sir chă tơ mam kră sơ̆ Thác Hai ‘măng mă 2. Anih sir chă tơ mam kră sơ̆ Thác Hai găh thôn 6, xăh Ia Jlơi, apŭng Ea Sup, dêh char Dak Lak. Anih gru groa so âu đei chă ƀôh ƀât blŭng sơ năm 2020 păng sir chă ‘măng mă blŭng lơ̆m khei 3 sơ năm 2021.

Dôm bơ ngai tang măt truh dăr lăng tơ mam kră sơ̆ đei ming pơ dă

Tơ̆ ‘măng sir chă mă 2, pơ gơ̆r đơ̆ng hơ tuch sơ năm 2021 truh dang ei, dôm bơ ngai sir chă tơ mam kră sơ̆ hlôi chă ƀôh lơ tơ mam nhen: sung tơ mo, bô̆i, kơ chai, pơ sat, hlŏh 1.000 tŏ đinh khoan tơ mo păng rơ bâu tŏ kơ chĕh tơ mam iơ iĕ. Kiơ̆ dôm bơ ngai sir chă tơ mam kră sơ̆, Anih gru groa so Thác Hai ‘nŏh jĭ anih oei xa đơ̆ng chăl kră sơ̆, đei hloi pơ sat, đei hloi anih pơm đinh khoan tơ mo tôch tih. Anih âu đei đunh kơ dang ei đơ̆ng dang 3.500 sơ năm truh 2.000 sơ năm adrol sơ̆ păng oei xa đunh dang 1.000 sơ năm.

Dơ̆ng: Tơ blơ̆