Mă hơdăh, “Akŏm pơđom tơmo tơhnă Thác Hai” hăm 250 tŏ tơhnă, đei 200 tŏ tơhnă tơmo păng 50 tơmo vă pơm tơhnă, đei Hơnih mong răk mŭk drăm Dak Lăk iung jang hơdoi hăm Hơnih mong răk Chăl sơnăm Teh đak sir tơchă tơ̆ Hơnih oei kră sơ̆ Thác Hai, găh thôn 6, tơring Ia Jlơi, apŭng Ea Súp, dêh dêh char Dak Lăk.

Hơnih sir tơchă mŭk drăm kră sơ̆ Thác Hai đei ƀôh lơ̆m blŭng sơnăm 2020, iung jang sir tơchă ‘măng mă blŭng lơ̆m khei 3/2021; ‘măng mă ƀar đơ̆ng khei 11/2021 - 5/2022. Hloh đơ̆ng chă sir jrŭ dang 2 met, tơ̆ hơnih au đei ƀôh lŏk, sơlŭng găm atŭm hăm lơ mŭk drăm nhen: tơmo ot, sung, tơmo chĭch kơđoh ‘long, gŏ ge teh, tơmam pơm hăm get chai, hlŏh 1.000 tŏ tơhnă tơmo rim kơ loăi păng kơ mơjĭt kơcheh. Kiơ̆ đơ̆ng rim bơngai joăt jang, akŏm răk tơhnă tơmo Thác Hai ‘noh tơdrong đei ƀôh tôch kơ ‘nao găh mĭnh hơnih pơm tơlĕch tơhnă tơmo tôch kơ lơ đơ̆ng chăl kră iŏk yua Tơmo tơ̆ Tây Nguyên.