‘Nâu jĭ pơlei mă 4 kơ dêh char đei sơkơ̆t jĭ pơlei jang tơmang pơhiơ̆. Đơ̆ng hơtuch sơnăm 2023, kiơ̆ Tơchơ̆t kơsô̆ 2433 kơ Anih jang vei lăng kon pơlei dêh char Đak Lăk, pơlei Tơng Jú đei tơgŭm minh man hnam pơm jang, tơmam drăm, brŏ âu to, răt kơmăi vi tĭnh, kơƀang tang dŏ păng pơjing trang thŏng tin điê̆n tưh tơmang pơhiơ̆ vă hơtŏk jang tơmang pơhiơ̆ tơnăp hloh.

Kiơ̆ Anih jang Joh ayŏ, Tơplŏng kơdâu păng Tơmang pơhiơ̆ dêh char Đak Lăk, pơlei Tơng Jú jing minh lơ̆m 4 pơlei đei sơkơ̆t jang tơmang pơhiơ̆ lơ̆m sơnăm âu, atŭm hăm 3 pơlei nai noh pơlei Tuôr (pơlei tơm Buôn Ma Thuột), pơlei Kly A (thĭ xah Buôn Hồ) păng pơlei Jun (apŭng Lăk). ‘Nâu jĭ tơdrong jang tih kơ anih jang tơmang pơhiơ̆ vă sơng tơƀlŏk 120 sơnăm năr tơ-iung pơjing dêh char Đak Lăk. Thoi noh, truh đang ei dêh char Đak Lăk hlôi đei 7 pơlei jang tơmang pơhiơ̆ đei tơ-iung pơjing păng tơmơ̆t pơm jang.